http://ascenteq.com/project/epdp

ካብ መሪሕነት ሰልፊ ዲሞክራሲ ህዝቢ ኤርትራ (ሰ.ዲ.ህ.ኤ) ብዝተዋህባ ሓላፍነት መሰረት፡ ኣሰናዳኢት ሽማግለ 2ይ ሰልፋዊ ጉባኤ ሰ.ዲ.ህ.ኤ፡ ንስርሓታ ዝሕግዝ መደባት ሓንጺጻ ንምትግባሩ ተበጊሳ ኣላ፡፡ መሪሕነት ሰልፊ 9 ዝኣባላታ ኣሰናዳኢት ሽማግለ 2ይ ጉባአ ሰደህኤ ድሕሪ ምምዛዙን ትምርሓሉ ሕግታት ድሕሪ ምንጻሩን፡ ኣሰናዳኢት ሽማግለ ብመሰረት ዝተዋህባ መምርሒ፡ ነብሳ ሰሪዓ/ወዲባ ስርሓታ ተሰላስል ኣላ፡፡ ብ20 ታሕሳስ 2014 ኣብ ዝተኻየደ ስሩዕ ኣኼባኣ፡ ኣቦ-መንበር ኣሰናዲት ሽማግለ፡ ሓው ተስፋሚካኤል ዮሃንስ፡ ኣብ'ዘን ዝሓለፈ ኣዋርሕ ዝተዓመ ስራሓት ንሽማግለ ብዝርዝር ገሊጹ። ሓው ተስፋሚካኤል ዮሃንስ ኣብ መግለጺኡ፡ ኣሰናዳኢት ሽማግለ ክሳብ ሕጂ ኣርባዕተ ተኸታተልቲ ኣኼባታት ከም ዘካየደትን ሰለስተ ክፍልታት ከም ዝመስረተትን ሓቢሩ።

እተን ቆይመን ዘለዋ ክፍልታት፡-

1. ክፍሊ ምድላው ንድፊ ሰነዳት ናብ ጉባአ

2. ክፍሊ ሎጂስቲክን ፋይናንስን፡

3. ክፍሊ ኣምራጺት ናይ ጕባኤ ተወከልትን ዜናን ....ኢየን።

ጉዳይ ምስንዳእ ናይቲ ኣብ ዝመጽእ ዘሎ ክረምቲ ክጋባእ ትጽቢት ዝግበረሉ 2ይ ጉባአ ሰደህኤ፡ ነታ 9 ዝኣባላታ ኣሰናዳት ሽማገል ጥራይ ከም ዘይግደፍ ብምርዳእ፤ ብዙሓት ኣባላት ሰልፊ ኣብ'ዘን ክፍልታት ኣትዮም ንኽሰርሑ መጸዋዕታ ከም ዝተገብረሎምን ድልውነቶም ከም ዘረጋገጹን ካብታ ሽማግለ ዝተረኽበ ሓበሬታ ኣረጋጊጹ። ኣባላት ሰልፊ ብዛዕባቲ ናብ ጉባአ ዝቐርብ ሰነዳት ኣቐዲሞም ዝመያየጥሉ እኹል ግዜ ምእንቲ ክረኽቡ፡ ነዚ ዝምልከት ክፍሊ ቀልጢፋ መታን ክትውድእ ተኸታታሊ ኣኼባታት ንምክያድ መደብ ሰሪዓ ከም ዘላ’ውን ተፈሊጡ ኣሎ።

ክፍሊ ዜና ኣ/ሽማግለ    

21 ታሕሳስ 2014

ርእሰ-ዓንቀጽ ሰደህኤ

ብዛዕባ’ታ ናባና ገጻ ትቀራረብ ዘላ’ሞ ንሕና ከዓ ክንቅበላ ኢድና ንዝርገሓላ ዘለና ሓዳስ ዓመት 2015 ቅድሚ ምዝራብና ብዛዕባ’ዛ ኣብ ኣጋ መወዳእትኣ ዘለና ዓመት 2014 ሓደሓደ ነጥብታት ምጥቃስ ኣገዳሲ እዩ ዝብል እምነት ኣለና። ዓመተ 2014 ብመንጽር ሃለዋት ህዝብና ኣብ ገዛእ ሃገሩን ደንበ ተቓውሞን ምስቲ ቅድሚኡ ዝነበረ ዓመታት ክወዳደር እንከሎ መሰረታዊ ፍልልይ ኣይነበሮን። ግና ድማ ብድፍኑ ከምቲ ዝሓለፈ ዓመታት ነይሩ፡ ኢልካ ጥራይ ምሕላፉ እኹል ስለ ዘይኮነ ሓደሓደ ነጥብታት ምጥቃስ ኣገዳሲ እዩ። እቲ ዝጥቀስ ግና ኣብ’ዛ ኣብ መወዳእታ ምዕራፋ ትርከብ ዓመት ካብ ዝተባህለ መሪጽካ ንምድጋም እንተዘይኮይኑ ከቶ ማይ ዘይጠዓመ ኣይኮነን።

እቲ ስሩ ካብ ዝሰድድ ነዊሕ ዝዕድሚኡ ብሰንኪ ጉጅለ ህግደፍ ኣብ ልዕሊ ህዝብና ክወርድ ዝጸንሐን ዘሎን እዚ ይጐድሎ ዘይበሃል በደል ኣብ 2014 እውን ቀጺሉ’ዩ። እቲ ስእነት፡ ስግኣት፡ ግዱድ ዕስክርናን፡ ኣብ ቅድሚ ሕጊ ዘይትቐርበሉን ምኽንያቱ ዘይትፈልጠሉን ማእሰርትን ኣብ’ዛ ኣብ ኣጋ ምውዳኣ ዘለና ዓመት እውን ገዲዱ እምበር ኣይነከየን። እቲ ንኹላትና ምስጢሩ ጠፊኡና ዘሎ ዋሕዚ ኤርትራውያን መንእሰያት ናብ ስደት እውን ቀጺሉ። ብሰንክ’ዚ ዘይውሑስ ዋሕዚ ናብ ስደት ኣብ ዶባት፡ ምድረበዳን ባሕርን ዝጠፍእ ኤርትራዊ ህይወት እውን ወሲኹ እንተዘይኮይኑ ኣይነከየን። ናይ’ዚ ዝዛሪ ዘይመስል ዋሕዚ ናብ ስደት ሓደጋኡ ካብ ኤርትራ ሓሊፉ ኣብተን ኤርትራውያን ከም ናይ መወዳእታ መዕረፊኦም ዝመርጽወን ሃገራት ምዕራብ’ውን ኣዝዩ ከቢድ ሻቕሎት ፈጢሩ ስለ ዘሎ፡ ዝተወሰና ሃገራት ክሓስባሉ ጀሚረን ኣለዋ። ብሓፈሻ 2014 ኣብ ህዝብና ዝጸንሐ ሻቕሎት መሊሱ ዝወሰኸሉ ኩነታት እዩ ጸኒሑ።

ብዛዕባ ፖለቲካዊ ሃለዋት ኤርትራ ክለዓል እንከሎ፡ ንኩነታት ደንበ ተቓውሞ ከይጠቐስካ ምሕላፍ ኣዝዩ ኣጸጋሚ እዩ። ብመንጽር እዚ ደንበ ተቓውሞ ኤርትራ፡ ብደረጃ ውድባት ኮነ ግንባራት ክረአ እንከሎ ኣብ’ዛ ዳርጋ ወዲእናያ ዘለና ዓመት ዘተባብዕ ስጉምቲ ኣይሰጐመን። ምናልባት እውን ብዙሓት ፖለቲካዊ ምርሕሓቓት ዝተራእየሉ ናይ ሓደ ስጉምቲ ንቕድሚት ክልተ ስጉምቲ ንድሕሪት ጉዕዞ ዓመት ነይራ ምባሉ ዝከኣል ይመስለና። እቲ ብዙሕ ግዜ ዝተፈተነ ንሓይልታት ተቓውሞ ኣብ ንብዙሓት ዘሳትፍ ናይ ኣብ ዝተሓተ ነጥብታት ምስምማዕውን ስጉምቲ ማዕረቲ ትጽቢት ዝተገብረሉ ኣይተረጋገጸን። በዚ ኣቢልካ ኣብ ሓደ መኣዲ ተኣኪብካ፡ ቅድም ንጉጅለ ህግደፍ ንምውጋድ፡ ደሓር ድማ ክፍጠር ንዝኽእል ሃጓፍ ናይ ምምላእ መሕለውታ ናይ ምዃን ዓቕሚ ኣይተጠርየን። ኣብ’ዛ ኣብ ምፍናዋ ንርከብ ዘለና ዓመት እቲ ትልኽ ምባል ኣብ ቦታኡ ኮይኑ፡ ዘተኣማምን ቀጻሊ ህይወት ግና ኣይተሰዅዐን። ሓቢርካ ንምሕያል ዝተገብሩን ዝግበሩ ዘለዉን ፈተነታት፡ ብሰንኪ ኣብ ጽኑዕ ባይታን ሰፊሕ መድረኽን ብዘይምድኳኖም፡ ንድሕሪት ዝተመልሱ ውዳበታት ክንርኢ ጸኒሕናን ኣለናን። እዚ ዘይምዕዋት ወድዓውን በዓል ቤታውን ምኽንያታት ዘለዎ ኮይኑ፡ እቲ ቀንዲ ዘተሓሳስብ ዝምልከቶም ተዋሳእቲ ኣካላት፡ ነቲ ወድዓዊ ምቹእነት ዝተረደአ በዓል ቤታዊ ዓቕሚ ብዘይምውናኖም ክፍጠር ዝጸነሓ ርኡይ ድኽመት እዩ። ዋላ’ኳ ከም ባህሊ ተወሲዱ፡ ንኹሉ ደንበ ተቓውሞ ብሓደ ዓይነት ናይ ድኽመት መለክዒ ክግለጽ ላህመታዊ ሚዛን እንተጸነሓ፡ ውድባትን ግንባራትን ብመንጽር ነናቶም ፋይላት ኣብቲ ኣውንታ ኮነ ኣብቲ ኣሉታ ፈሊኻ ምምዛኑ ኣገዳሲ እዩ። ሽዑ እዩ ኸዓ ኩሉ መን ምዃኑ ዝርዳእን ተሓታትነቱ ዝስከምን።

ሰልፊ ደሞክራሲ ህዝቢ ኤርትራ ከም ሓደ ጸላዊ ኣካል ደንበ ተቓውሞ ኤርትራ፡ ኣብ 2014 ብቐጻሊ ናይ ኣባላቱን ናይ ህዝብን፡ እሞ ድማ ኣብ ኩሉ ኩርነዓት’ዛ ዓለም ኣኼባታት ኣካይዱ’ዩ። ኣብዚ ኣኼባታቱ ብዘካየዶ ዘይሕለል ጻዕሪ፡ ኣብ ጉዳይ ንህልዊ ኩነታት ኤርትራ ዝምጥን ኣገባብ ቃልሲ ምኽታል፡ ኣብ ምንጻር ግደ ህዝቢ ኤርትራ ኣብ ምርግጋጽ መሰረታዊ ለውጢ፡ ንኤርትራ ከም ዘይትሓልፍ ሃገርን፡ ነቲ ሓላፊ ጉጅለ ህግደፍን ፈሊኻ ኣብ ምርዳእ፡ ኣብ ኣገባብ ምእካብ ነዚ ተበቲኑ ዘሎ ሓይልታት ተቓውሞ ናብ ሓደ ንምምጻእ ዘለዎ መርገጽታት ኣብ ምስራጽ ደሓን ባይታ ዝረኸበሉ ዓመት’ያ ነይራ። ናይ’ቲ ካብ ደንበ ተቓውሞ ክሃድም ዝጸንሐ ኤርትራዊ መንእሰይ ልቢ ኣብ ምምላስ እውን ከምኡ። ፈስቲቫል ፍራንክፈርት ድማ ከም መንጸባረቒ መድረኽ ናይዚ ዝተጠቕሰ ጻዕርታትን ዝተመዝገበ ጽልዋታትን ብኣብነት ክጥቀስ ዝከኣል እዩ። ናይዚ ሰልፊ ማእከላይ ባይቶ ኣብ 4ይ ስሩዕ ኣኼባኡ ናብ ዝምልከቶም ናይ ለውጢ ሓይልታት ዘቕረቦ ናይ “ኩላትና ኣብ ሰፊሕ መድረኽ ተራኺብና መዋጸኦ ንድለይ” መጸዋዕታኡ’ው ካልእ ኣብነት እዩ። ቃልሲ ህዝቢ ኤርትራ ኣካል ናይቲ ብደረጃ ዓለም ዝካየድ ናይ ሰላም፡ ልምዓትን ደሞክራሲን ቃልሲ ክነሱ፡ ቆላሕታ ስኢኑ ከም ዘሎ ፍሉጥ እዩ። ሰደህኤ ኣብ’ዛ ንጠቕሳ ዘለና ዓመት 2014፡ ነዚ ዓለምለኻዊ መድረኽ ሃሲሱ ዘሎ ቃልሲ ህዝቢ ኤርትራ ምእንቲ ለውጢ ምስ ሕብረተሰብ ዓለም ንምልላዩን፡ ዓለም ለኻዊ ኣጀንዳ ከም ዝኸውን ንምግባሩ’ውን ሰፊሕ ጻዕሪ ኣካይዱ ብዙሓት ተስፋ ዝህቡ ኣፍደገታት ከፊቱ ኣሎ። ናይ’ዚ ቀረባ መዓልታ ተሳትፎኡ ኣብ ዓውደ መጽናዕቲ ጆሃንስበርግ ከዓ ኣብዚ መዳይ’ዚ ኣገዳሲ ኣብነት እዩ። ጉዳይ ስደተኛታት ኣብ ልዕሊ እቲ ዝካየድ ዘሎ ናይ ለውጢ ቃልስና ጥራይ ዘይኮነ ኣብ ህልውና መጻኢት ኤርትራ እውን ተጽዕኖ ከም ዝህልዎ ብምርዳእ ግቡእ መልክዕ ንምትሓዙ፡ ሰደህኤ ናብ ብዙሓት እዚ ጉዳይ ዝምልከተን ሃገራትን ኣህጉራዊ ትካላትን ጥርዓናቱ ከቕርብ ጸኒሑ እዩ። ምስ እዚ ኩሉ ግና እዚ ሰልፊ ብመንጽር ንኤርትራዊ ኩነታት ዝምጥን ሰልፊ ኮይንካ ምቕራብ ዝተርፍዎ ዕማማት ከም ዘለዉ ፍሉጥ እዩ። ሰልፍና ንሓይልታት ተቓውሞ ኣብ ዘተኣማምን ባይታ ንምስራት ካብኡ ዝድለ ክገብር እንተዘይኮይኑ፡ በይኑ ዝዓሞ ዕማም ከም ዘይኮነ ይኣምን እዩ።

እቲ ዝያዳ ክንዛረበሉ ዝግበኣና እምበኣር ብዛዕባ’ታ ጉዕዘኣ ወዲኣ ትሓለፍ ዘዛ ዓመት ዘይኮነ፡ ብዛዕባ’ታ መጻኢ ሓላፍነት ክትርከብ ተቐሪባ ዘላ ዓመት ምዃኑ ኩላትና እንርደኦ እዩ። ሓድሽ ዓመት ክትርከብ እንከለኻ “ ኣብ ሓድሽ ዓመት ከምዚ ክገብር እየ” ኢልካ ቃል ምእታው ዝተለምደ እዩ። ንሕናውን ሰብ ብዙሕ ዕማምን ሓላፍነትን ስለ ዝኾና ኣብዚ ናይ ሓድሽ ዓመት ኣጋጣሚ “ኣብዚ ሓድሽ ዓመት ከምዚ ክገብር እየ” ኢልና ቃል ክንኣትው ናይ ግደን እዩ። ኣብ ከምዚ ኣጋጣሚ እንኣትዎ ቃል ንኩለመዳያዊ ዓቕምናን ከባቢናን ኣብ ግምት ዘእተወን ዝትግበር ክኸውን ይግበኦ። እቲ ቃል ክንኣትዎ እንከለና ኣብ ግምት ከነእትዎ ዝግበኣና፡ ዓቕምናን ኩነታት ጸላኢናን ጥራይ ዘይኮነ ንከባቢያዊ ኩነታት እውን ኣብ ግምት ኣእቲና ክንትልምን ክንሕንጽጽን ይግበኣና። ብመንጽር እዚ ሰልፊ ደሞክራሲ ህዝቢ ኤርትራ፡ ካብ ገምጋሙ ተበጊሱ፡ ዝሓዞም ዕማማት እሞ ድማ ኣብ ዝሐለፈት ዓመት ዘይተግበሮም ዕማማት ኣብዚ ቀጻሊ ዓመት እውን ኣብ ከባቢኡ ንዝረአ ምዕባለታት ኣብ ግምት እንዳእተወ ክቕጽሎም እዩ።

ንሰልፍና ኣብ ዓመተ 2015 ካብ ዝጽበይዎ ዕማማት እቲ ቀንዲ፡ ምዕዋት እቲ ኣብ መጻኢ ወርሓት ክረምቲ ከካይዶ ከም መደብ ሒዝዎ ዘሎ 2ይ ሰልፋዊ ጉባአ እዩ። ነዚ ተኣሚሙ ዘሎ 2ይ ጉባአ ክትከደሉ ዝጸናሕካ መንገዲ ደጊምካ እትረግጸሉ ዘይኮነስ ናብ ሓደ ምዕራፍ ዘሰጋግር ከም ዝኸውን ንምግባሩ ስኑ ነኺሱ ክቃለስ እዩ። ብፍላይ ከዓ ነዚ ተበቲኑ ዘሎ ሓይሊ ተቓውሞ፡ ኣብቲ ዘራኽቦ ውሱን ነጥብታት፡ እሞ ድማ ንኹሉ ዝቃወም ኤርትራዊ ሓይልታት ከሳትፍ ብዘኽእል ሰፊሕ መድረኽ ከም ዝዕወት ንምግባሩ ምስ ከምኡ ሰፊሕ ርኢቶ ዘለዎም ኣካላት ኮይኑ ከይተሓለለ ክቃለስ እዩ። እዚ ክበሃል እንከሎ ግና ከምቲ ኣቐዲሙ ዝተጠቕሰ ነዚ ዓብይ ዕማም በይኑ ክዓሞ እዩ ማለት ኣይኮነን። ንኣብነት ሓይልታት ተቓውሞ ብሓባር ከም ዝቃለሱ ንምኽኣሎም ዝግበር ቃልሲ ናይ ኩሎም ተሻረኽቲ ኣካላት ቅሩብነት፡ ተወፋይነትን ሕድገትን ከም ዝሓትት ሰደህኤ ብግቡእ ይኣምን። ኣባላት ሰደህኤ ከምቲ ዝተለምደ፡ ነዚ ዝጽበየና ዘሎ ዕማማት ንምዕዋት ኣብ ኩሉ ዓውድታት ብሰልፋዊ ጽንዓትን ኤርትራዊ ሓልዮትን ተሰንዮም ተሳትፈኦም ከም ዘሕይሉ ሰልፍና ዘለዎ እምነት ዘየማትእ እዩ።

22 ታሕሳስ 2014

ስውእ ዑመር ጃብር ዑመር ብዓርቢ 19 ታሕሳስ 2014 ዓ.ም ብዝሓደሮ ሕማምን ብዝነበሮ ናይ ዕድመ ጸጋን ካብ'ዛ ዓለም ብሞት ከምዝተፈልየና ካብ መልበርን፡ ኣውስትራልያ፡ ብዝረኸብናዮ ሓበሬታ ፈሊጥና።

ብስመይን ብስም መሪሕነትን መሰረታትን ሰልፊ ዲሞክራሲ ህዝቢ ኤርትራ (ሰዲህኤ) ናይ'ዚ መሪር ሓዘን ተኻፈልቲ ምዃና እናገለጽኩ፣ ንስውእ መንግስተ-ሰማይ ንቤተሰቡን መቓልስቱን ፈተውቱን ድማ ጽንዓት ይሃቦም፡ ጠሉ ድማ የውርደሎም።

ስውእ ዑመር ጃብር ካብ ንእስነቱ ኣትሒዙ ምእንቲ ሃገራዊ ናጽነት ዝተቓለሰን ኣብ ዝተፈላለዩ መሪሕነታዊ ጽፍሕታት ተመዲቡ ንህዝቡ ዘገልገለ ገዲም ተጋዳላይ ኢዩ። ክሳብ ዕለተ ሞቱ ድማ፡ ደኺመ፡ ዓብየ ከይበለ ንፍትሕን ዲሞክራስን ከይተሓለለ ዝተቓለሰ ሃገራዊ ኢዩ።

መንግስተኣብ ኣስመሮም

ኣቦ መንበር ሰዲህኤ

19 ታሕሳስ 2014

ኣርዓዶም በርሀ

ሎሚ ኣብ ኤርትራ ዘይተነገረ እምበር ዘይተገብረ ሕማቕ ነገር ከም ዘየለ ኣይኮነንዶ ንሕና፡ ሕብረተሰብ ዓለም እውን ፈሊጥዎስ ዝሻቐለሉ ዘሎ እዩ። ጉጅለ ህግደፍ እውን ዕባራ ምኽንያታት ደኣ የቕርብ ይኸውን እምበር፡ “ናይ ሎሚ ኤርትራ ዓዲ ደሓን እያ” ዝብለሉ ሓቦ የብሉን። ሎሚ ዝኾነ ተመራማሪ ብዛዕባ ብሰንኪ ጨካን መራሒኡ ኣብ ሕማቕ መነባብሮ ናይ ዝነብር  ህዝቢ ኣብነት ክጠቅስ እንከሎ ንኤርትራ ኣብ ቅድሚት ንምስራዕ ዘዳድዮ ኣይኮነን። ብዝሒ ዝተኣስሩ ጋዜጠኛታት፡ ብዝሒ ናብ ፍርዲ ዘይቀርቡን ሃለዋቶም ዘይፍለጥን እሱራት፡ ጉዳይ መወዳእታኡ ዘይፍለጥ ውትህድርና፡ ብኩራት ናይ ብሕቲ ሚድያ፡ ብዝሒ ሃገሮም ገዲፎም ዝስደዱ ዜጋታ ድማ ብዓብይኡ እዋናዊ መለለይ ኤርትራ እዮም። ናይዞም ኩሎም ዝጠቐስናዮም ኣሉታታት ጠንቂ፡ ተሓታትን መፍትሕን ዝምልከት ንዘርዝር እንተንብል ክሳብ ክንደይ ነዊሕ ርሕቐት ምዃድ ከም ዘድልየና ንጹር እዩ። ምኽንያቱ እቲ ጉዳይ ዕድሜኡ ነዊሕ ኣፈጻጽማኡ ድማ ሕልኽልኽ ስለ ዝኾነ። ምእንቲ እዚ ኢና ድማ በብሓደ እንዳጫጫሕና ክንዛረበሎም እንግደድ። ከምኡ ስለ ዝኾነ እየ ኸዓ ኣብ’ዚ “ሓንቲ ኤርትራዊት ኣደ ኣብ ጃልባ ሓሪሳ” ኣንዳተባህለ ዝውረየሉ ዘሎ ቅነ፡ ብዛዕባ ስደት ሓደ ሓሳብ ወስ ከብል ደልየ ዘለኹ።

ሓደ ጉዳይ ከጋጥም እንከል ናብኡ ዘብጸሓ ጠንቂ ከም ዝህልዎ ፍሉጥ እዩ። “ንጉዳይ ስደት ኣብ ኤርትራኸ ጠንቁ መንዩ?” ዝብል ሕቶ ንምምላስ ብዙሓት ሓረጋት ከም ዝሰሓቡ፡  ሓያሎ ግምታት ከም ዝቐርቡን ከምኡ’ውን ሓላፍነት ክስከሙ ዝግበኦም ኣካላት ከካብኣቶም ከርሕቕዎ ከም ዝፍትኑን ቅድሚ ሕጂ ተዓዚብና ኣለና። ኣብዚ ምድርባይ  ጉጅለ ህግደፍ ዝበለ እንተበለ  ካብ ተሓታትነት ከም ዘይድሕን ብዙሓት እንረዳደኣሉ ውዱእ ጉዳይ እዩ። እሞኸ እቲ ተሓታትነት ኣብ እንግደዓ ህግደፍ ጥራይ ድዩ ዝድረት ? በቲ ንሱ ዝቐደዶ ነቓዕ ዝኣትዉ ካለኦት ተሓተቲኸ የለዉን ድዮም? ዝብሉ ሕቶታት እውን ብዝግባእ ሃሰስ ክበሃሉ ዝግበኦም እዮም። እጃማቶም ደኣ ይፈላለ እምበር ንጉዳይ ስደት ኣብ ኤርትራ ብኣውንታ ድዩ ብኣሉታ ኣብ ምጽላዉ ብዘይካ ጉጅለ ህግደፍ ካለኦት ብዙሓት ሰብ ብጽሒት ከም ዝህልዉ ክንዝንግዕ ኣይግበኣናን። ወለድን ኣዝማድን ናቶም ብጽሒት ኣለዎም። ኣብ መስርሕ ስደት ወጻኢ ዝኸውን ገንዘብ ናይ ምቕራብ ዓቕሚ ዘለዎም ቤተሰብ ስደተኛታት፡ ናይ ህዝቢ ድሕነትን ጸጥታን ናይ ምሕላው ሓላፍነት ዝተሰከሙ ኣካላት መንግስቲ፡ ኣብ ኤርትራ ዘሎ ሕማቕ ነገር ቀይርና ራህዋ ንምርግጋጽ ንቃለስ ኣለና ዝብሉ ናይ ፖለቲካ ውዳበታትን ውልቀ ኣባላትን ስደተኛታት ተርኪቦም ዘዕቁቡ ሃገራትን ትካላትን ኩሎም ነናቶም ብጽሒት ኣለውም።

ብባህልና ጥራይ ዘይኮነ ብዓይኒ ሓቂ ኣውን ሓደ ዝተጸገመ ኣካል ካብቲ ካብኡ ዝሓሸ ኣካል ሓገዝን ደገፍን ሓቲቱ ክረክብ መሰረታዊ ሰብኣዊ ኩነት እዩ። ብዕድመ ዝድፈአ ኢድ መንእሰይ ይጽበ፡ ዝጠመየ ካብቲ ዘለዎ ክዕንገል ይደሊ፡ ዝጸመአ ድማ ካብቲ ማይ ዘለዎ ክርስርስ ይደሊ፡ መንገዲ ዝጠፈኦ ድማ ነቲ ብዛዕባቲ ከባቢ ካብኡ ዝሓሸ ግንዛበ ኣለዎ ዝብሎ ኣካል ይሓትት። እዚ ዝምድናታት’ዚ ብፍላይ ኣብ ሕድሕድ ደቂ ሃገር ዝያዳ እዩ ዝተርር። ኣብዚ እቲ ናይ ተጸባዪ ሕቶ ብኣንጻሩ ዝምለሰሉ ኣጋጣሚ’ውን ይርአ እዩ። እቲ ዝገደደ ድማ ዝተወሰኑ፡ ሕማቕ ግዜ ዝሓልፍ ዘይመስሎም፡ ንደሓር ዘይሓስቡን ብዋጋ ካለኦት ናቶም ረብሓ ዘቐድሙ፡ ኣብ ልዕሊ ዜጋኦም ዝጭክኑ ስሱዓት ዜጋታት ዘጋጥሙ ምዃኖም እዩ። ከምቲ “ብዕራይሲ ዝበልዖ ሳዕሪ እምበር ዝጽበዮ ገደል ኣየስተውዕልን” ዝበሃል። ከምቲ ኣቐዲመ ዝበልኩዎ ጉጅለ ህግደፍ ኣብ ጉዳይ ስደትን ሳዕቤናቱን ቀዳማይ ተሓታቲ እዩ። ነዚ ኩልና እንሰማማዓሉ ናይ ጉጅለ ህግደፍ ገበን  ተኸዊሎም ንግዜኡ ዝጥቀሙ ናይ ሕማቕ ዘበን ነጋዶ ከም ዘለዉ ከዓ ኣይንስሓት። ቅድሚ ሕጂ ብብዙሓት ወገናት ክትርጠሩን ክኽሰሱን ዝጸንሑ፡ ነቲ ህግደፍ ዝዀዓቶ ጉድጓድ ከዕሙቑ ዝጸንሑ ወገናት ከም ዘለዉ ክንዝንግዕ ኣይግበኣናን።

ከምስሉን ነብሶም ንክኽውሉን ካብ ክሳድ ንላዕሊ ንጉጅለ ህግደፍ እንዳተራገሙ፡ ካብ ኤርትራ ናብ ዝተፈላለየ ጐረባብቲ ሃገራት ከውጽኡ፡ ካብኡ ቀጺሎም ናብ ሊቢያን ሲናይን ክወስዱ፡ ድሕሪኡ ምስ ዘይውሑሳት ጃላቡ ከሰማምዑ፡ ድሕሪ’ዚ ኩሉ ህይወት ብዙሓት ዝውህጥ መዓት ኣብ ኤውሮጳ ንዝበጽሑ ስደተኛታት ካብ ሓደ ሃገር ናብቲ ካልእ እንዳገላበጡ ሃብቲ ዝድልቡ ኤርትራውያን ከም ዘለዉ ኣብ ብዙሕ ኣጋጣሚታት ክግለጽ ዝጸንሐ ሎሚ ግና ባዕሉ ዝወጽእ ዘሎ እዩ ዝመስል። እቶም ነዞም ብዋጋ ግዚያዊ ጠቕሚ ሽሞም ዝሸጡ፡ ነዚ እከይ ተግባሮም ናይ ገንዘብ ዓስቢ እንከፍሎም ኤርትራውያን ህላወኦም ክስወረና ኣይክእልን እዩ። ውረ ብዝተወሰነ መልክዑስ ተሓባበርቶም ኢና። እዞም ኣካላት እዚኣቶም ነዚ ግዕዘይ ተግባር ከም ሓደ ስራሕ ስለ ዝወስድዎ፡ ኣብዚ ስረሖም መኽሰብ ንምኽዕባት ብዘለዎም ዓቕሚ መንእሰያት ናብ ስደት ንክውሕዙ ከለዓዕሉ ባህርያዊ እዩ። ብዝሒ ኣታዊኦም ብብዝሒ ስደተኛታት ስለ ዝውሰን። ነዚ ምልዕዓሎም ንምርጓድ ከዓ ኣብ ዓዲ ስደት ዘየለ ጸጋታት ከም ዘሎ ኣምሲሎም ክሰብኩን ከተሃራርፉን ናይ ግድን እዩ። ምናልባት እውን ነዚ ስደት ከም መሰረታዊ ፍታሕ ኣምሲካ ዝቐርብ ሃገር ናይ ምፍራስን ካብቲ ዝፈርስ ዘይቅዱስ ረብሓ ንምርካብን ዝሕግዞም እንተኾይኑ ምስ ጉጅለ ህግደፍ ግንባር ዘይፈጥርሉ ምኽንያት’ውን የብሎምን።

እስከ ናይ ጉጅለ ህግደፍስ ንግደፎ እሞ ንሕና እቶም ነቲ ጉጅለ’ውን ተጻሒፉ ዘሻቕለና እሞ መፍትሒ ንምርካብ፡ ነቶም ምቃል መሰንገለና ዝኾኑ፡ ልዕሊ ስሞም ከብዶም ዘቐድሙ፡ ነጋዶ ደቂ ሰብ ምዕጋሶም ከም ዝምልከተና እንርዳእ? እዚ ኣብ ወውሽጥና ክንምልሶ ዝግበኣና ሕቶ እዩ። ነዞም ኣብ ከምዚዓይነት ዕብዳን ዝሳተፉ ወገናት ሒዝካ ኣብ ቅድሚ ሕጊ ምቕራብስ ደሓን፡ ኣፍና መሊእናዶኸ ተግባራቶም ኣብ ህልውና ሃገርን ህዝብን ክሳብ ክንደይ ሃሳዪ ምዃኑ ገሊጽናሎምዶ ንፈልጥ? እንድዒ። ብኣንጻሩ ብቤተሰባዊ ስሕበት ተሳዒርና፡  ዝሓተትዎ ዓቐን ገንዘብ እንዳኸፈልና፡ ጓል ሓብተይ፡ ወዲ ሓውይ፡ ዘማይ … ወዘተ በቲ ዘይሕጋውን ዘይውሑስን መንገዲ ኣስግረለይ ውይ ኣሕልፈለይ ከም እንብሎም  ልቢ ኩልና ዘይስሕቶ እዩ። ከምዚ ክንገብር እንከለ “እዋእ ነቲ ፍልሰት እኮ ንሕናውን ነተባብዖ  ኢና ዘለና” ኢልናዶ ምስ ሰብስ ይትረፍ ምስ ሕልናና ተዛራሪብና ንፈልጥ? እዚ እውን ነፍሲ ወከፍና ክንምልሶ ዝግበኣና ካልእ ግድል እዩ። ብመሰረቱኸ እቲ ናይ ደገደገ ገዲፍካ ኣብ ውሽጥናዶ የሻቕለና። እዚ ብሓፈሻ ምስቲ “ንለውጥን ራህዋን ንቃለስ ኣለና” እንዳበልና ካብ ነብስና ብዘይምጅማር እነርእዮ ሸለልትነት ኣዛሚድካ ክረአ ዝግበኦ እዩ።

እዚ ጉዳይ ኤርትራውያን ስደተኛታት ብፍላይ ድሕሪ ናይ ለምፐዱሳ ህልቂት፡ ዝያዳና ንዓለምና ዘሻቐለን ዘናወጸን ኮይኑ ኣሎ። እዚ ጸገም ኣብ ልዕሊ ኤርትራን መጻኢ ዕድላን ጥራይ ዘይኮነ ኣብ ኩለመዳያዊ ቀጻልነታ ከም ሃገርን ህዝብን እውን ኣሉታዊ ተጽዕኖ ከም ዝህልዎ ዝተገንዘቡ ሃገራትን ዓለም ለኻዊ ትካላትን ዝያዳና ላዕልን ታሕትን ይብልሉ ኣለዉ። ናይ መንግስቲ ደንማርክ ምንቅስቓስ ኣንፈቱ ናበይ ገጹ እዩ ብዘየገድስ ሓደ መርኣያ ናይቲ ሻቕሎት እዩ። ናይ ሀገረ እስራኤል ቀጻሊ ናይ ሕዝ ግድፍ ምንቅስቓስ እውን ከምኡ። እነሆ ድማ ኣብዚ ቀረባ መዓልታት ዝሰማዕናዮ መንግስታት ኢጣልያን ጀርመንን ብናይ ሓባር ወፈራ ኣብዚ ዘይሰብኣውን ዘይሕጋውን ንግዲ ኣሕዋቶምን ኣሓቶምን ተዋፊሮም ዝነበሩ ልዕሊ 10 ኤርትራውያን ኣሲሮም። ኣስማቶም እውን ከይተረፈ ነጊሮሙና ኣለዉ። ብሰንኮም ናይ ዝጠፍኡ ኤርትራውያን ኣሃዛት’ውን ይቀላቐል ኣሎ። እዚ ተግባርዚ ብዓብይኡ ነዞም ተታሒዞም ዘለዉን ንመጻኢውን ዝተሓዙን ገበነኛታት ኣዝዩ ዘይሕክኽ ጸሊም ምልክት ክኸውን እንከሎ፡ ንኩልና ኤርትራውያን እውን ከም ዜጋታት ኣዝዩ ዘሕፍርን፡ ኣፍካ መሊእካ “ኤርትራዊ እየ” ክትብል ዘሰክፍ እዩ። እዚ ስጉምቲ እዚ ጉዳይ ኤርትራውያን ስደተኛታት ዓለም ለኻዊ ቆላሕታ ከም ዝሰሓበ ካብ ዘመልክቱ ሓደ ኮይኑ፡ ንዓና እውን ሓላፍነት ዘሰክም እዩ። ስለዚ ሕጂ እውን እቲ ግዜ ምሉእ ብምሉእ ኣይሓለፈ እሞ፡ “ጉዳይ ስደት ዓለም ለኻዊ ጸገም እምበር ኣባና ጥራይ ዘጋጥመ ኣይኮነን” ብዝብል ምስምስ ከይተዘናጋዕና፡ በቲ ሓደ ወገን ክሳብ ሕጂ ኣብዚ ረሳሕ ተግባራት ዘይኣተዉ ኣካላት ኢደእግሮም ንክእክቡ ብምምካር፡ በቲ ካልእ ወገን ድማ ሕልናኦም ብግዚያዊ ጠቕሚ ተሳዒሩ ኢዶም ዝረሰሐ ናብ ሕጊ ኣቕሪብካ ከም ዝቕጽዑ ንምግባር ክንሰርሕ ይግበና።

 19 ታሕሳስ 2014

Radio Erena: 17 December 2014

ኤርትራውያን ዝርከብዎም430 ሰደተኛታት ጽዒና ትማሊ ሰሉስ 16 ታሕሳስ ኣብ ማእከላይ ባሕሪ ካብ ናይ ምጥሓል ሓደጋ ኣብ ዝደሓነት ጃልባ ዝነበረት ኤርትራዊት ነፍሰጾር፣ ኣብ መርከብ ሓይሊ ባሕሪ ኢጣልያ ከምዝሓረሰት ማዕከን ዜና ዘ ሎካል ኣፍሊጡ።

ኣብታ ካብ ናይ ምጥሓል ሓደጋ ዝደሓኑ ኤርትራውያን ዝርከብዎም ስደተኛታት ናብ ናይ ኢጣልያ መርከብ ሓይሊ ባሕሪ ድሕሪ ምግዓዞም'ያ እታ ኤርትዊት ነፍሰጾር ሕማም ሕርሲ ተታሒዛ።

ብሓገዝ እቶም ህወይት ኣብ ምድሓን ተዋፊሮም ዝነበሩ ኢጣልያውያን ከኣ ብሰላም ክትሓርስ ከምዝኸኣለት ዝሓበረ ማዕከን ዜና ዘ ሎካል፣ እቲ ውጻእ መዓት ዝኾነ ኣብ መርከብ ዝተወልደ ኤርትራዊ ህጻን ኣሎኒኣብ ናሃም ከምዝተሰምየ ጠቒሱ።

ኣሎኒኣብ ናሆም፣ ሓይሊ ባሕሪ ኢጣልያ ስደተኛታት ኣብ ባሕሪ ናይ ምድሓን ስርሒት ካብ ዝጀመርሉ እዋን፣ ኣብ መርከብ ሓይሊ ባሕሪ ኢጣልያ ዝተወልደ ካልኣይ ህጻን'ዩ።

ኣብ ዝሓለፈ ወርሒ መስከረም፣ ብተመሳሳሊ ኣገባብ ኣብ ዝደሓነት ጃልባ ናይ ጋምብያ ዜግነት ዝነበራ ነፍሰጾር ብሰላም ምግልጋላ ጸብጻባት ኢጣልያ የመልክቱ።

ብመንገዲ'ዚ ሓደገኛ ናይ ማእከላይ ባሕሪ ጉዕዞ ኣዝየን ብዙሓት ነፍሰጾራት ናብ ኢጣልያ ዝሰግራ እኳ እንተኾና፣ ኣብ ላምፔዱሳ ኣብ ዘጋጠመ ህይወት 360 ኤርትራውያን ዘህለቀ ሓደጋ ባሕሪ ግና ሓንቲ ኤርትራውያን ነፍሰ ጾር ኣብ ባሕሪ ድሕሪ ምጥሓላ ከምዝሓረሰተን ንሳን እቲ ዝተወልደ ህጻን ብዕትብቲ ተላጊቦም ሞይቶም ከምዝተረኽቡን ኣይርሳዕን።

ኢጣልያ ነቲ ድሕሪ ሓደጋ ላምፔዱሳ ዝጀመረቶ 'ባሕርና' ዝሰመየቶ ስደተኛታት ኣብ ማእከላይ ባሕሪ ናይ ምድሓን ስርሒት ኣብ ዝሓለፈ ወርሒ ብወግዒ ደው ካብ ዘበለትሉ ክሳብ እዚ እዋን'ዚ ልዕሊ 1500 ስደተኛታት ከተድሕን ክኢላ ኣላ።

Source = erena.org

ቤት ጽሕፈት ዜና ሰዲህኤ

17 ታሕሳስ 2014

ኣቦ መንበር ሰልፊ ዲሞክራሲ ህዝቢ ኤርትራ (ሰዲህኤ)፡ ሓው መንግስተኣብ ኣስመሮም ዝመርሖ ልኡኽ ብ15 ታሕሳስ 2014 ብዛዕባ'ቲ ካብ ዕለት ናብ ዕለት እናኸፍአ ዝኸይድ ዘሎ ፖለቲካዊ፡ ቍጠባውን ማሕበራውን ሃለዋት ህዝቢ ኤርትራ ምስ ቤት ጽሕፈት ሚኒስትሪ ወጻኢ ጕዳያት ዓባይ ብሪጣንያ ኣብ ለንደን ተራኺቡ።

ሓው ጐይትኦም መብራህቱ፡ ኣቦ መንበር ጨንፈር ሰዲህኤ ኣብ ዓባይ ብሪጣንያ ዝርከቦ ልኡኽ ሰዲህኤ፡ ንሓላፊ ጕዳያት ኤርትራ ኢትዮጵያን ኣብ'ቲ ሚኒስትሪ፡ ኣቶ ብረንደን ፊትስፓትሪክ ብምርካብ ጠንቅታት  ናይ'ቲ ኣብ ኤርትራ ዝርአ ዘሎ ፖለቲካዊ፡ ቍጠባዊ፡ ማሕበራዊ ቅልውላትን ዋሕዚ መንእሰያትን ንስደትን ሕማቕ ምሕደራ ዲክታቶርያዊ ስርዓት ኢሳያስ ምዃኑ ኣብሪሁ። ኣብ ርእስ'ዚ፡ ደረትን ፍትሕን ዘይብሉ መደብ ሃገራዊ ኣገልግሎት ንትጽቢታትን መጻኢ ዕድላትን መንእሰያት ዘጸልመተ ምዃኑ ኣስሚርሉ።

ልኡኽ ሰዲህኤ ናይ ስደተኛታት ጕዳይ ዶባት ብምዕጻውን ናብ ሃገሮም በስገዳድ ብምምላስን ከምዘይፍታሕን ሰዲህኤ፡ እቲ መሰረታዊ ፍታሕ ነቲ ሕማቕ ምሕደራ ምቕያር ምዃኑ እምነቱን ኣስሚርሉ። ኣብ ርእስ'ዚ፡ ንውሳኔታት ኮሚሽን ዶባት ኤርትራን ኢትዮጵያን ኣብ ግብሪ ምውዓል፡ ኣብ ሰሜን ኢትዮጵያን ኣብ ሱዳንን ዝርከቡ ስደተኛታት ሞያውን ኣካዳሚካውን ትምህርቲ ክቐስሙን ናይ ስራሕ ዕድላት ክውሃቦምን፡ ናይ'ቲ ዞና መንግስታት ብሓባር ንነጋዶ ደቂ ሰባት ክዋግኦኦም ከምዝግባእ ኣዘኻኺሩ።

እቲ ልኡኽ፡ ነቲ ኣብ ኤርትራ ዑደት ዘካይድ ዘሎ ልኡኽ ዓባይ ብሪጣንያ፡ ነቲ ብተጣበቕቲ ሰብኣዊ መሰላት፡ ብናይ ሕቡራት ሃገራት ተወካሊት፡ ወይዘሮ ሸይላ ኪትሁርስን ብባይቶ ሰብኣዊ መሰላት ሕቡራት ሃገራት ዝተሰነዱ ግህሰታት መሰላት ደቂ ሰባት ኣትኵሮ ክገብረሉ ተማሕጺኑ።

ርእሰ-ዓንቀጽ ሰደህኤ

እዚ ንርከበሉ ዘለና እዋን ብመንጽር ኤርትራዊ  ፖለቲካዊ ሃለዋት ኣዝዩ ኣጸጋምን፡ ካብዚ ጸገም ንምውጻኣ ናትና ጥራይ ዘይኮነስ ናይ ካለኦት ደለይቲ ጽቡቕና ኢድ እውን እንጽበየሉ መድርኽ እዩ። ምጽባይ ክበሃል እንከሎ  ናትካ ከይገበርካ ኢድካ ኣጣሚርካ ናይ ካልኦት ደገፍ እተቋምተሉ ዘይኮነስ፡ ነቲ ናትና ብጽሒት እንዳፈጸምና ናይ ካለኦት መራጐዲ ኣስተዋጸኦ እንሓተሉ እዩ። ምኽንያቱ እቲ ወሳኒ ናትናን ናይ ህዝብናን ዝተወሃሃደ ድፍኢት ስለ ዝኾነ። እዞም ክልተ ተግባራት፡ ኣብ ኢድካ ብዘሎ ወሳኒ ዓቕሚ ምጥቃምን፡ ናይ ካለኦት ኣካላት ተደራቢ ዓቕሚ ክትረክብ ምምሕጻንን፡ ዝተነጻጸሉን እቲ ሓደ ምስ ተተግበረ እቲ ሓደ ዝስዕብን ዘይኮኑስ ኣብ ሓደ መስርሕ እንዳተመላልኡ ኣብ ዓወት ዝበጽሑ እዮም።

ሰልፊ ደሞክራሲ ህዝቢ ኤርትራ ነዚ ብምርዳእ ከምቲ ልሙድ ብፍላይ ድማ ኣብዚ እዋንዚ ብጻዕቂ ይስርሓሉ ኣሎ። ኣብዚ ዝሓለፈ ሒደት መዓልልታት’ኳ፡ ኣብ ዞባ ሰሜን ኣሜሪካ፡ ኣብ ዞባ ኤውሮጳ፡ ኣብ ኣወስትራሊያን ኢትዮጵያን ዘካየዶም ዝያዳ ናብ ሰልፋዊ ጉዳያት ዘድሃቡ ናይ ኣባላት ኣኼባታት ናይዚ ኣብነት እዮም። ብዘይካዚ ኣቦመንበር ሰልፊ ኣብ 23 ሕዳር 2014 ዘካየዶ ናይ ኩሎም ኣባላት ሰፊሕ ኣብ ህልዊ ኩነታት ሃገርን ሰልፍን ዘድሃበ ኣኼባ ካልእ ናይቲ እዋናዊ ወፍሪ ኣካል እዩ። ኣቦመንበር ሰልፊ ኣቶ መንግስተኣብ ኣስመሮም ኣብ ዓባይ ብሪታንያ ዘሰላስሎ ዑደትን ምስ ዝተፈላለየ ፖለቲካዊ ኣረኣእያ ዘሎም ግና ድማ ኤርትራዊ ተገዳስነቶምን ሻቕለቶምን ሓደ ዝገብሮም ኤርትራውያን ዘካየዶ ኣኼባ ከዓ ነብሱ ዝኸኣለ ርኢቶኻ ናይ ምስራጽ ስራሕ እዩ። እዚ ሓደ መርኣያ ናይቲ ጉዳይ ኤርትራ ብቐዳምነት ንኤርትራውያን ዝምልከቶም ምዃኑ እዩ። ኣብ ከምዚ ውስጠ-ሰልፋውን ህዝባውን ኣኼባታት ቆላሕታ ዝወሃቦም ዛዕባታት፡ ኣብ ኤርትራ ዘሎ ኣሻቓሊ ኩነታት ንኹሉ ንጹር’ኳ እንተኾነ ከም መእተዊ ምስ ዳህሲስካ፡ ናይቲ ሰልፊ ርኢቶ ብዛዕባ ኣወዳድቓ ዲክታተርያዊ ጉጅለ ህግደፍን ወሳኒ ግደ ህዝቢ ኤርትራን፡ ኩነታት ደንበ ተቓውሞን ናብ ሓደ ናይ ቃልሲ መኣዲ ኣመጻጽእኡን፡ ዝምድናታት ኤርትራዊ ሓይሊ ተቓውሞ ምስ ሕብረተሰብ ዓለምን ጐረባብትን እቶም ቀንድታት ከም ዝኾኑ ፍሉጥ እዩ።

ኣብ ከምዚ መድረኽ ብሓፈሻ፡ ብፍላይ ከዓ ኣብቲ ህዝባዊ ኣኼባታት፡ ዕላማ ናይቲ ርክባት ሒዝካዮ ዝቐረብካ ርኢቶ ተሳተፍቲ ከም ዝቕበሉልካ ምግባር ጥራይ ኣይኮነን። ማዕረማዕረ እዚ ካብ ተሳተፍቲ ዝወሃብ ኣውንታዊ ይኹን ኣሉታዊ ርኢቶ ንምቕባል እውን እዩ። መጻኢ ፖለቲካዊ መደባትካ ብምሉኡ’ኳ እንተዘይኮነ፡ ዝበዘሓ ካብ ህዝቢ ኤርትራ ዝቕበሎ ክትገብሮ እትኽእል ከዓ ካብ ከምዚ ዓይነት ኣጋጣምታት ብዝእከብ ሃናጺ ሓሳባት ክህብትም እንከሎ እዩ። ከምቲ “ክቕየር እንከለኹ ዝቕየር፡ ርእሰይ እንቕንቕ እንከለኹ ርእሱ ዝንቕንቕ ዓርኪ ኣይደልን እየ፡ ምኽንያቱ ነዝስ ጽላለተይ እውን ብዝሓሸ መንገዲ ክፍጽመለይ ስለ ዝኽእል” ዝበሃል ናይ ነኣድትኻ ጥራይ ዘይኮነስ ዝያዳ እትመሃረሉ ናይ ነቐፍትኻ ሓሳብ እውን ካብዚ እዩ ዝርከብ። እዚ መስርሓ ኣብ ሰባት ናይ  ኣተሓሳስባ ለውጢ ናይ ምስራጽ ጉዳይ ስለ ዝኾነ፡ ነዊሕ ግዜን ከቢድ ድኻምን ዝሓትት እምበር፡ ኣብ ሓደ ክልተ ኣኼባታ ጻማ ድኻምካ ትሓፍሰሉ ኣይኮነን። ስንኻ ነኺስካ እንተቐጺልካዮ ግና ከምቲ ብቐጻሊ እትነጥብ ማይ ከውሒ እትሰብር፡ ጻዕርኻ ከም ዘድምዕ ትስፉው ኮይንካ ምቕጻሉ መሰረታዊ ጉዳይ እዩ። ሰደህኤ፡ ኣብ ዝመረጾ ኣገባብ ቃልስን ሕቶ ሓድነት ፖለቲካዊ ሓይልታት ተቓውሞን  ርኢቶኡ ኣብ ግደ ሲቪካዊ ማሕበራትን ኣብ ለውጥን፡ ዘተባብዕ ግንዛበ ይምዝገብ ምህላዉ ከዓ ሓደ ተስፋ ካብ ዝህቡ ምዕባለታት እዩ።  ምእንቲ እዚ እዩ ከዓ ሰደህኤ ዓቕሙ ክሳብ ዘይገደቦ ምስ ዝተፈላለዩ ኤርትራውያን ኣካላት ዝገብሮ ርክብ ከም ቀንዲ ዓማሙ ዝሕዞ።

ኣይኮነንዶ ኣብዚ ዘመነ ዓለም ለኻውነት ቀደም እንተኾነ እውን ከምዚ ናትና ሃገርን ህዝብን ናይ ምድሓን ቃልሲ ምስ ካለኦት ሓይይልታት እንዳተደጋገፍካን ኢድ ከይተኣታተኻን እምበር ገዛኻ ዓጺኻ በይንኻ ዝዕመም ከም ዘይኮነ ሰልፊ ደሞክራሲ ህዝቢ ኤርትራ ይኣምን’ዩ። ግጉይነት ናይ ዕጹው ገዛ ፖሊሲ ዝምድና ከዓ፡ ናብ ርሑቕ ከይከድና ካብ ተመኩሮ ጉጅለ ህግደፍ እንመሃሮ እዩ። ካብዚ ብምንቃል እዩ ድማ ሰደህኤ ኣብ ብዙሕ ዓለም ለኻዊውን ዞባውን መድረኻት ከከም ኩነታቱ ብኣካልን ብኻልእ መንገድን ዝሳተፍን ናይ ህዝብና ሕሰም ገሊጹ ምድግጋፍት ዝሓትትን። ኣብቲ ዝገብሮ ተሳትፎ ዝተፈላለዩ ኣካላት ከከምቲ ዝተሰለፍሉ ዕላማታት፡ ኣብ መዳይ ደሞክራሲ፡ ሰብእዊ መሰልን ጉዳይ ስደተኛታትን እጃሞም ከበርክቱ’ዩ ዝምሕጸን። ዝሓለፈ ጻዕርታት ናይዚ ሰልፊ ኣብ ቦታኡ ኮይኑ፡ ኣብዚ ዝሓለፈ ሰሙን ኣብ ከተማ ጆሃንስበርግ ኣብ ዝተኻየደ 15 ሃገራት ናይ ዝውክል ደቡብ ኣፍሪቃዊ ናይ ዕቤት ኮሙኒቲ ዝተባህለ ሲቪላዊ ማሕበር ኣብ ዘዳልዎ ዓውደ መጽናዕቲ፡ ኣካል ኤርትራዊ ልኡኽ ኮይኑ ዝገበሮ ተሳትፎ ፍሉይ ግምት ዝወሃቦ እዩ።

እዚ ተሳትፎ ፍሉይ ዝኾነሉ ምኽንያት ብክልተ መንጽር ምርኣዩ ይከኣል። በቲ ሓደ ወገን ደንበ ተቓውሞና፡ ኣፍሪቃዊ ክንሱ ተፈላጥነቱ ኣብ ኣፍሪቃ ኣዝዩ ድሩት ኮይኑ ድሕሪ ምጽንሑ በዚ ሰፊሕ ኣፍሪቃዊ ጽልዋ ዘለዎ ማሕበር ክፍለጥን ክዕደምን ምኽኣሉ እዩ። ከምቲ ዘይንስሕቶ ካብ ዕማማት ሕብረት ኣፍሪቃ ሓደ ናይዛ ኣህጉር ሰላምን ቅሳነትን ምርግጋጽ እዩ። ናይ ኤርትራ ጉዳይ ዘይሓወሰ ኣፍሪቃዊ ናይ ሰላም ኣጀንዳ ምሉእ ከም ዘይከውን እትገልጸሉ መድረኽ ምርካብ እምበኣር ኣዝዩ ኣገዳሲ እዩ። እቲ ካልእ ፍሉይነቱ ኣብዚ ኣብ ደንበ ተቓውሞ ኤርትራ እሂንምሂንን ንኤርትራዊ ረብሓ ሓቢርካ ምውፋር ዝጠፈኣሉን ናይ ምምንጫት ህሞት፡ ዝተፈላለዩ ኤርትራውያን ውድባት፡ ማሕበራትን ንጡፋት ውልቀ ሰባትን ነናይ ትካሎም ዝለዓለ  እምነት 2ይ ደርጃ ኣትሒዞም፡ ብደረጃ ኤርትራዊ ልኡኽ  ምእንቲ ለውጢ፡ ሰላምን ሰብኣዊ መሰልን ኤርትራውያን ብሓደ ቃል ክዛረቡ ምኽኣሎም ኣዝዩ ዘሕጉስን መጻኢ ብሩህ ተስፋ ዘመልክትን ምዃኑ እዩ።

እቲ ኣብ ኣፍሪቃዊ መድረኽ በዂሩ ዝጸንሐ ደንበ ተቓውሞ ብኣፍሪቃዊ ማሕበራትን ውድባትን ዘይፍለጥ ምዃኑ ጥራይ ዘይኮነ፡ ምስ ኤርትራውያን ኣብ ደቡብ ኣፍሪቃ ሌላ ዘይምግባሩ እውን ካልእ ጸገም እዩ ነይሩ። እዚ ካብ ኣወሃሃዲ መድረኽ ንሃገራዊ ዘተ ኣንበሳድር ዓንደብርሃን ወልደጊዮርጊስ፡ ካብ ሰልፊ ደሞክራሲ ህዝቢ ኤርትራ ኣቶ ወልደየሱስ ዓማር፡  ካብ ኤርትራዊ ምንቅስቓስ ንዲሞክራስን ሰብኣዊ መሰላትን ኣቶ ኩሉብርሃን ኣብርሃም፣ ከምኡ’ው ወይዘሮ ሳልዋ ኑር ኤርትራዊ ተሓላቒት ሰብኣዊ መሰል ኣብ ሃገራት ወሽመጥ ዝቖመ ልኡኽ፡ ምስ ኤርትራውያን ነባሮ ፕሪቶርያን ደርባንን ኣኼባ ምክያዱ ካልእ መግለጺ ዓወት ናይቲ መገሻ እዩ ነይሩ። እዚ ክበሃል እንከሎ ግና ኣብዚ ከባቢ መንገዲ ተኸፊቱ እምበር እቲ ዝድለ ሸቶ ተመዝጊቡ ማለት ኣይኮነን። ኣብቲ ዝድለ ንምብጻሑስ እቲ ዝኸበደ እቲ ተሪፉ ዘሎ እዩ። እዚ ተበግሶ እዚ ካብ ተመኩሮ ብሩሰልስ ተማሂርካ፡ ብዓይኒ ሓልዮት እንተተራእዩ መኽሰቡ ንኹሉ ኣብ ደንበ ተቓውሞ ዘሎ ደላይ ለውጢ ምዃኑ ጌርካ ክውሰድ ዝግበኦ እዩ። ሓቢርካ ምውፋር ክሳብ ክንደይ ከም ዘዕውት ድማ ከም ኣብነት ክውሰድ ይግበኦ። “እሞ ኣብ ደነበ ተቓውሞና ከምዚ ዓይነት ረዚን ልቦና ኣሎዶ?” ንዝብል ሕቶ ግና ኣፍካ መሊእካ ናይ “ኣወ” መልሲ ክትህቦ ኣጸጋሚ እዩ። እንተኾነ እዚ ጸገም ኣይኮነን ሎሚ እንተዘየለ ጽባሕ ብቓልሲ ክፍጠር ናይ ግድን ስለ ዝኾነ።  እዚ  ልኡኽ ኣብቲ ዝተሳተፈሉ መድረኽ ብዘቕረቦ “1፡ መንግስቲ ደቡብ ኣፍሪቃ፡ ንኤርትራውያን ስደተኛታት ፖለቲካዊ ዑቝባን ኣብ ደቡብ ኣፍሪቃ ብሰላም ክነብሩን ኣብ ማሕበረ-ቍጠባዊ ምዕባለ ናይ'ታ ሃገር ክሳተፉ ዘኽእሎም ዘድሊ ሕጋዊ ሰነዳትን ክህቦም፤ 2፡ ናይ ደቡብ ኣፍሪቃ ሲቪላውያን ማሕበራት ንቃልስታት ህዝቢ ኤርትራ ምእንቲ ዲሞክራሲ፡ ሰብኣዊ ክብርን ፍትሕን ዝገብርዎ ደገፍ ክብ ከብሉ፤ 3፡ ሕብረት ኣፍሪቃ ብመሰረት ቅዋሙ ናይ ኣሳላጢነት እጃሙ ክጻወት፤ 4፡ ጐረባብቲ ኤርትራን ሃገራት ቀርኒ ኣፍሪቃን ብመሰረት ኣህጕራዊ ውዕላትን ንመሰላትን ድሕነትን ናይ ኤርትራውያን ስደተኛታት ከሕልዋን ንጽውዕ።” ዝብል መልእኽቲ ዕላማ ተሳትፈኡ ክሳብ ክንደይ ጸቢብ ውድባዊ ወይ ማሕበራዊ ዘይኮነስ ኤርትራዊ ምንባሩ ኣነጺሩ እዩ።

ሰልፊ ደሞክራሲ ህዝቢ ኤርትራ፡ መንገዲ ዓወት በይንኻ ዝግበር ወፍሪ ዘይኮነስ ኣብ ንጹር መጽናዕትን ፍልልያት  ብግቡእ ኣብ ዝተመሓደረሉ ባይታን ሓቢርካ ብምስራሕ ምዃኑ ካብ ቀድሙ ስለ ዝርዳእ፡ ንመጻኢ ኣውን ንጹር ቅሩብነትን ትብዓትን ምስ ዘለዎም ኤርትራዊ ናይ ለውጢ ኣካላት ንምስራሕ ኣፍደግኡ ክፉት ምዃኑ በዚ ኣጋጣሚ የረጋግጽ።

15 ታሕሳስ 2014

ኣቦ መንበር ሰልፊ ዲሞክራሲ ህዝቢ ኤርትራ፡ ሓው መንግስተኣብ ኣስመሮም፡ ነቲ ኣብ  ሎንዶን ምስ ህዝቢን ማሕበራትን ኣገደስቲ ባእታታትን ብጉዳይ ሃገር ዝገብሮ ዘሎ ርኽኽባት ብምቕጻል፡ ትማሊ ቀዳም 13 ታሕሳስ 2014 ውን ኣብ በርሚንግሃም ብርክት ዝበሉ ብጉዳይ ሃገሮምን ህዝቦምን ዝግደሱ ኤርትራውያን ዝተረኽብዎ ብዓይነቱ ኣገዳሲ ዝኾነ ህዝባዊ ኣኼባ ኣካይዱ።  ኣብዚ ኣኼባዚ፡ ክልተ ኣባላት መሪሕነት ሰልፊን ካብ ሎንዶን ዝመጹ ኣባላት ጨንፈርን  ተረኺቦም ኔሮም።

ሓው ሓምድ ድራር፡ ኣባል ፈጻሚት ሽማግለ ሰልፊ ንኣኼበኛታት እንቋዕ ደሓን መጻእኩም ድሕሪ ምባል፡ በቲ ዝነበረ ሕማቕ ኩነታት ኣየር ከይተዓንቀፉ ዕድመ ሰልፊ ኣኽቢሮም ካብ ርሑቕን ቀረባን ብምምጽኦም ድማ፡ ልባዊ ምስጋና ኣቕሪቡ።

ካብዚ ብምቕጻል፡ ኣቦ መንበር ሰልፊ ሓው መንግስተኣብ ኣስመሮም፡ሃገርና ኣብ ትሕቲ ምልካዊ ስርዓት እትሓልፎ ዘላ ኩነታትን፡ ኩነታት ተቓዉሞ ደምበን ኣህጉራዊ ኩነታትን ብሰፊሑ ብክልቲኡ ቋንቋታት፡ ትግርኛን ዓረብኛን መግለጺ ኣቕሪቡ።ብተወሳኺ ሰልፊ ዲሞክራሲ ህዝቢ ኤርትራ ኣብ ህዝባዊን ዜናውን ዲፕሎማስያውን መዳያት ዘካይዶ ዘሎ ንጥፈታትን፡ ንሓድነት ደምበ ተቓውሞ ሰልፊ እናካየዶ ዝጸንሐ ጻዕሪታት ብዝርዝር ንኣኼብኛታት ገሊጹ።

ተቓዉሞ ደምበ ፡ብክንዲቲ ኩነታት ሃገርና ዝጠልቦ ደረጃ ሓላፍነት ክሰርሕ በቒዑ ከምዘየለን  በዚ ሎሚ ዘለዎ፡ ዝተበታተነ ሃለዋት ከድምዕ ከምዘይክእልን ኣረዲኡ። ኩሎም ሓይሊታት ተቓዉሞ፡ ናይ ቀረባ ዕላምኦም ንዲክታቶርያዊ ስርዓት ምልጋስ ምዃኑ ተረዲኦም፡ ኣብ ክሊዚ ዕላማዚ ሓቢሮም ክሰርሑ ሓላፍነት ክስምዖም ከምዝግባእ ኣረዲኡ።

ድሕሪ ብሓው መንግስተኣብ ዝተዋህበ መግለጺ፡ ኣኺበኛታት ጠቓሚ ርእይቶታትን፡ ናብ ደምበ ተቓውሞ ብሓፈሻ፡ ናብ ሰልፊ ደሞክራሲ ድማ ብፍላይ ዘነጻጸረ ሃናጺ ነቐፌታታት ኣቕሪቦም።

ካብ ኣኼበኛታት ንዝቐረበ ሕቶታት፡ ብኣቦ መንበር ሰልፍን ኣብኡ ብዝነበሩ ኣባላት መሪሕነትን ዝግባእ መልሲ ተዋሂብዎ። ነቲ  ሓደ-ሓደ እዋን ዘይትርጉሙ ዝወሃቦ፡ ሰልፊ ዲሞክራሲ መሪጽዎ ዘሎ ሰላማዊ ዲሞክራስያዊ ቃልሲ፡ ስለምንታይ ሰልፊ ከም ቅኑዕ ኣገባብ ቃልሲ ከም ዝኽተሎ ሰፊሕ መግለጺ ተዋሂቡ።

ካብ ተሳተፍቲ ኣኼባ፡ ሰልፊ ዝገብሮ ምንቅስቓሳት ንዝናን ሽምን ኢሉ ከምዝገብሮ፡ ኣብ ህዝቢ ቦታ ከምዘይብሉ፡ ናብ መንእሰያት ክወርድ ከምዘይከኣለ ርእይቶ ቀሪቡ፡ ነዚ መብርሂ ክወሃብ ከሎ፡

ሰልፊ ኣብ ዲፕሎማስያውን ዜናውን ስራሓት ዘካይዶ ንጥፈታትን፡ ከም መኽሰብ መላእ ተቓዉሞ ደምበ ተቖጺሩ ክኽበርን ክሙጎስን ዘለዎ፡ ካልኦት ድማ  ኣብ ርእሲኡ ክውስኽሉ ከሀብትምዎን ዝግባእ  ድኣምበር ፡ ነዚ ሃገራዊ ስራሕዚ ከም ንዝናን ንምሽማው ስልጣንን ተባሂሉ ዝግበር ዘሎ ጌርካ ምቑጻር ግጉይ ምዃኑ ተገሊጹ።

እቲ ህዝቢ ኣብ መላእ ተቓዉሞ ደምበ ኣብ ምዕሳል ዘሎ ጸገም ኣብ ሰልፊ ዲሞክራሲ ህዝቢ ኤርትራ ውን ህሉው ኢዩ። እንተኾነ ግን ሰድህኤL ቃልሲ ብዘይ ተሳትፎ ህዝቢ ክዕወት ኣይክእልን ኢዩ ካብ ዝብል ጽኑዕ እምነት ብምንቃል፡ ናብ ህዝቢ ከብጽሖ ብዝኽእል ፖሊሲ ተመሪሑ ይኸይድ ኣሎ። ብእንሕዞ ሃገራዊ መርገጻትን እንኽተሎ ፖሊስን ዝሓሸ ህዝባዊ ቦታ ከምዘሎና ንኣምን ኢና። ነዚ ኩሉ ዝገጥመና ተጻብኦታት፡ ብዘሎና ህዝባዊ ቦታ ጥራይ ኢና በዲህናዮ ንኸይድ ዘሎና ተባሂሉ።

ሰልፊ ዲሞክራሲ ህዝቢ ኤርትራ ምስ መንእሰያት ክሰርሕ ንዘለዎ ድሌት ኮንፈረንሳት ፕሪቶርያን ቦለኛን እኹላት መረዳእታ ኢየን።

ኣኼባ በርሚንግሃም፡ ሓላፍነት ዝመልኦ ኣኼባ፡ ካብ ተሳተፍቲ  ድማ ኣብ ስራሕና ሓጋዝን ጠቓምን ሓሳባት ዝረኸብናሉ ኢዩ ኔሩ። በዚ ኣጋጣሚ ድማ ንኹሎም ተሳተፍቲ ኣኼባ ነመስግኖም። ንተቓለስቲ ኑሪ ዓብደላን ስዒድ ዓብደልሃዲን ንኹሉ ዝገበሩልና እንግዶት ብልቢ ነመስግኖም።

ሰልፊ ደሞክራሲ ህዝቢ ኤርትራ

ጨንፈር ዓባይ ብሪጣንያ

14 ታሕሳስ 2014

ሰልፊ ዲሞክራሲ ህዝቢ ኤርትራ ዞባ ኣውሮጳ ምስ ንኡስ ዞባን ጨናፍርን ዝሓወሰ፡ብዕለት 12-12-2014 ካብ ሰዓት 20.00 ክሳብ ስዓት 23.30 ብኣቈጻጽራ በርሊን ኣብ ዝተዳለው ኣጀንዳታት ዘትኰረ ልዙብ ውጽኢታውን ኣኼባ ኣካይዱ።

ኣቦ መንበር ዞባ ኣውሮጳ፡ ሓው ብርሃነ ገብረክርስቶስ፡ ሕውነታዊ ሰላምታ ድሕሪ ምቕራብ፡ እዚ ኣኼባ'ዚ ኣብ'ዚ ዓመት 2014 ናይ መጨረሻ ኣኼባ ስለዝዀነ፡  ነዚ ኣጋጣሚ'ዚ ተጠቒመ ንኣመንቲ ክርስትና፡ ርሑስ በዓል ልደት፣ ንኹሉኹም ኣባካት ክኣ፡ ኣብ ሃገርና እነብዕሎ ክዀነልና እምነ ብዝብል ቃል ኢዩ ከፊትዎ።

ሓው ብርሃነ ዘረብኡ ኣስዒቡ፣ ናይ ሎሚ ኣኼባና ናይ 2014 ሓበራዊ ዘካየድናዮ ስርሓት ሓጺር ገምጋም ምቕራብን ብፍላይ ክኣ እቶም ንስራሕና ዓንቂፎም ሒዞም ዝጸንሑ ብምልላይ ን2015 ከነማልኦም ዘለና መርሆ-ስራሕን  ዕማም-ሓይሊ-ዕዮን ኣውጺእና ንስራሕ እንብገሰሉ ኣኼባ ምዃኑ እዩ ክብል ገሊጽዎ። ቀጺሉ ድማ፡ ነዚ ዝስዕብ ናይ ኣኼባ ኣጀንዳታት ኣቕሪቡ።

1-      ሓጺር ህሉው ኩነታት ህዝብና ሃገርናን ኣብ ውሽጥን ኣብ ወጻእን፤

2-     ሓጺር መግለጺ ብዛዕባ ንጥፍታት ሰልፍና ብፍላይ ከኣ፡ ኣብዚ እዋን ዝካየድ ዘሎ ሓባራዊ ጕዕዞ ጉዕዞ ደምበ ፍትሕን ዲሞክራስን፤

3-     ጸብጻብ ስራሓት 2014 ዓ.ም፣ ከምኡ'ውን፡ ናይ 2015 መደብ ስርሓት።

 ብሰንኪብልሽው ምሕደራን ውልቃዊ ምልኪ ስርዓተ ኢሳያስን፡ ህዝብና ዘሕልፎ ዘሎ ምረትን ስቓይን ጸልማት ናብራን ንኹላትና ብሩህ እዩ። ይኹን እምበር ክምስርዓት ኣብ ውሽጡ በዅቢኹ፡ ትልኽ ዝብለሉ ዘሎ እዋን ኮይኑ፣ ብወገና ከምሰልፊ ብፍላይ፡ ከምደምበ ፍትሕን ዲሞክራሲን ድማ ብሓፈሻ፡ ሓባራዊ ስራሕን ምትእምማንን ዘንጸፈ ምቅርራብን  ሓበራዊ ጽላልን ክህሉ ምጽዓር መድረኽ ዝዕድሞ ዘሎ ጕዳይ ኢዩ።

ሰልፍና ብሓፈሻ፡ ኣብ ዲፕሎማስያዊ ዕማማት ዝያዳ ክነጥፍ ዝጸንሐን ዘሎን ምዃኑ ክላትና እንግንዘቦ ዘሎና ጕዳይ እኳ እንተኾነ፣ ብፍላይ ኣብ'ዚ እዋን'ዚ ኣቦ መንበር ሰልፍና ምስ ሓው ሓምድ ድራር ኣብ ዓባይ ብሪጣንያ  ዑደት የካይዱ ኣለዉ። ከምኡ'ውን፡ ሓው ወልደሱስ ዓማር፡ ሓላፊ ወጻኢ ጉዳያት ሰዲህኤ ምስ ኣምባሳደር ዓንደብርሃን ወልደገርጊስን ሳልዋ ኑርን ኩሉብርሃን ኣብርሃምን ኰይኖም ኣብ ደቡብ ኣፍሪካ ዘካይድዎ ዘለዉ ዑደት ኣመልኪቱ ኣብ ሓርነት ኦርግ ሰፊሕ ሪፖርታጅ ቀሪቡ ኣሎ።

ኣብ ውሽጣዊ ጉዳያትና፡ ሰ.ዲ.ህ.ኤ. ኵሉ ጊዜ  ለውጢን ስራሕና እነመሓየሽሉ ኣጋባብ ንምትእትታውን ካብ ዘለዎ ቍሩብነት ተበጊሱ፡ ኣብያተ-ጽሕፈታት ፈጻሚ ሽማግለ ብጥምሮ ዘሰርሓሉ ኣገባባት ኣታኣታትዩ ኣሎ።  እዚ ኣሳራርሓ እዚ፡ ተዋሃሂድካን ተሓጋጊዝካን ኣብ ምስራሕ ዝብሉ ዕላማታት ዝተሰረተ ስለዝዀነ፡ ውጽኢታቱ ውን ኣወንታዊ ምዃኑ ድሮ ኣብ'ቲ እነካይዶ ዘለና ስርሓት እንድህስሶ ዘለና ሓቂ ኢዩ። ብዝዓበየ ኽኣ ጉባኤታትናን ፈስቲቫላትናን ኣብ ኩሉ መዳያቱ ንምዕዋት ተዋሃሂድና ክንሰርሕን ክንተሓጋገዝን ኣድላዪነቱ ምዃና ተስፋይ ወሰን የብሊን ኢሉ።

ሓው ብርሃነ፡ ብዛዕባ ጸብጻባት ስራሕና ብዝምልከት፡ ዋላ እኳ ዝንኣድ ስርሓት ይካየድ እምበር፡ ኣብ ጉዕዞና ዝረኸብናዮም ዱንኩላት ወይ ዕንቅፋታት እዉን ውሑዳት ኣይነበሩን  ብምባል ድሕሪ ምባል፡ መፍትሒታት ይዀኑ ኢዮም ዝብሎም ነጥብታት ብምቕራብ መግለጹ ኡ ዛዚሙ።

ንኣገዳስነት ናይ ምውህሃድን ምትሕግጋዝን ንምብራህ ድማ ከም ካብ ንህብን ጻጸን ዓቢ ትምህርቲ ክቕሰም ከምዝከኣል ኣብሪሁ። ኣናህብ ቆፍኦም ንሹምን ማለት ንግስትን ሓለውታን ሓዲጎም ይወፍሩ ወይ ይዕንዝሩ። ካብ ዝወፈርዎ ርሑቑን ቀረባን ቦታታት ንምዓር ዝኸዉን ፍረ ሒዞም ይመጽኡ፡ ብኸምዚ ኣጋባብ ክኣ መዓር የፍሪዩ። ጻጸ ድማ፡ ተሓባቢሮምን ተዋሃሂዶምን ብምስራሕ በበይኖም ክገብርዎ ዘይክእሉ ነገራት ብምግባር ማሕበራዊ ህይወቶም የሰላስሉ። ንሕና እውን ንዕላማታት ሰልፍና ንምዕዋት ከምንህቢ ምስ ኣባላትና፡ ዜጋታትና፡ ደገፍቲ ሰልፍና፡ ኣዕሩኽን ፈተውቲ ቃልስናን ዝዀኑ ትካላትን መንግስታትን ወፊርና ፖለቲካዊ፡ ቍጠባውን ካልእ ዓይነት ደገፋትን ክንረክብ ከምንህቢ ክንጽዕር ኣሎና። ነዚ ኣብ ግብሪ ንምትርጓም ጽጹይ መምርሒታትን  ልክዕ ከም ንህብን ጻጸን ናይ ስራሕ ምቅሊትካ ወሲድካ እናተዋሃሃድካን ተሓጋገዝካን ምስራሕ ከምዝግባእ እምነተይን ተስፋይን ኢዩ ብምባል ዘረባኡ ደምዲሙ።

ብድሕር'ዚ፡ ብወገን ሓለፍቲ ንኡስ ዞባን ጨናፍርን ሃነጽቲ ዝዀኑ ንናይ ዕዮ መርሆታት፡ ክቘሙ ዘለዎምን ሓይሊ ዕማማት፡ ፈስቲቫላትን ጕባኤታትን ዝምልከቱ ርእይቶታን ለበዋታትን ቀሪቦም።   ሓው ብርሃነ ኣብ ምዕጻው ኣኼባ ጹማቕ ውጽኢት ናይ'ቲ ኣኼባ ብምግላጽ፡ ናብ መሪሕነት ከምሓላልፎ ምዃኑ ብምሕባር ንተሳተፍቲ ኣኼባ ኣመስጊኑ ዛዚምዎ።

ብሓላፊ ዜናን -ባህልን ዞባ ኤውሮጳ

 ፍትዊ ክፍለ