http://ascenteq.com/project/epdp

ዝኸበርኩም ዝኸበርክንን ሓርበኛታት ኤርትራውያን ተሳተፍቲ ሰላማዊ ሰልፊ ስቶኮሆልም
ዕዙዝ ሃገራዊ ሰላምታና ይብጻሕኩም።

ሎሚ ዕለት 01/ ነሓሰ/ 2015 ብደለይቲ ፍትሒ ሰላማዊ ሰልፊ ንምክያድ ኣብ ከተማ ስቶኮሆልም ተኣኻኪብና ኣለና።

ሰላማዊ ሰልፍና ከም ወትሩ ብሽዊደናዊ ኤርትራዊ ጽላል ንደምክራስያዊ ምዕባለ (ሰሳዱ) ዝተወደበ እዩ። ሰሳዱ ነዚ ሰላማዊ ሰልፊ ንምክያድ ኣብ ናይ ኣፈጻጽማ ኣገባቡ ንምውህሃድ ሽማግለ መዚዙ። ሰሳዱ ንፖለቲካዊ ውድባትን ሲቪላዊ ማሕበራትን ዝጥርንፍ ጽላል ምዃኑ ምጥቃሱ ኣገዳሲ እዩ።  ስለዚ ሰላማዊ ሰልፍና ንምድማቕን ንምዕዋትን፦ ንኩሉ  ማሕበራት ኣባል ጽላል ሰሳዱ፣ ንኣወሃሃድቱን፣ ግዜኹምን ጉልቡትኩምን ገንዘብኩምን ወፊኹም ካብ ቐረባን ርሑቕን ንዝመጻእኩም ተሳተፍቲ ሰላማዊ ሰልፊ፣  ንኩሉ‘ቲ ዘበርከትኩሞ ሃገራዊ ኣስተዋጽኦ፣ ብስም ኣዳላዊት ሽማግለ ዕዙዝ ምስጋናና ብምቕራብ፡ እንቛዕ ደሓን መጻእኩም ንብል። ንቕዱስ ተበግሶኹምን ዘርኣኹምዎ ጻዕርን ከኣ ኣኽብሮትና እናገለጽና፣ ከነመስግነኩም  ሓበን ይስምዓና።

ናይ ሎሚ ዓመት ሰላማዊ ሰልፍና ካብ ዝሓለፉ ግዜ ዝፈልዮን ዝያዳ ዕዙዝ ዝገብሮን፣ ድሕሪ‘ቲ ኣብ ጀነቫ ዝተጋበአ ኣኼባ ቤት ምኽሪ ሰብኣዊ መሰላት ሕቡራት ሃገራት፡ ንዘይሕጋዊ ስርዓት ኤርትራን ደገፍቱን ዘቃለዐ ዓቢ ሰለማዊ ሰልፊ፡ ይካየድ ብምህላዉ፣ ፍሉይ ክብደት ይህቦ።  እዚ ተራእዩ  ዘሎ ምቹእ ኣህጉራዊ ምዕባሌ፣ ንመንፈስን ሞራልን ቓልሲ ደለይቲ ፍትሒ ዝድርዕ እዩ። ይኹን’ምበር ኪንዮው ኣህጉራዊ ምዕባሌ ክንስጉም፣ ወይ ብማዕሪኡ ክንከይድ ዕዮ ገዛና ብቕኑዕ ኣገባብ ክንፍጽም ዝያዳ ሓላፍነት ዘሰክመና መድረኽ ተጋሂዱ ኣሎ። እዚ ሓዲሽ ኩነታት ኩልና ብግቡእ ከም እንግንዘቦ ጥርጣሬ የልብልናን። ግን’ከ ኣብ ሰፊሕ ዝርዝር ከይኣተና ኣብቶም ኣገደስቲ ነጥብታት ብሓጺሩ ንምግላጽ ከኣ ኣገዳስነት ዘለዎ ኮይኑ ይስመዓና፡-   

ክቡራት መራሕቲ ሃይማኖታት!!
ክቡራትን ኩቡራንን ተሳተፍቲ!!

ዘይሕጋዊ ስርዓት ህግደፍ፣ ንልዕልና ሕጊ ረጊጹ: ኩሉ ሰብኣውን ደሞክራስያውን መሰላት ዜጋታት ይግህስ ኣሎ። ህዝብና: ዋላ እቲ ዝሰርሕ ዝረኽቦ ትሑት ደሞዝ: ምስ ናይ ናብራ ክብሪ ስለ ዘይመጣጠን፣ ናይ ማይን መብራህትን ጸገማት ደሚርካ፣ ኣብ መዓልታዊ ናብርኡ ኣጋጢሙዎ ዘሎ ጸገም ሕልና ንዘለዎ ሰብ ዝተሰወረ ኣይኮነን። ህግደፍ ስልጣኑ ንምንዋሕ ንዜጋታት ናይ ምንቕስቓስን ናይ ምዝራብ ናጽነቶምን ገፊፉ፣ ብጸጥታዊ ኣገባብ ርእሶም ኣድኒኖም ከምዝኸዱ ይገብር ኣሎ። መንእሰያት ይኹኑ ትሕቲ ዕድመ ከይተረፉ ናይ መጻኢ ብሩህ ዕድል ስለዘየርኣዮም ናብ ስደት የምርሑ ኣለዉ። ኣብ ጉዕዞ ስደት ዘጋጥም ዘሎ ጃምላዊ ህልቒትን ዘይሰብኣዊ ተግባርን፣ ይትረፍ ንኤርትራውያን ንኩሉ ዓለም ግሉጽ ስለዝኾነ በተን ዓበይቲ ማዕከናት ዜና ይዝረበሉ ኣሎ። ጠንቒ ናይ‘ዚ ኩሉ ሽግር ስርዓት ህግደፍን እዮ። ሕጋዊ ተሓታትነቱ ከኣ ክስከሙ ከምዝግባእ ዘከራኽር ኣርእስቲ ኣይኮነን። ናይ ግዜ ጉዳይ ጥራሕ እዩ።

ስርዓት ኤርትራ ስልጣኑ ንምንዋሕ ነቲ ባዕሉ ዝፈጠሮ ጸገም ንምሽፋን፣ ብኣመሪካን መሻርኽታን ዝብለን ሃገራትን ዝተኣልመ ውዲት እዩ ብምባል ክውንጅለን ይፍትን ምህላዉ ኩላህና ንከታተሎ ዘሎና ጉዳይ ኢዩ። ንኹሉ ውሽጣዊ ጸገማቱ ከኣ ምስ ውሳኔ ዶብ የትኣሳስሮ። ብጸቢብ ኣትሓሳስባን ውልቓዊ ረብሓን ይኹን ብሕሱር ፖለቲካውን ፕሮፖጋንዳውን ጎስጓሳቱ ዝተታለሉ ደገፍቲ ህግደፍ ከኣ፣ ብዕለት 22/06/2015 ኣብ ጀነቫ ከይዶም ኣንጻር ኮሚሽን ሰብኣዊ መሰላት ኣብ ኤርትራ ሰላማዊ ሰልፊ ከምዘካየዱ ኩልና ተዓዚብናዮ ኢና። እቲ ዘገርም ከኣ፡ ብኣህጉራዊ ሕጊ ዝቖመት ኮሚሽን ናይ ፖለቲካ ጸግዒ ከምዘለዋ ክገልጹ ፈቲኖም።  ንኣባላት ኮሚሽን ከፈራርሑ፣ ኣማባሳደር ህግደፍ ወዲ ገራህቱ ካብ ዲፕሎማስያዊ ቛንቛ ወጻኢ ብዝኾነ ንኮሚሽን ዝዝልፍ ዘይእሩም ቃላት ስለዘውጽኤ መጠንቐቕታ ተዋሂቡዎ ’ዩ። እዚ ከኣ ብፕሮቶኮል ዓይኒ ክርአ ከሎ፡ ኣዚዩ ዘሕፍር ተግባር እዩ።

እቲ ቐንዲ ዝሰሓትዎ ሕጋዊ ኣገባብ ግና፣ እታ ኮሚሽን ኣብ ኤርትራ ምግሃስ ሰብኣዊ መሰላት ከምዘሎ ካብ ግዳያት ብዝረኸበቶ፡ ቀዳማይ ኢድ ምስክርነት ብመረጋገጺ ኣሰንያ እያ ጸብጻባ ኣቕሪባ። ንሳቶም ዘይቕቡል ምኽንያት ኣብ ክንዲ ምቕራብ፣ እታ ኮሚሽን ኣብ ኤርትራ ኣትያ ክትምርምር ከተጻሪ ከም ዝኸልከልዋ ዓለም ብምሉኡ ዝፈልጦ ሓቂ ኢዩ። ኣንጻር ኣህጉራዊ ውሳኔ ዝወሰዱዎ ዘይሕጋዊ ኣገባብ ንሳዕቤኑ ብከመይ ከምዝገጥሙዎ ኣይመለሹን። ኣህጉራዊ ውሳኔ ከኣ ብሰላማዊ ሰልፊ፣ ብጸርፍን ሕሱር ፕሮፖጋንዳን ከምዘይቕየር ንካልኣይ ግዜ ዘይተማህርሉ ኣገባብ እዩ። ኮሚሽን ዝተዋህባ ሓላፍነት፡ ክትፍጽም ድሮ ሕጋዊ ስልጣና ንሓደ ዓመት ተናዊሑ ኣሎ። ስራሕ ኮሚሽን ምጽራይ ገበናት ኣብ ኤርትራ ኣብ 2016 ናበይ የምርሕ ሓቢርና ንርእዮ ጉዳይ እዩ።

ስልጣንን ዕማማን ኮሚሽን ሰብኣዊ መሰላት ብሕጊ ተነጺሩ ሰፊሩ ካብዘሎ ኣገደስቲ ነጥብታት ንምጥቃስ፣ እዛ ኮሚሽን‘ዚኣ ኣብ ኤርትራ ኣትያ ገበናት ይኹን ምግሃስ ሰብኣዊ መሰላት ተፈጺሙ’ዶ ኣይተፈጸመን ምጽራይ፣ ቤት ማእሰርቲ ክትበጽሕ እሱራት ከተዘራርብ፣ ናይ እሱራት ሰብኣዊ ኣትሓሕዛ ክትምርምር፣ እሱራት ምስ ስድራ ቤቶም ናይ ምርኻብ መሰል ከተረጋግጽ፣ ናይ ጠበቓን ነበሰ ምክልኻልን መሰል ይፍቐድ ዲዩ ኣይፍቐድን ክትምርምር፣  እሱራት ንጹሃት ዲዮም ገበነኛታት ንምርግጋጽ ተኸሲሶም ኣብ ናጻ ቤት ፍርዲ ናይ ምቕራብ መሰሎም ከቢሩ’ዶ ተነፊጉ፡ መርሚራ ጸብጻባ ምቕራብ እዩ ቐንዲ መዝነታ። ስርዓት ህግደፍን ደገፍቱን ነዚ ኩሉ ሕጋዊ ኣገባብ ተሓሲሞም፣ ንጉድለቶም ንምሽፋን ክብሉ ከኣ ዘይቕቡል ምኽንያታት  እናቕረቡ ህዝቢ ንምትላል ሕሱር ፖሮፖጋንዳ ክዝርግሑ ዝስምዑ ዘለዉ።

እዚ ኣህጉራዊ ውሳኔን ውጽኢቱን ንደምበ ተቓዉሞ ሓጋዚ እዩ። ይኹን’ምበር እዚ ኣህጉራዊ ምዕባሌ ተመሊሱ ፍሉይ ሓላፍነት’ዩ ዘሰክመና ንዓና ንደለይቲ ፍትሒ። ምኽንያቱ ነዚ ምዕባሌ’ዚ ብከመይ ንጥቀመሉ? ዕዮ ገዛና ክንፍጽም እቲ ኩነታት ከኣ ንረብሓና ክንቕይሮ ብከመይ ኣገባብ ዝብሉ ክንሰርሕ ይግባእ ዝብሉ መሰረታውያን ሕቶታት የልዕል ኢዩ። እቲ ተፈጢሩ ዘሎ መድረኻዊ ኣህጉራዊ ምዕባሌ፡ ከም ደምበ ተቛዉሞ፡ ኣብ ክንዲ ኣብ ነንሕድሕዱ ክመናጨት ዝውዕልን፡ ኣብ ካልኣዊ ግርጭታት ተሸኺሉ ኣብ ከንቶ ነገራት ግዝይኡ ዝባኽንን፡ ዓቕምታቱ ብሓባር ጸሚዱ ህዝብን ሃገርን ንምድሓን ኣበርቲዑ ክቃለስ  ዕዙዝ ተዳላይነት ኣለዎ።

ክቡራትን ክቡራንን!!

ሰላማዊ ሰልፍና፣ ዕማማቱን ኣገባቡን ብናይ ግዜ ሰሌዳን ኮሚቴን ተሰሪዑ ስለዘሎ ኩልና ከነኽብሮ ንምሕጸነኩም። ካብ መደብ ወጻኢ ብዘይኣፍልጦ ኣላይ መድረኽ፣ ወይ ንዝምልከቶ ኮሚቴ ከይሓተትካ፣ ዝኾነ ሰብ ብኢደ ዋኒኑ ማይክሮፎን ምሓዝ ይኹን ካልእ ስጉምቲ ምውሳድ ከምዘይፍቐድ እናሓበርና ከተኽብርዎ ንምሕጸነኩም። ዝኾነ ሰብ ንመደብ ሰላማዊ ሰልፊ ንምዕዋት ይጠቕም’ዩ ዝብሎ ኣገባብ ምስ ኣላይ መድረኽ ክዛረበሉ ነትሓሳስብ።  ከም ደለይቲ ፍትሒ መለልይና ስነ-ስርዓትን ሓላፍነታዊ ባህርያትን ስለዝኾነ፣ ብስምዒት ተደሪኽና ካብ ስነ-ምግባር ወጻኢ ንክብሪ ሰባት ዝትንክፍ ጸርፍን ሕማቕ ቓላትን ስለዘይፍቐድ፣ ካብ ከምዚ ባህርያት ክንቑጠብ ኣጥቢቕና ነተሓሳስበኩም። ብውልቐሰባት ዝርኣዩ ጉድለታት ከኣ፣ ተኸባቢርና ነንሕድሕና ክንትኣራረም ፍቱሕ ልቢ ክህልወና ኣገዳሲ እዩ።

የቐንየልና !!
ውድቐት ንዘይሕጋዊ ስርዓት ኤርትራ!!
ዓወትና ናይ ግድን እዩ!!
ዘልኣለማዊ ዝኽሪ ንሰማእታትና!!
           
ኣዳላዊት ሽማግለ ሰለማዊ ሰልፊ ስቶክሆልም 2015
 01/08/ 2015.
                

እዚ ጸብጻብ'ዚ፡ ጽሟቕ ናይቲ ዝሰፍሐን፡ "ወግዓዊ ጸብጻብ ስራሕ ናይ ኣወሃሃዲት ሽማግለ ሰላማዊ ሰልፊ ጀነቫ 2015" ብዝብል ኣርእስቲ፡ ኣብ 13 ሕመረት ገጻት ዝቐረበን፡ ካልእ ተወሳኺ ጥብቆታት (annexes) ዝሓዘ 17 ገጻት ድማ ዘለዎ፡ ብዝርዝር ተሰኒዱ ዘሎ ጸብጻብ ስራሕ'ዩ። እቲ ዝርዝር ጸብጻብ ስራሕ፡ ብምሉኡ ንምንባቡ ግዜ ዝወስድ ስለ ዝflነ፡ እዚ ጽሟቕ ጸብጻብ'ዚ፡ ንቐንዲ ትሕዝቶ ናይቲ ዝርዝራዊ ጸብጻብ ብሕጽር ዝበለ ኣቀራርባ ንምብራህ ዝዓለመ'ዩ።

እቲ ብዕለት 26 ሰነ 2015፡ ንደገፍ መርማሪት ኮሚሽን ውድብ ሕቡራት ሃገራት ተባሂሉ ኣብ ጀነቫ ዝተገብረ ናይ ደለይቲ ፍትሒ ሰላማዊ ሰልፊ፡ ብብዙሕ መዐቀንታት ኣዝዩ ዕዉት ከም ዝነበረ፡ ኣወሃሃዲት ሽማግለ መዚና። እቲ ቀንዲ ዕላማ ናይ ኣወሃሃዲት ሽማግለ፡ እቲ ሰላማዊ ሰልፊ ብጽፈት ከም ዝካየድ ምግባር ዝብል'ዩ ነይሩ። ናብቲ ሰላማዊ ሰልፊ ክመጽእ ናይ ዝግብኦ ቁጽሪ ደለይቲ ፍትሒ፡ ብኣዝዩ ዝለዓለ መጠን  ከም ዝኸውን ንምግባር ሽማግለ ኣበርቲዓ ሰሪሓ። ነዚ ብዝምከት፡ እቲ ዕላማ፡ ልዕሊ ትጽቢት ብዝኸደ ውጽኢት ተዓዊቱ'ዩ። ኣብ ጀነቫ ድማ ንወለዶታት  ክዝከር ዝነብር ፍሉይ ታሪኽ ተመዝጊቡ።

ኣብ ሞንጎ ደለይቲ ፍትሕን ህግደፍን ይካየድ  ኣብ ዘሎ ረጽሚ፡ ሓይሊ ሚዛን ናበይ ገጹ ከም ዝዛዘወ፡ ኣብ ጀነቫ ብንጹር ተራእዩ። ህግደፍ፡ ከም "መንግስቲ"፡ ምስ ኩሉ መንግስታዊ፣ ዲፕሎማስያውን ካልእን ጸጋጋቱ፡ ክውድቦ ዘይከኣለ ብዝሒ ህዝቢ፡ ውሑድ ዓቕምን ትሕዝቶን ብዘለዎም ምዑታት ደለይቲ ፍትሒ (ደቂ ህዝቢ) ብርኡይ ተዓብሊሉ። ዓለም ድማ፡ ህዝቢ ኤርትራ ክሳብ ክንደይ ብግፍዒታት ህግደፍ ኣማሪሩን ኣስካሕኪሑን ከም ዘሎ ብጭቡጥ ርእያ። እቲ ጉዳይ ድሕሪ ደጊም፡ ከምቲ ህግደፍ ክመስል ዝደልይዎ፡ "ናይ ውሑዳት ኮረይቲ" ጉዳይ ከም ዘይኮነ፡ ጀነቫ ካብ ዝኾነ እዋን ንላዕሊ ኣረጋጊጻትሎም።

ብሕጽር ዝበለ ኣገላልጻ እምበኣር፡ እቲ ቀንዲ ዕላማ ናይቲ ሰላማዊ ሰልፊ፡ ልዕሊ ትጽቢት ብዝኸደ ዓቐን ተዓዊቱ ኢዩ። ማዕረ እዚ ድማ፡ ኣብቲ ተሞክሮ ዝተራእየ ናይ ሓድነት ስጥመት ወሃ ዘብል'ዩ ዝነበረ። ኣወሃሃዲት ሽማግለ፡ እዚ ጉዳይíዚ ጸባ ሰትያ'ያ። ኩሎም ደለይቲ ፍትሒ ውን ተመሳሳሊ ዕግበት ከም ዘለዎም ትመዝን።

ነቲ ሰላማዊ ሰልፊ ካብ ዘዐወተ፡ ሓደን ቀንድን ሽማግለ ዝመዘነቶ ናይ ዓወት ረቛሒ፡ እቲ መስርሕ ምድላው ኣሳታፊ ምንባሩ'ዩ። ዳርጋ ኩሉ ደላይ ፍትሒ፡ በብዝኽእሎ ዘበርከተሉን፡ እኹል ናይ ዋንነትን ተሳታፍነትን ዕግበት ድማ ዘሕደረሉን መስርሕ'ዩ ነይሩ። ኣወሃሃዲት ሽማግለ፡ ብወግዒ ቅድሚ ምቛማ ኣብ ዝነበረ ግዜ፡ ብሕውስዋስ ቅኑዕ ርዲኢትን ግጉይ ስምዒትን ተፈጢሩ ዝነበረ ዘይዕግበታት፡ ብሓላፍነታዊ መገዲ ፈዊሳ፡ ናይ ሓባር ናይ ዋንነት መንፈስ ከም ዝዓኩኽ ጌራ ብምስራሓ፡ ነቲ ዝተጎናጸፍናዮ ዓወት ውሑስ ጌርዎ። እቲ ቅድሚ ኣወሃሃዲት ሽማግለ ምምራጻ፡ ብፍላይ ኣብ ፓልቶካት ተፈጢሩ ዝነበረ ዘይዕግበታት ከይተፈወሰ እቲ መስርሕ ቀጺሉ ነይሩ እንተዝኸውን፡ ከምቲ ዝረኸብናዮ ዓወት ምረኸብና ኔርና ምባል ኣዝዩ ከቢድ'ዩ። ናይ ጀነቫ ሰላማዊ ሰልፊ፡ ኣብ ደለይቲ ፍትሒ ፈጢርዎ ዘሎ ሓድነታዊ ምንቕቓሕ ኣዝዩ ዘተባብዕን ተራእዩ ዘይፈልጥን ምዃኑ ሽማግለ መዚና።

ኣብቲ ዝተኻየደ ምድላዋት፡ ዝተፈላለያ ምትእኽኻባት፣ ጥርናፈታትን ውድባትን ዝገበርኦ ዝተፈላለየ ኣበርክቶ ከም ዘለዎ ኮይኑ (ክምስገን ድማ ይግብኦ)፡ እቲ ቀንዲ ዘዐወተ ረቛሒ ግን፡ እቲ ኣቐዲሙ ዝተጠቕሰ፡ ኣብ መስርሕ ምድላው ክፍጠር ዝተኻእለ ሰፊሕ ናይ ዋንነትን ተሳታፍነትን ዕግበት'ዩ። እዚ ኣጋጣሚ'ዚ ኣወሃሃዲት ሽማግለ፡ ንዅሎም ብዝተፈላለየ መልክዕ ኣበርክቶ ዝገበሩ ወገናት ብልቢ ተመስግን።

ከም ዝfኾነ መስርሕ፡ ሰላማዊ ሰልፊ ጀነቫ፡ ብፍላይ ኣብ ገለ መዳያት ኣወዳድብኡ ርኡያት ድኽመታት ነይሮሞ'ዮም። ብፍላይ ኣብ ጉዳይ ሎጂስቲክስ (ቀረብ ማይን እኽልን)፡ ከምኡ ውን ካልእ ግብራዊ ናይ ስራሕ ምድላዋት ጸገማት ከም ዝነበረ ሽማግለ መዚና። ኣብዚ ጉዳይ'ዚ፡ ሽማግለ ዘለዋ ቅኑዕ ትዕዝብቲ፡ "ኣብቲ ጎልጎል ተዓዊትና ኢና፤ እብቲ ኣደራሽ ግን ንኣጋይሽና ከምቲ ዝድለ ኣየሐጎስናዮምን" ዝብል'ዩ። እዚ ከም ቀንዲ ጉድለት ተራእዩ፡ ሽማግለ ነብሳ ነቒፋ ንህዝቢ ይቕረታ ትሓተሉ ጉዳይ ኮይኑ ተረኺቡ ኣሎ። ነቲ ድኽመት ዘንቀሉ ጠንቅታት፡ ኣብቲ ዝርዝራዊ ጸብጻብ ተገሊጾም ስለ ዘለው፡ ኩሉ፡ ቅኑዕ መረዳእታ ክህልዎ ዝደሊ ግዱስ ኤርትራዊ፡ ነቲ ዝርዝራዊ ጸብጻብ ብዓቕሊ ከንብቦ ሽማግለ ትምሕጸን።

ሽማግለ ብኣጣቓላሊ፡ ኣብ ህዝቢ ብዝተወጽአ ወፈያ መሰረት፡ 23414,10 (ዕስራን ሰለስተን ሽሕን ኣርባዕተ ሚእትን ዓሰርተው ኣርባዕተን ዓሰርተ ሳንቲምን) ናይ ስዊዘርላንድ ፍራንክ ኣታዊ ረኺባ። ኣብዚ 18097,74 (ዓሰርተው ሸሞንተ ሽሕን ተስዓን ሸውዓተን ሰብዓን ኣርባዕተን ሳንቲምን) ወጻኢ ጌራ። ኣብ ኢድ ኣወሃሃዲት ሽማግለ ዘሎ ተረፍ ገንዘብ 5253,60 ስዊስ ፍራንክን 20 ዩሮን እዩ። ኣብ ኢድ ኣወሃሃዲት ሽማግለ ዘይበጽሐ፡ ብሓው ኣሰፋው ገብረኪዳን ብፐይፓል ዝተዋአ፡ 1803.02 ፓውንድ ናይ ዓዲ እንግሊዝ ድማ ምስ ሓው ኣሰፋው ኣሎ። ወጻኢ ክኸውን ዝግብኦ ዝነበረ 4560 ስዊስ ፍራንክ፡ ብዝምልከቶም ኣባላት ጀነቫ ንሽማግለ ብዝተገብረላ ሕድገት ካብ ወጻኢ ድሒኑ። ከመይነት ናይቲ ተጌሩ ዘሎ ወጻእታት፡ እታ ንኣወሃሃዲት ሽማግለ ዘቖመት ሓይሊ ዕማም ዝቖመት ካልእ ተቖጻጻሪት ሽማግለ መርሚራቶን ርእያቶን። ብጀካ ኣብቲ ዝርዝራዊ ጸብጻብ ተገሊጹ ገለ ሕጽረታ፡ እቲ ገንዘብ ኣብ ግቡእ መዓላ ከም ዝወዓለ ኣረጋጊጻ።

ኩሉ ድላይ ፍትሒ፡ ነቲ ዝነበረ ዓወታትን ድኽመታትን፡ ብኽፉት ናይ ምርድዳእ መንፈስን፡ ሓላፍነታዊ ሃገራዊ ስምዒትን ክንግንዘቦ፡ ኣወሃሃዲት ሽማግለ ደጊማ ትምሕጸን። ብርግጽ፡ ድኽመታት  ከም ዝነበረ ርዱእ ኮይኑ፡ እቲ ዝተረኽበ ዓወት ግን ብዝተዓጻጸፈ ዓቐን ካብኡ ዝበረኸ  ምንባሩ ሽማግለ ከተስምረሉ ትፈቱ።

ድሕሪ ሰላማዊ ሰልፊ ጀነቫ ተፈጢሩ ዘሎ ውዕውዕ ናይ ሓድነት ምንቕቓሕ፡ ክኽሰበሉ ብዝብል ሓሳብ ብዙሕ ርእይቶታት ይውሕዝ  ከም ዘሎ ፍሉጥ'ዩ። ኣብዚ መዳይ'ዚ ሽማግለ ንባዕላ የስርሕ ትብሎ ለበዋታት ካብ ምሃብ ሓሊፋ፡ ኪንኡ ዝኸይድ ስራሕ ክትሰርሕ ብቕዓትን መዝነትን  ከም ዘይብላ እንዳገለጸት፡ ንዅሉ ዘሎ ተበጕሶታት ኣብ ሓደ ረፍዲ፡ ኣብ ሓደ ጥርናፈ ኣምጺኣ፡ ሓድነት ኢልካ ምእዋጅ ግብራዊ ከም ዘይኮነ ግን ተስምረሉ። ኣብ ክንድኡ ክግበር ኣለዎ ኢላ ትኣምነሉ፡ ነዚ ተፈጢሩ ዘሎ ውዕውዕ ሓድነታዊ ምንቕቓሕ ናብ ዝበረኸ ደረጃ ንምስግጋሩ ይሕግዙ'ዮም ኣብ ዝበሃሉ፡ ዘገምታውያን ስጉምታት (incremental steps) ምድሃብ ከም ዝሓይሽ'ዩ። ከም ኣብነት፡ ክልተ ኣገደስቲ ስጉምታት ወይ መደባት ምጥቃስ ዝከኣል ኮይኑ፡ ኣብ ክልተ ርኡይ ናይ ደንበ ተቓውሞ ሃጓፋት፡ ብናይ ኩሉ ደላይ ፍትሒ ምትሕብባር፡ ክልተ ዝተፈላለየ ናይ ክኢላታት ጉጅለ (panel of experts) ክምስረት ትጽውዕ። እቲ ቀዳማይ፡ ንዲፕሎማሲ፣ ኣህጉራዊ ዝምድናታትን ኣህጉራዊ ሕግን ዝምልከት ኮይኑ፡ እቲ ካልኣይ ድማ ህግደፍ ተዓቝብሉ ኣብ ዘሎ መሕብኢ በዓትታት ሓደ፡ ንዕኡ ዘፍርስ፡ ቅርጡው ናይ ባህልን ስነ-ጥበብን ስራሓት ዘማእዝን ጉጅለ ክኢላታት'ዩ። ሽማግለ፡ ንግዚኡ ኣብዘን ዝተጠቐሳ ክልተ ውሱናት፡ ተተግበርቲ ኢላ ዝኣመነትለን እማመታት፡ ነብሳ ሓጺራ፡ ጸብጻባ እዚ ትዓጹ። ስዒቡ ዝህሉ ስራሕ ናይ ኩሉ ደላይ ፍትሒ ምዃኑ ድማ ተስምረሉ።
ነዚ ጸብጻብ እዚ ኣብ ምድላው ክሕለፍ ዝግብኦ ዝነበረ መስርሓት፡ ምድንጓይ ስለ ዝፈጠረ፡ በዚ ውን ሽማግለ ንህዝቢ ይቕረታ ትሓትት።

ኣወሃሃዲት ሽማግለ ሰላማዊ ሰልፊ ጀነቫ 2015
30 ሓምለ 2015

ዓቢይ ሰላማዊ ሰልፊ ኣንጻር ፈስቲቫል ህግድፍ ኣብ ከተማ ስቶክሆልም-ስዊደን

ጽላል ስዊደናዊ/ ኤርትራዊ ንደሞክራስያዊ ለውጢ ምስ መሓዙት ደለይቲ ደሞክራስን ፍትሕን፣ ትሕቲ ጭርሖ፣"ፈስቲቫላት ህግደፍ ኣብ ሃገረ ስዊደን ደው ይበል" ቃልስና ኣንጻር ግህሰት ሰብኣዊ መሰላት ኣብ ኤርትራ ድማ ብናህሪ ይቕጽል ብዝብል ንክትሳተፉ ብኽብሪ ይዕድም።

ዕለት> ቀዳም ዕለት 1 ነሓሰ 2015

ግዜ፣ ካብ ሰዓት 11.00 ክሳብ 20.00

ቦታ፣ ፎልከትስሁስ/ ኤግበግ[ርድ የርቫፈልተት

ኣዳላዊት ኮሚተ/ ኤርትራዊ ኮም/SESADU ምስ ማሓዙቶም

ሕማቕ ገረብዩ ዓብላኺ ናይ ትኪ

ሕማቕ ውላድ ድማ ስድራኡ የብኪ

እቲ ስሱዕ ስርዓት ንሃገር የድኪ

       ክንደይ ተዘሪቡ ክንደይ ተጻሒፉ

       እዚ ዕባራ ጉርሒ እንተድኣተሪፉ

       ህግዲፍ ክድፋእዩ ቁልቁል ኣፉ

ተግባራዊ ስራሕና ኣይኹን ቑንጣሮ

ብምሉእ ሕልናን ሎሚ ንጀምሮ

       ንዝሓለፈ ክረምቲ ቤት ኣይስራሕን  

       ሕጂውን እንተዀነ ንህዝቢና ነድሕን

ተስፋ ብዘይ ምቕራጽ ብሓያል መኸተ

ትንሳኤ የድልዮ ንዝሞተ

መንእሰያትና ከነብሎም ታተ

       ተቓሊሱ ተዋዲቑ ደንበ ተቓውሞ

       ንሞያ ቃልሶም ብኽብሪ ንርዓሞ

ክንደይ ተዋሪዱ ክንደይ ተጻጢሑ

ክምስገን ይግባእ ኣብዚ ብምብጻሑ

       ብጸላኢ እንተኾነ ክንደይ ስም ወጺእዎ

       ብኽንደይ ትዕግስቲ ኣብዚ ኣብጺሕዎ

ንብዓል ሞሳ ብተግባር ኣልብሶ

ንበዓል ነጐዳ ብሓዊ ደብሶ

ተሓጓሚ ከሎስ ተሓዚ ይቕንዞ

       ዓለም ጀሚረሞ ኣብዛ ሎሚ ቅነ

       ሕጂ ድኣሞ እንታዩ ክምኽነ

       ደጋፊ ናይ ህግዲፍ ክንደይ ከይሳነ

ሰብ ቤት እምበር ኣይኰናን ጓና

ካብ ንፉዕ ጠበቓ ሕማቕ ዋና

ተዓጡቕና ንሓዞ ንጉዳይና

       መንእሰይ ኣይትፍራህ ኣይትገራህ

       ቀንዲ ናትካዩ ካብ ሕጂ ዝስራሕ

       ኵሉ ርኢኻዮ እቲ ዝተበጽሔ

       ወትሩ ጸልማት ኢዩ እንተዘይወግሔ

ኣብዚ በጺሕካ ከይትብል ዕውንውን

ዘይሃገርካ ሃገር ነይኸውን

       እንዳ ህግዲፍ ከድካ ኣይትበል ግልጽ ምልጽ

       ከልቢ ጥራይ እዩ ትፋኡ ዘልምጽ

ኣብ ዝገፍዓካ ጓይላ ኣይትሳዕስዕ

ብድሕሪት ዝተረፉ ብጾት ከይትርስዕ                                                                                                          

       ብሃለዋት ሃገር ክዝረብ እንተዀኑ

       ምህናጽ የልቦን እንትርፎ ዝዓኑ

ጅግና ህዝቢ ዘምጸኦ ነጻነት

መሰል ኣልቦ እንትርፎ ባርነት

       ተባዕ ህዝቢ ንደቁ ዘዕጠቐ

       ንኣፉ ገዲፉ ንሰውራ ዘስነቐ

     ይገርመና ናይ ሎሚ ሕመቐ

መንእሰይ ብኣውያት ወለዲ ብብኽያት

ኣብ ድፋዕ ምብላእዩ የብሉን ምኽንያት

       ነጻነት ዘምጸኤት እዛ ጅግና ዋዕሮ

       ሃጢማ ጠፊኣ ጉድጓድ ዒራዒሮ

እቶም ጀጋኑ ኣሕዋትና ተጋደልቲ

ማህሚኖም ተሪፎም ኣብ ማእሰርቲ

       ኣብ ጐረበት ሃገራት ሰዲዱ ስለላ

       ክንደይ ጀጋኑና ጠፊኦም ብቕንጸላ

ሓዘን እምበር ነይርከብ ዝብሰር

ዝምሃር ነየለ ኣንትርፎ ዝእሰር

       ህዝባዊ ማዕበል እንተተላዒሉ  

       ዝመጸ እንተ መጸ ዝንቕንቖ ብሉ

ካብዛ ሎሚ መዓልቲ ኣይንዓሹ

ሕቶ ሰማእታትና መዓስ ተመሊሹ

ክብሪን መሰልን ህዝብና ተጣሒሹ

       ዝኽርን ክብርን ንሰማእታትና

       ዓወት ንህዝባዊ ማዕበልና

10-07-2015

ዓቢይ ሰላማዊ ሰልፊ ኣንጻር ፈስቲቫል ህግድፍ ኣብ ከተማ ስቶክሆልም-ስዊደን

ጽላል ስዊደናዊ/ ኤርትራዊ ንደሞክራስያዊ ለውጢ ምስ መሓዙት ደለይቲ ደሞክራስን ፍትሕን፣ ትሕቲ ጭርሖ፣"ፈስቲቫላት ህግደፍ ኣብ ሃገረ ስዊደን ደው ይበል" ቃልስና ኣንጻር ግህሰት ሰብኣዊ መሰላት ኣብ ኤርትራ ድማ ብናህሪ ይቕጽል ብዝብል ንክትሳተፉ ብኽብሪ ይዕድም።

ዕለት> ቀዳም ዕለት 1 ነሓሰ 2015

ግዜ፣ ካብ ሰዓት 11.00 ክሳብ 20.00

ቦታ፣ ፎልከትስሁስ/ ኤግበግ[ርድ የርቫፈልተት

ኣዳላዊት ኮሚተ/ ኤርትራዊ ኮም/SESADU ምስ ማሓዙቶም

ብሕሉፍ እናነብዐን እናተከዘን ዝነብር ሕብረተሰብ፣ ነቲ መጻኢ ዝኸውን መንጸፍ ስላም-ስኒት-ብልጽግና- ሓቢርካን ተኸባቢርካን ምንባር ዝብል ከቶ ክሓስበሉ ዝከኣል ኣይኮነን። በንጻሩ እኳ ደኣ ኣብ ዘይምትእምማንን ኣብ ጥርጠራን ኢዩ ዝነብር። ብሕሉፍ ኣይትዛረብ ዘይኮነስ ተዛሪብካ ተምጽኦ ፍረ ስለዘየልቦ፣ ሕሉፍ ሓንሳብ ተፈጺሙ ኢዩ ዝሓልፍ። እቲ ዝተፈጸመ ከኣ ኣብ ሎሚ ኰንካ ዝዕረ ኣይኮነን፣ እንታይ ደኣ ነቲ ሕሉፍ ተረዲኢካ ተመሊሱ ከይድግም ምግባር ጥራሕ ኢዩ ዘዋጽእ። ኣብ ሕሉፍ ምንባር ማለት ጌና ኣብ ሕነ ምፍዳይን፡ ኣብ ተንኮል ምእላምን እንተዘይኮይኑ ሃገራዊ ኣተሓሳስባ ንምጥራይ ዓንቃጺ ግደ ኢዩ ዝጻወት።

ነቲ ዝሓለፈ መድረኻት ማለት ነቲ እወንታኡ ብእወንታኡ ወሲድና ነቲ እሉታኡ ከኣ በዚ ህዝቢ ኤርትራ ዘካየዶ ናይ ነዊሕ ቃልሲ ተመኩሮ ቀደም ሰጊርዎ ወይ ሓሊፉዎ ክኸውን ነይሩዎ። ክሰግሮን ክሓልፎን ስለዘይከኣለ ድማ እነሆ ክሳብ ሕጂ ኣብቲ ናይ ቀደም ምትህልላኻት ኣትዩ ይርከብ። በዚ ዝኣክል ንሕና ኤርትራውያን ንነፍስና ገምጊምና ካብ ዝምባሌታት ክሳብ ከንደየናይ ተገላጊልና ኣሎና ክንፈልጥ የድሊ። ምኽንያቱ ጌና ስምዒታት ዝዓብለልና ኮይኑ ኢዩ ዝስምዓኒ።

ኣብ ግዜ ብረታዊ ቃልሲ ካብ ዝጸንሓና ኣሉታዊን ጎዳኢን ስምብራት ጌና ኣይተላቐቅናን ኣሎና። ንኣብነት ኣብ ሜዳ ኤርትራ እቲ ኣብ መንጎ ውድባት ዝካየድ ዝነበረ እግሪ ሕድሕድ ምቅርሳም ብዝኸፍአ መልክዑ ክሳብ ሕጂ ቀጻሊ ኣሎ ኣየዕረፈን። ካብቲ ሕሉፍ ተመሂርና ካብኡ እንቐስሞ ተመኩሮ ነቲ ክፉእ ዝኾነ ነገራት ገዲፍና ንኸይንደግሞ ኢዩ እቲ ቀንዲ ክንፈልጦ ዝግበኣና ዝነበረ። ጀብሃን ሻዕብያን፡ ሃገራውያን ዘይሃገራውያን፡ ስውእትን ዘይስውኣትን እናበልና፡ ዝተጓዓዝናዮ ዘመነ-ገድሊ ነቲ ህዝቢ ኣብ ሕነ-ሕነ ከምዝኣቱን፣ ንደቂ-ሃገር ኣብ ክልተ ከምዝምቀል ገርናዮ ኢና። ኣብ ክንዲ ነቲ መላኺ ስርዓት ንጭምት ከኣ፣ ደጋፍን፡ ተቓዋምን፣ ደላይ ፍትሕን፡ ዘይደላይ ፍትሕን፡ እናበልና ናይ ምፍልላይ መስርሕ እምበር፡ ንሃገር ሓቢርካ ካብ ሓደጋ ንምድሓን ዝብሉ ምውህሃድን ምትሕብባርን ቅዱስ ዕላማ ኣብ ሓንጎልና ጌና ኣየስረጹን ዘለዉ። እዚ ከኣ ንዓቕምታትናን ንብቕዓታትናን ፋሕ ብትን ከምዝብል ስለዝገብሮ ነቲ ናይ ሓባር ዓወት ዝብል ጎደና ይብሕጉጎ ከምዘሎ ምርዳእ ኣገዳሲ ኢዩ።

ሎሚ እውን ባይቶን ካብ ባይቶ ወጻእን፡ ውድባትን በርገሳውያን ማሕበራትን፡ ህዝባዊ ምንቅስቓስ እምበር ውድብ ኣየድልን ዝብሉ ዘይቅኑዕ ኣገባብ ቃልሲ ንኽንቃለስ ዝጸዓር ዘሎ ብሓቂ ኣድማዒ ግደ ንኸይንጻወት ካብ ዝገብር ዘሎ ኢዩ። ንሱ ጥራሕ ዘይኮነስ ነቲ ሓደ ኣውዲቕካን ረጊጽካን ጸብለል ንኽትብል ዝግበር ቃልሲ ልክዕ እቲ ኣብ ግዜ ምፍንጫላት ዝተራእየ ናይ ውድባት ውድድር ኮይኑ ከምዝኸይድ ኢዩ ዝገብሮ ዘሎ። በዚ እንኸዶ ዘሎና ኣገባብ ድማ ነቲ ሃገራዊ ጉዳያት ብሓባር ተዛቲኻን ተመራሚርካን ሰሪሕካ ለውጢ ንምምጻእ ኣብ ክንዲ ምሕሳብ ንቓልስናን ንሓድነታናን ዝፈታተንን ዝበታትንን ስርሓት ነሰላስል ከምዘሎና እውን ንነፍሲ ወከፍ ብሩህ ኢዩ። ነዚ ሓቂ እዚ ከኣ ኣሉ ዝብል እንተልዩ ንነፍሱ ኢዩ ዘታልል ዘሎ። እቲ ዝካየድ ዘሎ ቃልሲ ከኣ ብርግጽ ተበታቲና ንቃልስ ዝብል ጻውዒት እኳ ኢዩ ዝዕብልል ዘሎ። ናይ ዲሞክራስን ፍትሕን ለውጢ ከኣ ንፍቶ ንጽላእ ብዘይ ፖለቲካዊ ሰልፊ ተዓወተ ማለት ዘበት ኢዩ። እዚ ፖለቲካዊ ሰልፍታት ኣብዚ እዋን እዚ ኣየድልያን ኢየን እናበልካ ጐስጓሳት ዝካየድ ዘሎ ድማ ጸረ ዲሞክራሲን ጸረ ለውጥን እምበር ብርግጽ ተሓላቒ ፍትሕን ሰላምን ክኸውን ኣይክእልን ኢዩ። ብተወሳኺ ናይ ሕብረተሰብ ሰላምን ብልጽግናን ርግኣትን ተኸባቢርካ ናይ ምንባርን ዘኽብር እውን ኣይከውንን ኢዩ።

ሓደ ካብቲ ንደቂ ሰባት ኣደናጋሪ ዝኾነ ኣስተምህሮ ንሓርነታዊ ቃልሲ ብህዝባዊ ምንቅስቓስ እምበር ብፖለቲካዊ ውደባ ኣብ ዓወት ኣየብጽሕን ዝብል ኣምር ካበይ ዝመጸ ስነፍልጠት ምዃኑ ብሩህ ኣይኮነን። እወ! ሰፊሕ ህዝባዊ ምንቅስቓስ ኣድላዪ ኢዩ፡ ምኽንያቱ ኣብ ፖለቲካዊ ሰልፍታት ተጽዕኖ ክፈጥር ዓቢ ግደ ኣለዎ። ይኹን እምበር ኩሉ ምንቅስቓሳት ኣብ ጸቢብን ጎናዊ ረብሓታቱን ምስ ዝጥሕል ወይ እውን ምዕቡል ሕብረተሰብ እንተዘይኮይኑ ንለውጢ ዓንቃጺ ተራ ክህልዎ ምዃኑ ዘይከሓድ ሓቂ ኢዩ። እዚ ግን ህዝባውያን ምንቅስቓሳት ኣይሃሉ ማለት ኣየስምዕን እንታይ ደኣ ተጻረርቲ ናይ ፖለቲካውያን ሰልፍታት እውን ክኾና ኣይግባእን። ህዝባዊ ምንቅስቓሳት ጎኒ ጎኒ ፖለቲካውያን ሰልፍታት ኮይኑ ንሓደ ሕብረተሰብ ናይ ምቕራጽ ዓቢ ግደ ኣለዎ። እዚ ካብ ኮነ ኩሉ ዝግበር ምንቅስቓስ ንመሰረታውን ንምሉእ ለውጥን ኣብ ማሕበራዊ ስርርዕ ዝዓለመ ምንቅስቓስ እንተኾይኑ ጥራሕ ኢዩ ሓቀኛን ወይ ከኣ ርትዓውን ምንቅስቓስ ክኸውን ዝኽእል። ካብኡ ብዝተረፈ ናይ ሰላማዊ ሰልፊ ምንቅስቓስ ጥራሕ ኮይኑ ኢዩ ዝተረፍ። ደሓር ከኣ ህዝባዊ ምንቅስቓስ እኮ ንፖለቲካውያን ሰልፍታት ዝምውልን ዝድግፍን ኢዩ። ብመሰረቱ እውን ነቲ ንመላእ ሕብረተሰብን ነታ ሃገርን ኣብ ሰላምን ምርግጋእን፡ ፍትሕን ገጹ ዘይጎዓዝ ሰልፊ መን ኢዩ እሞ ክድግፎ።

ንፖለቲካውያን ሰልፍታት ዝምውልን ዝድግፍን ከበሃል ከሎ ድማ ካብ ስነፍልጠት ወጻኢ ንዝቃለስ ሰልፊ መስመሩ ስሒቱ ከምዘሎ ዝሕብርን ኢዩ ምኽንያቱ ክልቲኡ ህዝባውያንን (ሲቪላውያን) ፖለቲካውያን ውድባት ምንቅስቓሳት ኢዮም። እቲ ፍልልዮም ኣብ ትካላውን ዘይትካላውን ኢዩ። ብተወሳኺ ዋላ እኳ ሲቪላዊ ምንቅስቓሳት ኣብ ስልጣን ንምምጻእ ዘይቃለሱ እንተኾኑ ክልቲእቶም ፖለቲካዊ ንጥፈታት ኣለዎም ኢዩ።

እዞም ህዝባውያን ምንቅስቓሳት ዝበሃሉ ብዙሓት ኢዮም ከም ኣብነት ናይ ሞያ፡ ደቂ ኣንስትዮ፡ መንእሰያት፡ ከባቢያዊ፡ ፖለቲካዊ ሰልፍታት …ወዘተ ኢዩ። ስለዚ ፖለቲካውያን ሰልፍታትን ኩሉ ህዝባዊ ምንቅስቓሳትን ብቐጥታ ዲዩ ብተዘዋዋሪ ዝምድና ኣለዎም። ንሱ ድማ፡ ሰልፊ ከም ፖለቲካዊ ርእሰ-ኵናት ናይቲ ምንቅስቓስ ኮይኑ ክገልግል ከሎ እተን ምንቅስቓሳት ድማ ወይ ይውከላ ወይ ከኣ ብመገዲ ዝተፈላለያ ሰልፍታት ኣቢለን ጽልወአን የዕዝዛ። ሰልፊ ንገለ ወይ ንብዙሓት ምንቅስቓሳት ክሓቍፍ ይኽእል። ምንቅስቓሳት እውን ምስ ዝኾነ ይኹን ሰልፊ ርክብ ወይ ምትእስሳር ክህልዎ ይኹን ክነጽግ ይኽእል። ስለዚ ክልቲኡ ኣብ ነንሓድሕዱ ዝተፋነነሉ ወይ ዝጸላለመሉ ጉዳይ የብሉን።

ንኣብነት እዚ ኣብ ዕለት 26-06-2015 ኣብ ጀነቫ ዝተኻየደ ሰላማዊ ሰልፊ ነቲ ንሕናን ንስኹምን ወይ ከኣ ሰልፍታትን ማሕበራትን ተባሂሉ ኣብ ደረጃ ናይ ምፍልላይ ጥሒሉ ዝነበረ ጥሒሱ ኩሉ ብሓባር ኮይኑ ድምጹ ኣስሚዑ ኢዩ። ዋላ እኳ ኣብቲ ብውልቀሰባት ዝተዋህበ ሓስብካ ምግላጽ ዘየድሊ እንተነብሮ። እቲ ዘየድሊ ዝብሎ ዘሎኹ ማለት እቲ ሰላማዊ ሰልፊ ንምውንጃል ወይ እውን ሞሳ ወይ ጉንዖ ንኽትረኽበሉ ዘይኮነስ እንታይ ደኣ ንኣውያት ህዝብና ሓባራዊ ድምጺ ንኽህልወካ ዝብል ኢዩ ቀንዲ ሕመረት መበገሲኡ። ኮይኑ ግን እቲ ዘየድሊ ዝበሃል ዘሎ ነጥቢ ከም ኣብነት ‘’ መራሕቲ ውድባት ኣብዚ ኣሎኹም እዚ መንእሰይ እዚ ከኣ ብደም ይሓተኩም ኣሎ፡ ‘’ዝብል ቃል ናይ ብሓቂ ነቲ ሰላማዊ ሰልፊ ዘይመልክዑ ኣልቢስዎ ኢዩ። እዚ ሰላማዊ ሰልፊ እዚ ፖለቲካውያን ሰልፍታት ወይ ውድባት እንተዘይህልዋ ነይረን ኣብ ከምዚ ዝኣመሰለ ሰላማዊ ሰልፊ ኣይምተበጽሐን። እዚ ክበሃል ከሎ ንሰን ኣዳልየናኦ ንምባል ዘይኮነስ እቲ ቃልሲ ብዓንዲ ርእሱ ንሰን እንተዘይኣጽነሐኦ ቀጻልነት ኣይምረኸበን። በዚ ኢዩ እምበኣር እቲ ኣብ ላዕሊ ማለት ፖለቲካውያን ሰልፍታት ክም ርእሰ-ኵናት ናይ ፖለቲካዊ ምንቅስቓሳ ዝበሃላ። እዚ ማለት ከኣ ሰልፍታት ቅዋም ስለዘይተሓንጸጸ ክሳብ ቅዋም ዝሕንጸጽ ምምስራት ሰልፊ ኣየድልን ዝብል ኣይኮነን።

ስለዚ ህዝባውያን ምንቅስቓሳትን ፖለቲካውያን ምንቅስቓሳትን ተባሂለን ክፍለያ ከለዋ እኮ እቲ ሓደ ጠለብ የቕርብ እቲ ካልኣይ ከኣ ትካላት ስለዝውንን ነቲ ጠለብ ተቐቢሉ ኣብ ግብሪ ዘውዕል ኢዩ። ነዚ ኩሉ ዝተጠቕሰ ካብ ዘመነ ብረታዊ ቃልሲ ኣትሒዙ ክሳብ እዚ እዋን እዚ ኣብ ነፍስና ለውጢዶ ገርና ኣሎና ወይ በቲ ዝነበሮ ጋም ማን ኢና ንብል ዘሎና ክንምርምሮን ክንፍትሾን የድሊ። ይኹን እምበር ካብቲ ናይ ስሳታት ዓዘቕቲ ኣይወጻእናን ዘሎና። እቲ ጸለመ፡ እቲ ምርሕሓቕ፡ እቲ ነንሓድሕድካ ዘይምድማጽ፡ ተራኺብካ ሽግራት ዘይምፍታሕ ኩሉ ኣብ ቦትኡ ኢዩ ዘሎ። እሞ ኣእምሮና ካብቲ ሕሉፍ ኣተሓሳስባ እንተዘይወጺኡ ዕላማና ክንመርጽን መጻኢ ዕድልና ክንውስንን፡ ጉድለታትና ክንእርምን ንግርጭታትና ፍትሓዊ ብዝኾነ ፍታሕ ክንገብር ከምዘይንኽእል እዚ ዝኸድናዮ ክንደይ ዓመታት ህያው ምስክር ኢዩ።

እዚ ካብ ኮነ እምበኣር፡ ኩሉ ግዜ ኣብ ፍልልያትን ኣብ ሕሉፍ ንነብር ካብ ሃሎና ድማ ነቲ እንኮ ጸላኢና ማለት ምልካዊ ኣተሓሳስባን መላኽን ገዲፍና እግሪ ሓድሕድና ንሰብርን ንቕርስምን ስለዘሎና ንቕድሚት ክንስጉም ኣይከኣልናን ዘሎና። ወረ ነቲ ምልካዊ ስርዓት ባዕልና ኢና ዕድመ ስልጣኑ ነነዋሓሉ ዘሎና እንተተባህለ ካብ ሓቂ ዘረሓቐ ኣይኮነን። ምኽንያቱ ንደቂ ሃገር ከም ክልተ ደቂ ሃገር ገርና እናመደርና እነንቀሳቕሶ ፖለቲካዊ ንጥፈታት ውጽኢቱ ሃሳይና እናኾነ ኢዩ ዝኸይድ ዘሎ። ንኣብነት ኩሉ ምንቅስቓሳት ሰልፍታት ይኹና ህዝባውያን ነቲ ምስቲ ስርዓት እንተስ ርዒዱ ዲዩ እንተስ ብጥቕሙ ደው ኢሉ ዘሎ ህዝቢ ፈትዩን ረድዩን ዘይኮነስ ተገዲዱ ብዘይ ምርጭኡ ዝኣትዎ ምዃኑ ብሩህ ክከውን ኣለዎ። ነዚኦም ናይ ምኽሳብ ኣምር ዝብል ምንቅስቓስ ገዲፍና መዓት ጭጉራፍ ክነዝንበሉ ከሎና ሃገራዊ ግቡእ ንከይርዳእን ካብኡ ኣይሕለፍ ብምባል ነቲ ስርዓት ዝያዳ ከምዝለግብዎን ዝድግፍዎን ንገብር ኣሎና። ነቲ ህዝብን ነቶም ውሑዳት ጉጅለታት ኣብ ዙርያ እቲ ስርዓት ዘዅዱዱ ብማዕረ ጸረ ሃገር ኢዮም እናበልና ንሶም ከም ጸረ ፍትሒ፣ ንሕና ድማ ከም ደለይቲ ፍትሒ ኰና ኣብ ክልተ ደምበ መቒልና ልክዕ እቲ ኣብ ግዜ ሰውራ ንዓወትና ዘደናጎየ ጀብሃን ሻዕብያን ኢልና ተመቓቒልና ዝተጕዕዝናዮ ታሪኽ መሊስና ንደግሞ ምህላውና ኢዩ ዝሕብር። እዚ ጥራይ መኣስ ኰይኑ ወላ ነቶም ደለይቲ ፍትሒ እውን ኣብ ክለት እኮ ኢና ንመቕሎም ዘሎና። ንሱ ድማ ካብ ባይቶ ወጻኢን ኣብ ባይቶ ዘሎን ልክዕ ከምታ ነቶም ህዝብና ምስቲ ስርዓት ደው ኢሎም ዘለዉ ገርና እንዲና ንነጥፍ ዘሎና።

ኣቱም ሰባት ሓላፍነታውያን ዲና ወይ ኣይኮናን ዝብል ሕቶ ነፍሲ ወከፍና ክንምልሶ ዝግበኣና ሕቶ ኢዩ። ምኽንያቱ ሓላፍነታዊ ዝኾነ ምንቅስቓስ ሰልፊ ይኹን ህዝባዊ ንምልኪ ኣዕንዩ ንናጽነትን ሓርነትን ዝትስፎ እንተኾይኑ ከምዚ ንኸዶ ዘሎና ኣገባብ ኣይኮነን እቲ ክኸውን ዝግበኦ ጉዕዞ። እዚ ከኣ ዕላማና ክንውስን ኣሎና፡ ዕላማና ድማ ምልክት ናይ ምንጽጻግ ወይ ጽልኢ ንምግላጽ ወይ ንነፍሱ ዝሓሸ ኰይኑ ንምቕራብ እንተኾይኑ ነካይዱ ዘሎና ቃልሲ፣ ንናጽነት ይኹን ንመሰል ወይ ንፍትሒ ዘየኽብር ጥራሕ ዘይኮነስ ካብ ምልኪ ዝኸፍአ ኢዩ ክኸውን። እሞኸ ደኣ እንታይ ይገብር? እወ! ዘበኑ ዘበን ሓርነት ስለዝኾነ ዘበን ሓርነት ከኣ ናይ ጽልእን ቅርሕንትን ጐነጽን ኣይኮነን እንታይ ደኣ ዘበን ልዝብን፡ ዘተን፡ ዕርቅን ይቕረን ሕድገታትን ኢዩ። ካብኡ ብዝተረፈ ነቲ ብርእይቶ ዝፈላለ ነጺግካ ኣብ ሃገራዊ ጉዳያት ማዕረ መሰል ከምዘሎካ ዘይምእማን ከስዕብ ስለዝኽእል፣ ኣብ ክንዲ ኣውዲቕና ክንስጉም ምፍታን ተሓቛቝፍና ምኻድ ክነዘውትር ይግባእ። ስለዚ እግሪ ሕድሕድ ምቅርሳም ገዲፍና ኣብ ነንሓድሕድና እንገብሮ ጸለመ ደው ነብል። ካልኣይ ኩሉ ዓቕምታትን ብቕዓታትን ኣንጻር ምልካዊ ኣተሓሳስባን መላኽን እምበር ኣንጻር ሓድሕድ ክኸውን ኣይግባእን። ኣብ መጠርስታ ድማ ናብ ናይ ኩልና ዓወት ገጹ ዘብጽሕ ጐደና ክንትልም ይግባእ። ንሱ ድማ ሰልፍታት ብዘይ ህዝባዊ ምንቅስቓሳት፡ ህዝባዊ ምንቕስቓሳት ከኣ ብዘይ ሰልፍታት እቲ ዝደለ መሰረት ናይ ለውጢ ክርከብ ኣይከኣልን።

ብድራር መንታይ

ታሪኽ ኣሎ ታሪኽ ናይ ኣቦታት
ባህሊ ኣሎና ያታ ምስ ሕግታት
        ሃይማኖትን ዓሌትን ዘሳማምዕ  
        ብምኽሪ ጸላእቲ ነይብል ግምዕምዕ
ባህሪያዊ ሕድሕድ ምክብባር  
ካብ ጉዕዞ ቃልስና ዘይንምሃር
        ብትውልድና እስከ ክንዛረብ
        ብደቡብ ዘሎ ኣብ ሰሜን ይርከብ
ኣብ ምብራቕ ዘሎ ኣብ ምዕራብ ይርከብ
ሕዉስ ኢዩ ዓሌትና ብሓባር ንላዘብ
        ወዮ ጀጋኑ ኣቦታትና ዝገበርዎ ሞያ
        ኣብ መስከረም ኣይተጋህደትን ድያ
ክንደይ ተኣሲሮም ብባዕዳውያን ገዛእቲ  
ምንም ኣይተጻዕዱን ኣሕሊፎም መስዋእቲ
        ብረታዊ ቃልሲ ንምንታይ ኣድለየ
        ፖለቲካዊ ቃልሲ ምዃን ምስ ኣበየ
ሓዊ ተወሊዑ ብተምሃሮ ኣስመራ  
ሓንቲ ኣካል ኰይኖም ምስናይ ኣልቃሂራ  
        ክዝከር  ኣለዎ ኵሉ ዝሓለፈ
        ሓቀኛ ታሪኽዩ ሎሚ ኣንተተዓጽፈ
 መንእሰይ ኤርትራ ሓይሊ ተመሃሮ  
ሰላማዊ ሰልፊ ባዕሉ ዝጀመሮ
        መንእሰይ ሃገርና ብርሃን ጸሓይ በርቂ
        ንጸላኢ ስሚ ንሰውራና ወርቂ
ካብዚኣ ሓሊፎም ሰውራኦም ደጊፎም
ድሕሪ 30 ዓመት ነጻነት ኣልቢሶም
        ሓድነት ለቢሶም ፍልልይ ዘይብሉ
        ናይ ጀጋኑ ኣቦታት ኣብ ግብሪ ውዒሉ
ንህዝቦም  የዕጊቦም ምስኦም ንኽቃለስ
ጅግንነት ህዝብና ኣየርኣየን ቀልበስ
        እዚ ንኽምለስ እንታይ ጸገም ኣለዎ
        ብቕኑዕ ቃልስና ንዅሉ ንጽለዎ
ተለዓል  ኤርትራዊ መንእሰይ ተለዓል
ህዝብኻ ንምድሓን ካብዛ ዓባይ ሰዓል
        ኣብ ሃገራት ኤውሮጳ መጺእካ ትነብር
        ገሊጽካ ዘይውዳእ  ዘሕለፍካዮ ሽግር  
ውጹዓት መንእሰይ ሃገርና ኤርትራ
ተራእዩ ዘይፈልጥ ሓሳረ መከራ
        ኣብ ታሪኽ እንተዀነ ፍጹም ኣይትራእየን
        ብኸምዚ  ስርዓት ሃገርና ኣይተገዝኤን
ጸጥታ  ናይ ሽበራ ግዝኣት ምፍርራህ  
ብሸቐት ነጻነት  ህዝብኻ ምግራህ
        ምእንቲ ነጻነት ክብል ህዝቢ ተጻዊሩ  
        ሰብ ካልእ ዕላማ ስርሖም ይገብሩ
ቈልዓ ከም ዕድሜኡ ንቡር ከይረኸበ
ዕስክርና ሳዋ  ተርባጽ ተለብለበ
        ግፋ መጸትኒ ኢሉ ክቘጽር ጊዜኡ
        ብስቕቕታን ስኽፍታን ይጽበ ታርኡ
ትምህርቲ እንዳበልካ ሓሶት ምምስማስ
ከይስልጥን ከይምዕብል ኣእምሮ ምርማስ
        ኣይንርእሱ ኣይንወለዱ ተሪፉ ሓዲግ መዲግ
        ብክቱር ምብስጫው ሃገሩ ይሓድግ
ንዶባት ሓሊፉ ክኸይድ  ሓደጋ
ህይወቱ ትኣቱ ኣብ ዋጋ ዕዳጋ
        ዘስካሕክሕ ተረኽቦ ናይ ሰሃራ ሲናይ
        ኣብ ታሪኽ ናይ ዓለም ንክትሰምዖ ግናይ
ህቦቡላ ሑጻ ሰሃራ ናይ ሊብያ  
ክንደይዩ ጠፊኡ ብጽምኢ ብድብያ
        ወዮ ማእከላይ ባሕሪ ንሕስያ ዘይብሉ
        ኣእዊኻ ዘይሰምዕ ምውሓጥዩ ንዅሉ
ስደት ናይ ኩሶዖይ ሽግር መቃለሊ  
ኣድጊ ኣይንዓቕን ረኺበልካ በቕሊ
04-07-2015

ኣንቶንዮ ተስፋይ

ሰነ 29 2015

ብሰብ ድዩ በቲ ሑጻ

ሂወት ዘይርከቦ ገጻ

ወይስ በቲ በደው ክነብራ ዝመረጻ

ምድረበዳ ሽም ዝወጻ፡

           ምድረበዳ ስምኪ ጸሊሙ

           ንሶም ክድሕኑ ንዓኺ ክልክሙ

           ብኣኪ ክዛረብ ዓለም ብዓለሙ

           ዘይትዛረቢ ሓጥኣቶም ክስከሙ፡

እወ፡ ሸኻ፡ ዛራ ዘይብልኪ

ህጻናት ከተዕንግሊ ልኢኾምልኪ

ንጹሃት ክመስሉ በዓል ህ.ግ.ዲ.ፍ ምልኪ

ጽምኢ፡ ሞት፡ ጥፍኣት ዝብሉኺ፡

            ምድረ በዳ ፡ ግዲ የብልክን

            ሂወት፡ ማይ እውን

            ቀይሕ ባሕሪ፡ መዲተራኒያንን

            ተሰሚዑ'ዩ፡ ሽመን ክድወን፡

ኣረሜናዊ ምሕደራ ህ.ግ.ዲ.ፍ

ደቂሱ ተሲኡ ስልጣን ዝሃርፍ

ሃገር ኣጥፊኡ ዘይዓርፍ

ከመኻኒ ስ ናባኺ እንተበል ሕልፍ፡

           ህ.ግ.ዲ.ፍ ደኣ ዘይከማኺ'ዩ ምድረ በዳ

           ኣዋልድ የብሉ ሩባ ዝወርዳ

           ኣሓ የብሉ ባሕሪ ዝወርዳ

           ዓዲ ብዓዳ ተሓቢሻ ተቐይዳ፡

ኣብ ኣጻምእ ምድረ በዳ'ስ

ማይ ክትረክብ ሃሰስ

ጽላል ክትረክብ ዳሕሳስ

ብተስፋ ዘሰጉም ዋርዋር ኣድማስ፡

             ህ.ግ.ዲ.ፍ ከ የማን የለ ጸጋም

             ቋሕ፡ ሰም እንተበልካ ኩሉ ጸላም

             እመት ትኹን የልቦ ምስጓም

             ምድጋፍ፡ የልቦ ምእዳም፡

እሞ ደኣ ሞት፡ ብሞት

ይወራዘድ'ዩ ዘይ ኩሉ ጥፍኣት

ናትኪ'ኳ ይሓይሽ ብምቕሊት

እንተጠፍአ ኣሰር፡ እንተደሓነ ብሂወት፡

              ካባኽስ ዳህላክ'ኳ ትምረር

              ታሪኻዊት ደሴት ናይ ደቐ'ባት ማሕዩር

              ዒራዒሮ ዝባሃል ሰብ ዘንቕጽ ዘሕርር

               ደሃይ ትመስክር፡ ጥፍእ ስውር፡

እምባትካላ፡ ዊዓ፡ ገምሃሎ

ዓላ፡ ጎዳጉዲ ደንጎሎ

ናቱ ሓቢኡ ናባኺ እንተበሎ

ሓቕስ ክትወጽእያ ኣብ መጋባእያ ውዕሎ፡

            ህ.ግ.ዲ.ፍ ስ ያኢ ብኣኺ ክወራዘ

            ንዜጋታት ዘደነከለ ዘዕንዘዘ

            ዝበከለ ዝመረዘ

             ዘጥፈአ ዝሰረዘ፡

መዓስ መጺኽና ከድናኪ'ምበር ንሕና

ወዲቕናኺ'ምበር መዓስ ወዲቕክና

ዝወደቐስ ህ.ግ.ዲ.ፍ ናባና

ኣምላኽ፡ ካብ መዓቱ ይሰውረና፡

ዘለኣለማዊ ክብርን ዝኽሪ ንስውኣትና

ዓወት ንተቃላሳይ ህዝቢ ኤርትራ

ኩላትና ከምዝተኸታተልናዮ ብዕለት 26 ሰነ 2015፡ ኣብ ከተማ ጀነቫ ሃገረ ስዊዘርላንድ፡ ብኤርትራውያን ደለይቲ ለውጢ ዝተዳለወ ካብ ሃገራት ስዊድን፡ ኖርወይ፡ ጣልያን፡ እንግሊዝ፡ ጀርመን ዴንማርክን ካልኦት ሃገራት ኤውሮፓን፡ ገለ'ውን ራሕቂ ከይገደሶም ካብ ካናዳን ኣውስትራልያን ዝተሳተፍዎ ዕዉት ሰላማዊ ሰልፊ ተኻይዱ። ኣብ ሃገራት እስራኤልን፡ ኢትዮጵያን ዝርከቡ ኤርትራውያን'ውን ተመሳሳሊ ሰላማዊ ሰልፊ ኣካይዶም። እዚ ሰላማዊ ሰልፊ መብዛሕቶም መንእሰያት ዝተሳተፍዎ፡ ካብ ኩሉ ጽላት ሕብረተሰብ ኤርትራ ዘካተተ፡ ንፍናን ደለይቲ ለውጢ ሓፍ ዘበለን፡ ንስርዓት ህግደፍ ዘንቀጥቀጠን ዘበርገገን እዩ እንተተባህለ ምግናን ኣይኮነን። እዚ ሰልፊ እዚ ኣገዳስን ፍሉይን ዝገብርዎ ገለ ረቛሒታት ንምጥቃስ፡
•    ፖለቲካዊ ሰልፊ፡ ምንቅስቓስ፡ ሃይማኖት፡ ኣውራጃ፡ ወገን ብዘየገድስ ኩሎም ኤርትራውያን ብሓደ ድምጺ፡ ኣብ ሓደ ዓላማ፡ ብሓድነት ከምቲ ቀደም ንናጽነት ሕጂ'ውን ንሓርነት ክሰርሑ ከምኽእሉ ዘነጸረን፡ ዘረጋገጸን ብምዃኑ
•    ንኹሎም ደለይቲ ለውጢ ሞራሎምን ፍናኖምን ሰማይ ዓሪጉ፡ ንምቅልጣፍ ለውጢ ከይተሓለሉ ብዝበለጸ ክሰርሑ መዳርግቲ ዘይርከቦ ውሽጣዊ ሓይሊ ዘስነቐ ብምዃኑ
•    ነቲ ካብ ዓይኒን ኣድህቦን ማሕበረሰብ ዓለም ተገሊሉን፡ ተሸፊኑን ንዓሰርተታት ዓመታት ኣብ ኤርትራ ዝግበር ዝጸንሐን፡ ዘሎን ጃምላዊ ምግሃስ ሰብኣዊ መሰላትን፡ ገበናት ኣንጻር ሰብኣውነትን ኣብ ኣጀንዳ ማሕበረሰብ ዓለም ብምምብጽኡን ክዛረበሉ ስለዝጀመረን፡ ብዝዓሞቐ ኽምርመር ይደፍእ ብምህላዉን፡  
•    ነቶም እንተስ ብፍርሒ፡ እንተስ ብእንታይ ገደሰኒ ክሳብ ሕጂ ክዛረቡ ዘይከኣሉ ዘለዉ ኤርትራውያን ዓቢ ድቃስ ዘይህብን ሕልና ዝቁስቑስን፡ መርገጺ ክወስዱ ዝድርኽን ብምዃኑ
•    ናይዚ ኩሉ እኩብ ድምር ድማ ኣብ ኣእምሮ ጉጅለ ህግደፍ ዝፈጥሮ ስነኣእምሮኣዊ ስዕረት ዓቢ ብምዃኑ   

እዚ ሰላማዊ ሰልፊ ልክዕ ከም ምድምሳስ ናደው ዕዝ ኣብ ብረታዊ ቃልሲ፡ ከም ነጥበ መቀይሮ ኣብ ቃልሲ ንዲሞክራሲያዊ ለውጢ ኣብ ታሪኽ ኤርትራ ብፍሉይ ክዝከር ምዃኑ ዘየጠራጥር እዩ።

ሕጂ'ከ ናበይ?

እዚ ሰላማዊ ሰልፊ እዚ እቲ ኣብ ደንበ ደለይቲ ለውጢ ውሒዱ ዝጸንሐ ፍናንን፡ እምነትን ኣብ ኤርትራውነትን፡ ሓድነት ኣብ ናይ ሓባር ዓላማን ዳግም ኣበራቢሩ ኣሎ። ለውጢ፡ ብስራሕን ውዳበን ጥራሕ እዩ ክመጽእ ዝኽእል። ነዚ ተበራቢሩ ዘሎ መንፈስ ከየጥፋእካ ብኸመይ ብዝበለጸ ተወዲብናን ሰሪሕናን፡ ንምልኪ ስዒርና፡ ነታ ንደልያ፡ ሰላም፡ ቅሳነት፡ ፍትሒ፡ ነጻነት፡ ዝዓሰላ ብሕጊን ቅዋምን እትመሓደር ኤርትራ ጋህዲ ንገብር ዝብል ሕቶ ኩላትና ክንምልሶ ዘሎና ወሳኒ ሕቶ እዩ። ድምጺ ነፍሲወከፍና ከም ማዕበል ኰይኑ ነዚ ዘሎ ምልኪ ጸራሪግዎ ክኸይድን ነታ ንሓልማ ኤርትራ ጋህዲ ክትከውንን ዓቢ ተራ ከምዘለዎ ተገንዚብና ድምጽና ነስምዕ።  ነፍሲወከፍና ስርሐይ ኢልና ሓደ ሰብ ናብ ደንበ ደለይቲ ለውቲ ከነምጽእ እንተኽኢልና ለውጢ ኣብ ዝሓጸረ ግዜ ክረጋገጽ ምዃኑ ዘጠራጥር የብልናን።
ኤርትራዊ ምንቅስቓስ ንዲሞክራስን ሰብኣዊ መሰላትን ደጊሙ ደጋጊሙ ዝብሎ እንተልዩ ናይ ኤርትራ ሕቶ ናይ ሞትን ሕይወትን፡ ከም ህዝብን ሃገርን ምህላውን ዘይምህላውን ሕቶ እዩ። ሕቶ ኤርትራ ናይ ሕግን ሕጋውነትን ፍትሕን ሕቶ እዩ። ሕቶ ኤርትራ ናይ መሰልን ሓርነትን ሕቶ እዩ። እሞ ኤርትራውያን ኩልና ነዚ ሕቶ እዚ ንምምላስ ዳግም ናይ ቃልሲ መንፈስና ነበራብር።

እወ ክወግሕ እዩ!
እወ ንኽእል ኢና!

ኤምዲሰመ
02 ሰነ 2015
ፕሪቶርያ