http://ascenteq.com/project/epdp

ከመዓልኪ ወርሒ 5 ወርሒ ግንቦት !

ራሕሲ ጠሊ ተስፋ ዓዃይ ንሓረስቶት፡

ጸሓይ በሪቃ ብፍስሃ ተቀልቂላ ብመስኮት

ሕጻናት ብማይ ክጨናጓጉዑ ብዝሑል ልዙብ ምቆት

ማላውቲ ይዕንድሩ ዕያዊቲ ምራኹት ጥቦት

ፍትውቲ ወርሒ ተስፋ ኣዝመራሰናይ ክራማት።

                               ሰላም ንዓኺ ወርሒ 5 ወርሒ ግንቦት !!

                                ባሕቲ መዓልትኺ ናይ ሪሂጸ በላዕ ንግደት፡

                               ፍረ ቃልሱ ዝጭራሓላ ብስጡም ሓድነት

                               ቀጻሊ ጥምጥሙ ዝእውጀላ ኣንጻር መዝማትነት

                               ኣርማኡ ገቲሩ ዝሕብረላ ኣህጉራዊ ምሕዝነት።

ድርብ ክብርን ዝኽርን ኣዓኺ ወርሒ ግንቦት !!!

ዕለት 24 ተወሲኻ ነጻነት ናይ ዕሸል ሃገርና ልደት፡

ሳላ ጀማሪ ሰራዊት ሓርነት ደምዳሚ ህዝባዊ ሰራዊት

ብድርብ ቃልሲ ህዝብና እኩብ ድምር ዓወት ፡

ድሕሪ 30 ዓመታት ሲዒሮሞ ንገዛኢ ባዕድነት

ልዕላውነት ለቢሳ ኤርትራና ወጺኣ ነጻነት።

                               ተሻቂለ ኣነስ ወርሒ 5 ወርሒ ግንቦት !!!!

                                 ብደስታ ክንዝክረኪ ብዓቢ ፍስሃ ብኽብረት

                                 ብፍናን ሓረስታይ ኣብዑሩ ዘይሃሲ ፈኲስ ስበት ፡

                                 ኣህጉራዊ ምሕዝነት ንግርማ መሰል ሃገራውነት

                                 ኩልና ደቅኺ ተደሲትና ብሓባር ክንዲ ንጻወት ፡

                               መንጎ መንጎ ኮይኑና ብድርብ ዝኽርኺ ከይንድሰት

                               ገቲኡና መላኺ ስርዓት ህግደፍ ቀይርዋ ባርነት ።

27 ዓመቱ ኮይኑ ዲሂኹ የእትዩና ኣብ ደልሃመት !!!

ንሃገርና ሽማ ኣባላሹ ጌሩዋ ንጽልቲ ቁሸት ፡

ምስ ኩሎም ጎረባብትና ኣመል ገርዎ ክናቆት                                                              

ህዝብና ብሕሰም ገጹ ተደዊኑ መሲሉ ሕመት

ብራዕዲ ብሂወቱ እናረኣየ ገርዎ ከም ዝዕመት

ትሕቲ ምድሪ መቊሕዎ ከይዛረ ከይሕተት

ሕድሪ ስዉኣት መብጽዓ ህዝቢ ተረጊጹ ይዝመት

ኣረሚን ስርዓት ደፊኣኡ ኣኽሊል ጥልመት።

                               ሰሚዕኪ ዶ ወርሒ 5 ወርሒ ግንቦት ?

                               እዚ ትምክሕተኛ ብዱዕ ተዓዛዚርዎ ንዕቀት

                              መፍትሒ ሓብሪ ኣሎኪ ናይ ሰውራ ሙኩር መሰረት

                               ንዒ እባ ገለ ግበሪ ኣንቲ ተቃላሲት ወርሒ ግንቦት

                               ኣበግስዮ ሰውራ ሸቃላይ ዝገንፈሎ ጭቆና ምረት

                               ይኣኽለካ በልዮ ንዉልቀ ምልኪ ግበርሉ ነባሪ ደረት

                                ክድሕን መንእሰይ ካብ ሰሃራ ሲናይ ቀለብ ዓሳ ህልቀት።

ነባሪ ክብርን ዝኽንር ንጀጋኑ ሰማእታትና !!!

ባሕቲ ግንቦትን 24 ግንቦትን ንወትሩ ክበራ !!!

ውድቀት ንዉልቀ መላኺ ስርዓት ህግደፍ።

ጸሃየ ቀለታ ... 2006 >>>>>> >>>>>> 2018

ወዲ ሰብ ካብ ግዜ ህጻንነቱ ጀሚሩ እዩ ኩነታት ስድራቤቱን ከባቢኡን ክፈልጥን ክመሃርን ዝኽእል። ካብዚ ነቒሉ ብዕድመ እናደፍአ ኣብ ዝኸድሉ እዋን ከኣ ካብቲ ግዜ ንእስነቱ ኣትሒዙ ምስቲ ማሕበራዊ መስርሓት ይኹን ወይ ትምህርቲ ዝረኽቦ ተመክሮ ኣብ ኣተዓባብያኡን፥ ኣተሓሳስባኡን እንተስ ብኣውንታ ወይ ብኣሉታ ክጽሎ ምዃኑ ዘይተርፍ እዩ። ካብዚ ብምንቃል ፍትሓዊነትን ቅንዕናን እትኣምን ሓንቲ ስድራቤት፥ ብመንጽር ለይትን መዓልትን እትቆያቑን እትበኣስን ስድራ ቤት ዝወለድ ቆልዓ እንታይ ዓይነት ባህርያት ከም ዝህልዋ ክንግንዘብ ንኽእል ኢና። ልክዕ እዩ ወዲ ሰብ ንዓቕሚ ኣዳምን ህይዋንን ምስ በጸሐ መኻይዱ እንተዘየነጸረ፡ ወይ ኣብ ደልሃመት ወይ እውን ኣብ ስልጣኔ ገጹ ክኸይድ ምዃኑ ዘካሕድ ኣይኮነን። ከምቲ”መን ምዃንካ ክነግረካስ ምስ መን ከም እትኸይድ ንገረኒ” ዝበሃል ኢዩ ነግሩ::

ቀዳሞት ወለድና ብፋላይ ንጓለንስተይቲ ዝምልከቱ ብርክት ዝበሉ ሕግታት ኣመዝጊቦም ኢዮም። ሓደ ካብኡ ንጓልንስተይቲ ብዝኾነ ይኹን ናይ ዓመጽ ኢድ ከየንብረላ ዝብል ሕጊ ነይሩ። “ስለምንታይ እዮም ወለድና ከምኡ ሓጊጎም?” ዝብል ሕቶ ክለዓል ናይ ግድን እዩ። እቲ መልሲ ጓለንስተይቲ ብፍጥረታ ድኽምቲ እያ። እዚ ማለት ብሓንጎል ዘይኮነስ ብኣካል ማዕረ ወዲ ተባዕታይ ሓይሊ የብላን ካብ ዝብል ብሂል እዩ ዝነቅል። ስለዚ እቲ ሓይላን ዝከላኸለላን ሕጊ እዩ ዝብል መልእኽቲ ንምትሕልላፍ እዩ።

ሎሚ ኤርትራውያን ናብራ መሪሩናን ፖለቲካዊ ቅሳነት ብምስኣናን፥ መሰላትና’ውን ብምግፋፉ፥ ናእሽቱናን ዓበይትናን ሃገርናን ህዝብናን ጠንጢና ኣብ ፈቐዶ ሃገራት ብምስዳድና ነቲ በቦታትና ዘጽንሐ ሕጊ እናጠሓስና ንኸይድ ኣሎና። ንክብረት ጓለንስተይቲ እውን ኣብ ግምት ንእቱ የለናን። ስለዚ ኣካላዊ ይኹን ዘለና ኤርትራውያን በደል ኣብ ልዕሊ ኤርትራዊት ሓብትና ምፍጻም ቅኑዕ ወይ ቅቡል ኣይኮነን። ሎሚ ኣብ ስደት ብምህላውና እቲ ሕጊ ዓድና እንተዘይኣኽበና፥ ጽባሕ ዓድና ርህይዋ፡ ቅዋማ ኣጽዲቓ ስርዓታ ምስ መስረተት ግና ወይልኡ ነቲ ኣብ ልዕሊ ኤርትራዊት ጓለንስተይቲ በደል ይኹን ጉድኣት ወይ ዝኾነ በደል ዝፈጸመን መሰላ ዝገሃሰን።

ኣብ ስደት ኣብ ዓዲ ጓና ኰይንና ንደቂ ኣንስትዮ ኣሕትና ክንብድል ቅኑዕ ስነምግባር ኣይኮነን። ንጓለ ንስተይቲ ዝውጽዕ ወይ ዝብድል ወይ’ውን ኣካላዊ ማህሰይቲ ዘውርድ ስልጡን ዘይኮነስ ኣዝዩ ናይ ክፍለዝመና ንድሒሪት ከምዘሎ እዩ ዝእምት። እዚ ኣብ ስደት ዝፍጸም በደል ዝኸበርኩም ኤርትራውያን ኣብ ልዕሊ ደቂ ኣንስትዮ እትፍጽምዎ ዘሎኹም ግፍዒ ናይ ብሓቂ ጸረ-ምዕብልናን ስልጣነን ምዃኑ ክትግንዘቡ ይግበኣኩም።

ኣብ ኤውሮጳ፥ ኣመሪካ፥ እስራኤል፥ ዩጋንዳ፥ ደቡብ ሱዳንን ኢትዮጵያን ኮታ ኣብ ኩሉ ክፍለ ዓለማት ዝርከቡ ኤርትራውያን ደቂ ተባዕትዮ ክሳ ክንደይ ኢዮም ኣብ ልዕሊ ደቂ ኣንስትዮ ናይ ኣኽብሮት፥ ምሕብሓብን፥ ምትሕግጋዝ ጠባይ ዘለዎም። ክንደይከ እዮም ፍትወት ነፍሲ ኣጥቂዕዎም፥ ነታ ሓወይ፥ ረደኣየይ፥ ከዋንየይ ኢኻ ኢላ ብእምነት ዝተጸገዓቶም ኤርትራዊት ዘጨንቕዋ፥ ገንዛባ ክዘምቱን፥ ካብኣ ወሊዶም ዝኽሕዱን። ወረ ክሳብ መቕተልቲ ዝበጽሑስ ናይ ብሓቂዶ ሕልና፡ ፈሪሃ እግዚኣብሄርን ሕግን ኣሎዎም ድዩ ዘብል እዩ።

ዝተቖጠዐን ተስፋ ዝቖረጸን በዓል ሓዳር ብፍላይ ብተባዕታዊ ጸብለልትነት ዝተጠቕዐ እንተ ኮይኑ ጎዳእን ጭካኔ ዝመልኦ ሕልና ዝውንን ክኸውን ስለዝኽእል፡ እታ ሕያወይቲ ጓለንስተይቲ ብእምነት ዝቐረበቶ የዋህ ጓለንስተይቲ ክመጻ ዝኽእል ሳዕቤን ስለዘይትፈልጥ ክትጥቃዕ ምዃና’ኳ እንተተረደአት ክተምልጠሉ ዘይትኽእል ኩነት የጋጥማ ከምዘሎ ናይ ኣደባብይ ምስጢር እዩ። እዚ ከኣ ነቲ ኣብ መጀመርያ ዝነበረ ጽቡቕን ምውቕን ፍሽኽታን ሓልዮትን ዝመልኦ ዝምድና ምኽንያቱ ብዘይተፈልጠ ሃንደበት ናብ ምብራዝ ገጹ ይድይብ። ኣብ መንጎ ጓለንስተይትን ወዲተባዕታይን ዝነበረ ፍቕሪ ድሮ ኣብ ምህሳስ ይበጽሕ እሞ እቲ ኣጆኺ ክብላ ዝግባኦ ሓዋ ናብ ክፍኣትን ተንኮልን ገጹ ይጓዓዝ። እዚ ከኣ ፍትሓውን ርትዓውን ካብ ምዃን ወጺኡ ስሰዐ፥ ፍትወት ነፍሲ፥ ሕማቕ ልምድን ባህልን ምዝውታር ዝወልዶ እዩ። ብፍላይ ድማ በቲ “ንጓል ኣንስተይቲ ኣብ ትሕቲ ቁጽጽርካ ዘይተእቱ እንተዀንካ ልኡኽ ሰበይ ኢኻቲ” ዝበሃል ኣጉል ፍልስፍና ዝግዛእ፡ መወዳኣትኡ ናብ ሓደጋ እዩ ዘቃልዕ። ስለዚ ኣማን ብኣማን ሓውካ ኣይበድልካ እዩ’ሞ ሓውካ ኣይበድልካ እዩ ነገሩ።

ናይ ድራር ምሸት ፣ ሓገዝ ንናጽነት ኤርትራ ክዉን ዝገበሩ ውጉኣት ሓርነት 

ንኣብ ከሰላ (ሱዳን ) ዝነብሩ ናይ ሓርነት ውግኣት ንምሕጋዝ

ልዕላውነት ሃገርና ኤርትራ ብከቢድ መስዋእትን ስንክልናን ከምዝተረጋገጸን ፥ ክንዕቅቦ ዘሎና ክቡር ታሪኽና ምዃኑ ዘማትእ ኣይኰነን። ንክቡራት ስዉእትና ሞጐስ ፥ ነዞም ንናጽነት ሃገር ንምውሓስ ሕይወቶም ብስንክልና ዝኸፈሉ ጀጋኑ ድማ ኣለናልኩም ክንብሎም ኤርትራዊ ሕልና እዩ ። ምስዚ ልዕሊ 40 ዓመት ዕድመ ዝገበረ ናይ ኣካል ስንክልና ተደረብቲ ሕማማት ከም ሕማም ሽኮር ፣ ብዝሕን ጸቕጢ ደምን ካልኦት ናይ ውሽጣዊ ክፍለ ኣካላትን ሽግራትን እናሕለፉ ዝነብሩ ዘለዉ ጀጋኑ ስንኩላን ብጾት ከምዘለዉና ክንዝክር ናይ ነፍስ ወከፍ አርትራዊ ዜጋ ሓላፍነት ምዃኑ ኣይትዝንግዕዎን ንብል።

ኣብ ሆላንድ እንነብር ጉዱሳት ኤርትራውያን ንጸገማቶም ብምርዳእ ብወግዒ ዝተመዝገበን ዝነጥፍን ማሕበር ካብ ዝቐውምን ዓመታት ዘለዎ ጥራይ ዘይኰነስ በብእዋኑ ካብ ኣባላቱን ካብ ኤርትራውያን ሰብ ሕልናን ዝተዋጽኤ ሓገዝ ፣ ኣብ ናብራ ኣካለ ስንኩላን ዓቢ ተራ ዘለዎ ዓቕሙ ዝፈቕዶ ክሕግዝ ዝጸንሐን ዘሎን ማሕበር ኣሎና። ሽማግለ ማሕበር ንዕለት 27 ግንቦት 2018 ናይ ድራር እንግዶት ብምድላው ዓቕምናን ሕልናና ዝፈቕዶ ሓገዛት ንምግባር ብኽብሪ ንዕድመኩም ።

ብሂል ለባማት ኣቦታትና፥ “ ሓሙሳ ለሚን ንሓደ ሰብ ሸከሙ ፡ ንሓሙሳ ሰባት ድማ ጨነኦም “ ከምዝበሃል ኩልና ሰብ ሕልና ዓቕምና ብዘፍቅዶ፥ ኢደይ ኢድካ እንተዳኣ ኢልና ፥ መጀመርያ ቅዱስ ግብረ ሰናይ ስለዝኾነ ንሕልናና ነቕስን። ብኻልኣይ ደረጃ ድማ ንኹልና ኤርትራውያን ሓደ ዝብጹሑና ንሃገርናን ህዝብናን ክብሉ ዝሰንከሉ ዜግነታዊ ግደታና እዩ ።
ብዝተፋላልየ ምኽንያት ኣብዚ መዓልትን ግዜን ክጥዕመኩም ዘይክእል ብሕሳብ ባንክ ክትልእኩ እንተደሊኹም፥ ናብዚ ሕሳብ ባንክ ክትሰዱ ትኽእሉ።

STG. ERITREAN DISABLED FOUNDATION IN THE NETHERLAND
BANK : NL20INGB 0005169954 ጌርኩም ክትሰዱ ትኽእሉ

ዕለት 27 ግንቦት 2018. (27-05-2018)
ጊዜ ሰዓት 14:00 ድሕሪ ቀትሪ
ቦታ Derde Oosterparkstraat 159
1092 CW Amsterdam.

መጓዓዝያ Amsterdam CS Metro 53 ,51 , 54 ኣብ (Wibautstraat) ትወርዱ

ንኣድላይ ሓበሬታ ፥ 06 863 582 78 ተወከሱ

ብድሓን ምጽኡ !!!

ሽማግለ ማሕበር ኣካለ ጽጉማን ኣብ ሆላንድ

“ኤርትራን ህዝባን ከመይ ኣለዉ?” ዝብል ሕቶ ምስ እንሓትት፡ መልስና ሰፊሕን ብብዙሕ መዳያት ዝረአን ከም ዝኸውን ዘጠራጥር ኣይኮነን። በቲ ኮነ በዚ ይረኣ ግና ከርሰ-ነግር መልስና “ኤርትራን ህዝባን ኣብ ኣዝዩ ኣሻቓልን እዚ ጐደሎ ዘይበሃልን ሕማቕ ዘበን ዘላ ሃገር” ዝብል ማእከላይ ስሕበት ከምዝውንን ፍሉጥ እዩ። እዚ ሓሳብዚ ንጉጅለ ህግደፍ ስለ ዝጸላእካዮ ንምጽላምን ጸለሎ ንምቕባእን ዝበሃል ዘይኮነ፡ ህልዊ ኩነታት ኤርትራን ህዝባን ነዚ ሕማቕ ምስሊ ስለ ዘመልክት እዩ። ንጉጅለ ህግደፍ ናቱ ርትዓዊ ሚዛን ንሃቦ እንተበልና’ውን ካብዚ ተሓታትነት ከነውጸኦ ኣይከኣልን።

ኣብዚ እዋንዚ ኤርትራን ህዝባን ዘስምዕዎ ዘለዉ ድምጺ ናይቲ ኣብ ልዕሊኦም ዝወርድ ዘሎ በደል ቃንዛ ጥራይ ኣይኮነን። ካብዚ ዘለዉዎ ናይ ደልሃመት ግዜ ወጺኦም ናይ ራህዋ ብርሃን ምርኣይ ቀንዲ ባህጎም እዩ። እዚ ባህግዚ ናብ ሓደ ዘይድህሰስ ኣካል ዝለኣኽን ብትምኒት ጥራይ ዝመጽእን ስለ ዘይኮነ፡ ኣቕጣጭኡ ብሓፈሻ ናብ መላእ ህዝብን ሃገርን ኤርትራ ብፍላይ ከኣ ናብቲ ለውጢ ንምምጻእ ተወዲቡ ዝቃለስ ዘሎ ኤርትራዊ ኣካላትን ግዱሳትን ዘቕነዐ እዩ። ስለዚ ኣብዚ እዋንዚ ኤርትራውያን ኩልና ኢድና እንሕውሰሉ ህዝባውን ሃገራውን ሓላፍነት እዩ ኣብ ቅድሜና ዘሎ እምበር ሓደ ኣምጻኢ እቲ ካልእ ከኣ ተቐባልን ተዓዛብን እንኾነሉ እዋን ኣይኮነን። እዚ ክበሃል እንከሎ ጉጅለ ህግደፍን ውሑዳት መሳርሕታቱን እዚ ሓላፍነት ከም ዘይምልከቶም እኳደኣ ብኣንጻሩ ከምዝስሉፉ ብዘይምዝንጋዕ እዩ።

ጉዳይና ጉዳይ ኤርትራ፡ ዝተሓላለኸ፡ ኣይኮነንዶ ናትና ናይቶም ደለይቲ ለውጢ ኤርትራውያን፡ ናይ ካለኦት ምእንቲ ፍትሕን ርትዕን ዝስለፉ ወገናት ፍትሓዊ ሓገዝ ኣብ እንደልየሉ መድረኽ ኢና ዘለና። ናይቲ ካልእ ሓገዝ ንክንረክብ ግና ቅድም ንሕና እቶም ኣብ ቀዳማይ መስመር እንስራዓ ሰብ ዋኒን፡ ኤርትራዊ ናይ ለውጢ ሓይልታት ኩሉ ዓቕምና ጸንቂቕና ብፍትሓዊ ኣገባብ ክንጽዕት ናይ ግድን እዩ። ኣብዚ ወጽዓ ኤርትራውያንን ጸረ ህዝቢ ተግባራት ህግደፍን ኣብ ዓለም መዛረቢ ኮይንሉ ዘሎ እዋን ድምጽና ክትሕት እንከሎ “ሓጋዚታ ተረኣየትስ መዲዳ ትሕባእ” ዝብል ምስላ ክምሰለና እዩ።

እቲ ቀንዲ ጠመተና ብዛዕባ ህልውቲ ኤርትራን ካብዚ ኣትያቶ ዘላ ቅልውላው እትወጸሉ ጥበብ ሃሰስ ምባልን ከም ዝኸውን ዘዳዲ ኣይኮነን። ምስዚ ኩሉ ግና ሎሚ ካብ ትማልን ጽባሕን ነጺልካ ዝረአ ህላወ ስለ ዘይብላ፡ ንናይ ሎሚ መደባትና ብዘየዕንቅፍን ንድሕሪት ብዘይመልስን ኣገባብ ብዛዕባ ናይ ጽባሕ ኤርትራ ክንሓስብ’ውን ንቡር እዩ። እቲ ንጽባሕ እንሓስቦ ግና እዚ ናይ ሎሚ ዕማም ምድፋእ ምስ ኣበየና ንመሕብኢ ድኽመትና ወይ መህደሚ ካብ ቃልሲ ዘይኮነ፡ ብመንጽር ታሪኽን ድሌት ህዝብን ኤርትራ፡ ዝቃነ ብዙሕነታ ዘበርኽ ክኸውን ይግበኦ። ዝያዳ ኩሉ ድማ ኣብ ክብራ፡ ልኡላውነታት ሓድነት ህዝባን መሬታን ዘይወላወልን መሊሱ ዘትርርን ምርጫ ክኸውን ይግበኦ።

ብኣንጻሩ ህዝቢ ኤርትራ ብናይ ህግደፍ ልጓም ተሻቢቡ፡ ኣይኮነንዶ ብዛዕባ ናይ ጽባሕ ባህጉ፡ ናይ ሎሚ ቓንዝኡ ብዝምልከት እውን ድምጹ ከስምዕ ኣብ ዘይከኣለሉ ብስሙ “ከምዚ ይሕሾ” እንዳበልካ ንክውንነቱ ዘይውክል ፍታሕ ክትመርጸሉን፡ ኣብ ክንዲ ሓቀኛ ልሳኑ እትኸውን ንዘይድምጹ “ድምጽኻ እዩ” ክትብለሎን ሓላፍነታዊ ኣይኮነን። ዘይሓላፍነታዊ ኣብ ርእሲ ምዃኑ ዘይትግበር ትምኒት’ውን እዩ። እዚ ነቲ ኣብ ቅድሜኻ ተገቲሩ ዘሎ ጉጅለ ህግደፍን ናይ ጭቆና ትካላቱን ናይ ምውጋድ ዕማም ጓሲኻ፡ ብዛዕባ ሕቶ ሃይማኖት፡ ብሄር፡ ኣግኣዝያንነት ወረ ክንደይ ሸጓሹግ “ወኻዕ” ክትብል ምውዓል ኣዝዩ ዘተዓዛዝብ እዩ። ዝተፈላለየ መፍትሒ ሓሳባት ተላዒሉ ህዝቢ ኤርትራ ናይ “እወ ወይ ኣይፋል” ብይን ኣይሃበሉ ማለት ኣይኮነን። እንታይ ደኣ ሓላፍነቱ ናይ ህዝቢ፡ ግዜኡ ከኣ ድሕሪ ምውጋድ ጉጅለ ህግደፍ፡ ውሕስነቱ ድማ ኣካል ናይቲ ብናይ ህዝቢ ዘይግዱብ ዲሞክራስያዊ ተሳትፎ ዝጸድቕ ቅዋም ምዃኑ ንምስትብሃል እዩ። “ክንብርኩት ዘይክንብርኩት ኣብ ማይ ንብጻሕ” ናብ ምባል ዘብጸሓና ከኣ እዚ እዩ።

ኣብዚ ቀረባ መዓልታት፡ ሎሚ ከም ሓድሽ ዝተጀመረ ዘይኮነ ካብ ቀደም ጀሚሩ ፈኸም ክብል ዝጸንሐ ንኤርትራን ኢትዮጵያን ዝምልከት ድምጺ ሰሚዕና። እቲ ብዛዕባ ዝነበረ፡ ዘሎን ኣብ መጻኢ ክኸውን ዝግበኦን ዝምድና ክልቲኣን ሃገራት ብዝምልከት ምስማዕን ምንባብን ልሙድ ኮይኑ ዘሎ እዩ። ናይ ነፍሲ ወከፍ ብሂላት ዋናታትን ምኽንያቶምን ብውሕዱ “ዓይንናን ዘይርእዮ ልብናንከ ዘይስሕቶ” ብዝብል ውሕልነት ምርዳኡ ዘጸገም ኣይኮነን። ኣብዚ እዋንዚ ከኣ ጉዳይ “ፈደረሽንዶ ኮንፈደረሽን” ኤርትራ ምስ ኢትዮጵያ ክጋማዳሕ ንሰምዕ ኣለና። ከምዚ ዓይነት ሓሳብ ምምጽኡ ነቶም በሃልቱ ዝምልከት እምበር ከም ሓደ ተኣምር ዝውሰድ ኣይኮነን። ክልተ ነገራት ምስትብሃል ግና የድሊ። እቲ ቀዳማይ እዚ መሰልን ሓላፍነትን ውሑዳት ምሁራት ዘይኮነ ናይ ህዝቢ ጉዳይ ምዃኑ። እቲ ካለኣይን ቀንድን ከኣ፡ ኤርትራ ከም ሃገር ቅሳነት ተሓሪምዋ፡ ብብዙሕ ኣሉታዊ መምዘንታት ኣብ ቅድሚት እንዳተሰርዐት፡ ኣብ ክንዲ “ብኸመይ ካብ ኢድ እቲ በላዕ ሰብ ጉጅለ ኣናጊፍና ናብ ንቡር ህይወታ መሊስና ኣብ ጽኑዕ ባይታ ከም እትረግጽን ንገብራ” ምባል ብዛዕባ ኣብ መጻኢ ምስመንን ብኸመይ ኣገባብን ትዛመድን ንቕድሚት ምስራዕ ግጉይ ኣቀማምጣ እዩ ዝኸውን። እቲ ቀንዲ “ክንብርኩት ዘይክንብርኩት ኣብ ማይ ንብጻሕ” ዘብል ከኣ እዚ እዩ።

ትርጕም:- ቤት ጽሕፈት ዜና ሰዲህኤ

ረቡዕ 25 ሚያዝያ 2018 ሰዓት 11.02

ውሳኔ ኤሚግረሽ

ቤት ጽሕፈት ኤሚግረሽን ነቶም  ኣብ ሽወደን ምስ ዘለዉ ቀረቦም ንምጽንባር ዝተፈቕደሎም ኢርትራውያን ናብ ሽወደን ከግሾም ዝኽእል ግዝያዊ ናይ ወጻእተኛታት ፓስፖርት ተባሂሉ ዝጽዋዕ ሰነድ ክህቦም ኢዩ።

ናይ ወጻእተኛታት ፓስፖርት፡ ናይ ሽወደን ግዝያዊ ፓስፖርት ኰይኑ፡  ብቤት ጽሕፈት ኤሞግረሽን ናይ መንበሪ ፍቓድ ንዝረኸበ ግን ፓስፖርት ዘይብሉ ሰብ ዝውሃብ ፍልይ ዝበል ዓይነት ፓስፖርት ኢዩ።

መንነቶም ንኣብነት ብሰነድ ወይ ዲ.አን.አይ. ምርመራ (DNA-prov) ዘረጋገጹኤርትራውያን፡ ካብ ሎሚ ጀሚሮም ናብ ሽወደን ዘእትዎም ናይ ወጻእተኛታት ፓስፖርት ክውሃቦም ኢዩ።

ቅድም ክብል፡ ኤርትራውያን መንነቶም ንምርግጋጽ ናይ ኤርትራ ፓስፖርት ከምጽኡ ብቤት ጽሕፈት ኤሚግረሽን ይሕተቱ ነይሮም። ቅድሚ ክልተ ሰሙን ኣቢሉ ግን ቤት ፍርዲ ጕዳያት ኤሚግረሽን ኤርትራውያን ነበርቲ ሽወደን ንስደተኛታት ኣዝማዶም ካብ ኤምባሲ ኤርትራ ፓስፖርት ክሓቱ ሓደገኛ ምዃኑ በጺሕዎ።

ኤርትራውያን  ቤተ-ሰብ ናይ ስደተኛታት ኣብ ኤምባሲ ኤርትራ ከይዶም  ንኣዝማዶም ዝኸውን ፓስፖርት ክሓቱ ሓደገኛ ኢዩ ካብ ዝብል ውሳኔ ቤት ፍርዲ ብምግጋስ፡ ቤት ጽሕፈት ኤሚግረሽን ሽወደን፡ እቲ ውሳኔ ነቶም ኣብ ሽወደን ኣዝማድ ዘለዎም ስደተኛታት ጥራሕ ዘይኰነስ፡ ንዝዀነ ኤርትራዊ ናይ ቤተ-ሰብ ምትእኽኻብ ዘጠቓልል ክኸውን ኣለዎ ዝብል ርእይቶ ኣለዎ።

Migrationsverket ger eritreaner tillfälliga pass

Publicerat onsdag 25 april kl 11.02

Migrationsverketom beslutet

1:30 min

Migrationsverket i Solna. Foto: Adam Wrafter/SvD/TT

Migrationsverket kommer att ge eritreaner som har rätt att återförenas med anhöriga i Sverige tillfälliga svenska så kallade främlingspass för att de ska kunna resa till Sverige.

Ett främlingspass är ett svenskt tillfälligt pass som Migrationsverket kan ge en person som fått uppehållstillstånd men som saknar pass.

Från och med nu är huvudregeln att eritreaner som har gjort sin identitet sannolik till exempel med hjälp av dokumentation eller DNA-prov, ska beviljas främlingspass för att kunna resa till Sverige.

Tidigare har Migrationsverket krävt att eritreaner bevisar sin identitet genom att visa upp ett eritreanskt pass men för ett par veckor sedan slog Migrationsöverdomstolen fast att det är farligt för anhöriga till flyktingar att be om pass på en eritreansk ambassad.

Det är med anledning av en ny dom i Migrationsöverdomstolen som slår fast att det är farligt för anhöriga till flyktingar att besöka en eritreansk ambassad för att be om ett eritreanskt pass.

Migrationsverket går längre än domstolen och anser att regeln ska gälla inte bara de som är anhöriga till en flykting utan samtliga eritreaner som har rätt att återförenas med anhöriga i Sverige.

 ውድብ ወይ ሰልፊ ምምስራት ካብ ምሕሳብ ካብ ምእማን ኢዩ ዝብገስ፡ ክንደይ እምነታት ክንደይ ኣተሓሳስባኸ ኣሎ ንዝብል ሰብ መልሱ ማእለያ የብሉን ኢዩ ፡ ስለዚ ክንደይ ውድባት ክፍጠራ ይኽእላ ንዝብል ሕቶ መልሱ ወሰን የብሉን። ኣብ ግብጺ ድሕሪ ዓርቢ ሓርነት 52 ሰልፍታት ፡ኣብ ጀርመን ድሕሪ ምፍራስ መንደቕ ጀርመን 82 ሰልፍታት፡ ኣብ ኢትዮጵያ 62 ሰልፍታት ተፈጢረን፡ እቲ ሕቶ ኣብ ምርጫ ክንደይ ሓሊፈን ኢዩ=====2 ክሳብ 3 ጥራሕ። ስለዚ ሰልፍታት በዚሐን ኢልካ ምስካፍ ኣገዳስነት የብሉን።

       ኣብ ናይ ኤርትራውያን ግን ውሒደን ዘበለኒ ምኽንያት ንጹር ዝኾነ መትከላዊ ፍልልይ ዳርጋ የብለንን። እተን ገሊኤን ውድባት ወይ ሰልፍታት ኢለን ንነብሰን ዘጠመቃ ኣብ ምርጫንምውድዳር ዘብቅዕ መትከል የብለንን፡ ምኽንያቱ ስርዓት ኢሳያስ ተኣልዩ ባይቶ ኤርትራ ኣብዝሃ ሰልፍታት ከፍቅድ ከሎ ሰልፊ ንክትከውን ከተማልኦ ዘሎካ መምርሒ ክህሉ ኢዩ፡ ገለ ኣብነታት ንምጥቃስ ኣብ ጀርመን ፓርቲ ክትምስርት ብዝሒ ናይ ኣባላትካ ክሳብ ክንድቲ ወሳኒ ኣይኮነን ግን ካብ ገበን ነጻ ምዃንካን 250 ደገፍቲ ኣብ ኣውስትርያ 2600 ደገፍቲ ኣብ ኢትዮጵያ 1500 ኣባላት ክምዘለውኻ ከተመስክር ኣሎካ፡ ኣብቲ መትከላትካ እውን ነቲ ናይታ ሃገር ቅዋም ዘይጥሕስ ክኸውን ኣለዎ።ኣብ ኩለን ከኣ ኣብ ውሽጢ ሃገር ካብ ዝቅመጡ ኣባላት ይኹኑ ደገፍቲ ዝብል ሕጊ ኣለወን። ኣብቲ ብህግደፍ ዝወጸ መምርሒ እኳ ሰልፊ ንክትከውን 2/3 ካብ 5 ብሄራት 1/3 ከኣ(6.5…_b.at least 1/3 of them must be followers oft he islamic or christian faiths) ኣስላም ወይ ክርስትያን ዝሓቆፈ 3000 ደገፍቲ ዝፈረሙሉ ዝብል ስግንጢር ኢዩ። በቲ ናይ 1997 ዝወጸ ቅዋም እዘን ኣብ ውጻኢ ዘለዋ ሰልፍታት እንተዝዕቀና ሓንቲኳ ኣይምሓለፈትን፡ ሓድሽ ቅዋም ይፍጠረልና ኢዩ ዘብል።

     ኣብ ወጻኢ ዘለዋ ሰልፍታትናን ውድባትናንከ እንታይ ይመስላ፡ እተን ክብድ ዝበለ ዕላማ ዘለወን ዕልመናውያን ፈደራልያ ውያን መሰል ብሔራት ጸጋማውይን የማንውያን ወዘተ….. ምስ በልና፡ ኣተን ብወገን ብሃይማኖት ብኣውራጃ ዝቆማ ግን ኣብ ውሽጠን ዝተፈላለየ ሰልፋዊ እምነት ዘለዎም ሰባት ዝቆማ ኢየን፡ ካብዚ ተበጊሶም እውን ሲቪክ ኢና ዝበሉ ለባማት እውን ኣይተሳእኑን ። ኣብቲ ብዙሓት ዝመስላ ሓንቲ ሰልፋዊ እምነት ዘለወን ግን ዘገርም ኢዩ፡ ሰውራዊ ባይቶ ቅድም ኣብ ክልተ ተመቅለት፡ ጸኒሐን ከኣ ኣብተን ክልተ ዝነበራ ኣብ 8 ተመቃቀላ፡ ኣብ ካልኦት ውድባት እውን ተመሳሳሊ ምፍንጫላት ተራእዩ ኢዩ፡ ገለ ስም ከይቀየራ ገለ ስም ቀይረን ግን መትከላተን ኣይቀየራን፡ ስለዚ ከምቲ ሓደ ይኾኑ ሰለስተ ይኾኑ ዝተባህለ ሓደ ይኾኑ ሸሞንተ ይኾኑ ኢዩ ነገሩ። ክሰምራ ከለዋ ኸኣ ከምታ ዝተፈናጨልዋ፡ ማለት ብስልጣን ብገንዘብ ብወገን ብኣነነት ደኣምበር ብመትከል ስለ ዘይተፈናጨሉ፡ ኣብ መን መርሐ ስልጣን ይውሃሃቡ፡ ክሳብ ሎሚ ኣብ ዝተራእየ ምፍንጫላት ብመትከል ዘይኮነ ምንባሩ ተመሊስኩም እንታይ ፈንጪልኩም ኢልኩም እንተሓቲትኩም፡ ንሕና ጸጋማውያን ኢና ንሶም የማንዋያን ኢዮም ዝብል የለን፡ ገለ ኣብነታት ንምጥቃስ ኣብ ጎነጽ ኣይኣምኑን ኢዮም፡ ኣብ ባይቶ ምክፋል ኣብዮም፡ ንኢትዮጵያ ኣይንኣቱን ኢና ኢሎም. . . ወዘተ. እቲ ሓቐኛ መልሲ ግን ምስጢር ኢዩ።

     እቲ ጽባሕ ነውጽኦ ቅዋም ሓደ ዓይነት መትከል ዘለኩም ተጠርኒፍኩም ምጹ፡ ኣስማት ኣይኮናን ንቅበል መትከላት እምበር እንተዝብል ኮይኑ፡ እቲ መራጺ እውን እንታይ ኢዩ መትከል ክፈልጥን ክመሃርን ምኸኣለ። አንጂነራት ገዛ ንክሰርሑልካ ዝተወዳደሩ ኩሎም ሓንቲ ዓይነት ቅርጽን ዋጋን እንተኣቅሪቦሙልካስ ንመኖም ኢኻ ክትህባ፡ ስለዚ እተን ኣሎና ትብላ ሕደ ዓይነት መትከል ዘሎክን ሰልፍታት ካብ ጽባሕ ተንጠልጢልክን ከይተመረጽክን ትተርፋ፡ መትከላዊ ስምረት ገርክን ህዝብኽን ክትከስባ ተቃለሳ። ኤርትራዊ ብዙሕ ተመኩሮ ስለ ዘለዎ፡ ብሕጂ ዝወጽእ ቅዋም ነባሪ ፍታሕ ዘምጽእ ንክኸውን፡ ነቶም ኣብ ታሪኽና ዘመስከሩ ለባማትን ምሁራትን ሃገርና እዚ ዕድልዚ ክወሃቦም ኣለዎም።  

   ከምዚ ንከይከውን ኣብ ጊዜ ኪዳን ዝተመስረተሉ ( ናይ ሰልፍታት ቅዋም ካብ ዘይሃለወና) ነዘን ውድባት መዐቀኒ ንግበረለን ተባሂሉ ተፈቲኑ ነይሩ፡ ገለ እውን ክሰርሕሉ ፈቲኖም፡ እቲ ሓቂ ግን ኣብ ፓርላማ ወይ ባይቶ ንክትኣቱ ቅድም ህዝቢ ክመርጸካን ከም ብዝሒ ህዝብኻ ዝተተመንልካ ቁጽሪ ምስ ኣምጻእካ ጥራሕ ኢዩ፡ እቲ ድሒሩ ዝመጸ ኣብ ባይቶ ኣዋሳ ውድብ ኢየ ጥራሕ በል ኣምበር ኣብ ባይቶ ክትኣቱ ምስተባህለ ብሓንሳብ 34 ውድባት በጽሓ፡ ኣይ ብቅዋም ኣይ ብመዐቀኒ ሎቶሪ ኢዩ ነይሩ። ነዚ ዲዩ በዚሐን ዝበሃል ዘሎ፡ ምስኣ ትውሰኻ ኸኣ ኣላ፡ ነንሓድሕድኩም ዘይትሰማምዑ ኢዩ፡ ኣየነይቲ ሰልፊ ኢያሞ ናተይ ትጽናሕ ናትኪ ትበልጽ ትብል፡ ፠፠፠፠፠፠. እወ ርግጽ ሰልፍታት ዝቖም ንክሰማምዓ ዘይኮነ ሰልፈይ ኢዩ ንህዝቢ ዝውክል ኢለን ስልጣን ንምሓዝ ኢዩ። ከም ምሕዝነት ከም ኪዳን ከም ባይቶ ምስተኣከብካ ውድባዊ ውይ ሰልፋዊ እምነትካ ኣብ ደገ ግዲፍካዮ ክትመጽእ፡ ኣብ ናይ ሓባር ሕዝባዊ ሲቪካዊ ጉድያት ክትላዘብ ጥራሕ ኢዩ ዘፍቀድ ፡ እቲ ሓቂ ግን መልክዑ ቀይሩ ናይ ስልጣን ውድድር ፡ ብሕጓ መትከላትካ ከምዝዕወት ምግባር ስለዝነብረ ንክትሰማማዕ ቀሊል ኣይኮነን፡ ኣብ ክንዲ ብውድባት ብነጻ ብዘይ ኣዳላው ክመርሑ ዝኽእሉ ለባማት እንተዝካየድ ምናልባት ምሰርሐ። ከምቲ ቀርነልዮስ ኣብ ባይቶ ኣዋሳ ፠፠መሰል ብሐራታክሳብ ምፍንጫል ሕጂ ክእወጅ ኣለዎ---፠፠፠ ዝበሎ ተቀባልነት ዘይረከበ ሓደ ርኡይ ኣብነት ኢዩ።  

     እቲ ስክፍታ ናይ ብሐራትን ኣውርጃታትን ሃይማኖትን ኣብ ትሕቲ ዲሞክራሲ ዝረጋገጽ ኢዩ፡ እቲ መሰል ካብ ናይ ውልቀሰብ መሰል ጀሚሩ ነቲ ካልእ መሰላት ዝተፈላለየ ኣገባባት ገርካ እንዳፈተንካ ዝፍታሕ ኢዩ፡ ኣብዚ ዝተመርኮሰ ከኣ ኣብ ዝተፈልላያ ሃገራት ብዙሕ ኣብነታት ስለ ዘሎ ሽግር ኣይኮነን፡ እተን ሰልፍታት ከኣ ዝተፈላላየ ፍታሕ ኣቅሪበን ኣለዋ። ኣብ ሓንቲ ብሐር ወይ ኣውራጃ ወይ ሃይማኖት ዘለዉ ሰባት ዝተፈላላየ ፖለቲካዊ ኣተሓሳስብ ስለ ዘለዎም ኣብ ሓደ ፖለቲካዊ እምነት ከተሰልፎም ስለዘይከኣል ኢዩ፡ ከም ሃገር ኮይኖም ክፍንጨሉ እንተዘይኮይኖም፡ ንኤርትራን ህዝባን ክቃለሱ ግን ዘይሕሰብ ኢዩ።

       ነቶም እንታይ ዝኾና ውድባትን ሰልፍታትን ዝብሉ ኸኣ መልሱ ሓጺር ኢዩ፡ ኩሎም ፈላስፋታት ዝሰማምዑሉ ኣብዚ ዘለናዮ ዘበን ብፓርላመንት ኣገባብ ክትመሓደር ብዘይ ሰልፍታት ዘይሕሰብ ኢዩ ይብሉ። ስለዚ እቶም ኣብ ሰልፍታት ክኣትዉ ዘይደልዩ ፡ ናይ ጽባሕ መረጽቲ ክኾኑ ምእንቲ ኣየነይቲ ሰልፊ ኢያ ንድልየቶም ተማልእ መትከላት ከጽንዑ ክሸባሸቡ ኣለዎም። መን ኢያ መሰል ደቂ ኣንስትዮ፡ መሰል መንእሰይ፡ መሰል ብሐራት፡ መሰል ሓረስቶት ሰራሕተኛ ሽማግለ ትሕሉ፡ መን ኢያ መሬት ናይ ሕዝቢ ታኣምን መንከ ናይ መንግስቲ…………..ወዘተ ፡ እወ ርግጽ ነዘን መሰላት ንምሕላው ኢዩ ህዝባዊ ምንቅስቃስ ብህዝባውያን ማሕበራት ዝበሃል፡ ስለዚ ንመሰልካ ክትብል ተጠርነፍ። ኣብ ምሉእ ዓለም ንህዝቢ ዝሓቶ መሰላት ምሉእ ብምሉእ ዘማልኤት ሰልፊ ግን ክሳብ ሕጂ የላን ምስ ብዙሕ ዓቅምታት ዝተኣሳሰረ ስለ ዝኾነ።

ህዝቢ ክዕወት ኢዩ

ተስፋይ ባይረ   April 2018

ሮይተርስ፡ 24 ሚያዝያ 2018

ትርጕም፡- ቤት ጽሕፈት ዜና ሰዲህኤ

የሩሳሌም _24 ሚያዝያ 2018_ሮይተርስ_ መንግስቲ እስራኤል፡ ነቶም ብዘይሕጋዊ ኣገባብ ኣትዮም እትብሎም ኣፍሪቃውያን ስደተኛታት በስገዳድ ናይ ምብራር ዝነበራ መደብ: ተቐባሊ መንግስቲ ስለዝሰኣነት ኣቍሪጻቶ ከምዘላ ኣፍሊጣ።

መንግስቲ እስራኤል፡ ነቶም ብምድረ-በዳ ሲና ኣቢሎም ናብ ሃገራ ዝኣተዉ፡ መብዛሕትኦም ኤርትራውያንን ሱዳናውያንን ዝርከብዎም ስደተኛታት ንምብራር ንብዙሕ ኣዋርሕ ኢያ ምድላዋት ክትገብር ጸኒሓ።

ጉዕዞ ኤርትራን ህዝባን ካብ ነዊሕ ግዜ ጀሚሩ ብዙሕ ሓጐጽጐጽን ውረድ ደይብን ዘይተፈልዮ ምዃኑ ንኹልና ንጹር እዩ ዝብል እምነት ኣለኒ። እቲ ነዚ ዘይርጉእ ማዕበል ናይ ምህዳእ ቃልሲ ከኣ ኩሉ ዋጋ እንዳተኸፈሎ ማዕሪኡ ቀጻሊ ጸኒሑን ኣሎን። እቲ ዘይርጉእነት ከከም ናይቶም ነቲ ዘይርጉእነት ዝፈጥርዎ ኣካላት ባህርን ናይቲ ዝዋስእሉ ግዜ ምዕባለን ዝተፈላለዩ ጠባያት ዝጸንሕዎን ዘለዉዎን እዩ። መድረኻት ናይ ርሑቕ ገዛእቲ፡ ዝተፈላለዩ ስርዓታት ኢትዮጵያን ሕጂ ኣብ መስርሕ ዘሎ ስርዓት ህግደፍን በብመልክዑ ምረት ወጽዓ ኣብ ልዕሊ ህዝቢ ኤርትራ ዝግለጸሎም እዮም።

ብዙሕ ንድሕሪት ከይተመለስና፡ ኣብዚ እዋንዚ ኣብ ሃገርና ዘሎ ምረት ወጽዓ ኣዝዩ ዓሚቝን ብዙሕ መልከዓት ዝሓዘን እዩ። ፖለቲካዊ ናጽነት የለን ቁጠባዊ ሓርነት’ውን ከምኡ። ኩሉ መሰላት ዕጹው እዩ፡ ፍትሒ’ውን ካብኡ ኣይፍለን። ህዝባዊ ተሳትፎን ትካላዊ ኣሰራርሓን የለን፡ ብኣንጻሩ ናይ ሓደ ኣልማማ ዝድህኽ ፍሉይ ጉጅለ ትምክሕትን ጸቢብነትን ሰማይ ዝዓረገ እዩ። ፍርሒ፡ ስግኣትን ዘይምትእምማንን ሳዕሪሮም ኣለዉ። ደረት ዘየብሉ ግዱድ ውትህድርናን ክሳብ ብደረጃ ቤተሰብ ናብ ታሕቲ ወሪድካ ዘሎ ጸቢብ ምቁጽጻርን እንተውሲኽካሉ ከኣ እቲ ጉዳይ መመሊሱ’ዩ ዝመርር። እቲ ኣዝዩ ኣተሓሳሳቢ ጉዳይ ከኣ ናይቲ ነዚ ኩሉ ሕማቕ ምስሊ ዓጺፉ ምእንቲ ራህዋ ዝቃለስ ዘሎ ኣካል ድሌትን ሓይልን ኣተሃላልዋ ትሕቲ ትጽቢት ምዃኑ እዩ።

ኣብ ከምዚ ኩነታት ካብቲ ብዙሕ ምርጫታት ናይቲ ነዚ ኣቐዲምና ዝጠቐስናዮ ሕማቕ ኤርትራዊ ምስሊ ቀይሩ ናብ ሓድሽን ዝሓሸን ምዕራፍ ናይ ምስግጋር ትውልዳዊ ሓላፍነት ዘለዎ መንእሰይ ስደት ምዃኑ እዩ። ዋሕዚ ኤርትራዊ መንእሰይ ናብቲ ግዝያዊ መዕገሲ’በር መሰረታዊ ፍታሕ ዘይኮነ ስደት ኣብ ቀጻልነት ኤርትራ ከም ሃገርን ህዝብን ሳዕቤኑ ዘሰንብድን ዘስግእን ምዃኑ ሎሚ ኣይኮነንዶ ንኤርትራዊ ንሕብረተሰብ ዓለም እውን ዘየደቅስ ኣጀንዳ ኮይኑ ዘሎ እዩ። ምስዚ ኩሉ ግና ዋላ’ኳ ግዝያዊ መስተርሆ ንምርካብ ካብ ኤርትራ እንተወጻእና ኤርትራ ግና ወርትግ ካባና ከምዘይትወጽእ ዕለታዊ ህይወት ነፍሲ ወከፍና ዝምስክሮ እዩ። ክንሓዝን ክንሕጐስ፡ ክንጥዒ ክንሓምም፡ ክንጠሚ ክንጸግብ፡ ከምኡ እውን ክንውለድን ክንመውትን እንከለና፡ ኤርትራ ምሳና ኣላ። ስለዚ ብዛዕባ እዛ ንሕና’ኳ ካብኣ እንተወጻእና ንሳ ግና ካባና ዘይትወጽእ ኤርትራና ብጽሞና ክንሓስብ ትውልዳዊ ግደታና እዩ። እቲ ንሳ ካባና ስለ ዘይትወጽእ ብዛዕባኣ ምሕሳብና ቅኑዕን ናይ ግድንን እዩ። እቲ ንሓስቦ ብዛዕባ ብኸመይ ይርህዋን ትቐስንን ዘይኮነ፡ ብዛዕባ ብኸመይ እቲ ተጻዒንዋ ዘሎ ኣርዑት ሓጺን ይተርር ክኸውን እንከሎ ግና፡ ኣዝዩ ዘሕዝን እዩ። ዘሕዝን ጥራይ ዘይኮነ ንደለይቲ ለውጥን ራህዋ ከቢድ ሓላፍነት ዘሰክም እዩ።

እቲ ኣብ ልዕሌና ክፍጸም ዘይንደልዮ ሕማቕ፡ ኣብ ልዕሊ ካለኦት ክፍጸም ክንፈቅድ ከምዘይብልና ርዱእ እዩ። እቶም ካብ ኤርትራ ወጺእና ግዝያዊ ትንፋስ ረኺብና ዘለና፡ ኣብቲ ንሕና ዝጸናሕናዮ ጭንቂ ዝገደፍናዮም፡ ወለዲ፡ ኣሕዋትን ቤተሰብን ብዓብዩ ከኣ መላእ ህዝቢ ኤርትራ ኣለዉና። ንሳቶም’ውን ከማና ራህዋ ከም ዝጽበዩ ካባና ንላዕሊ ዝርደኣሎም የለን። በቲ ኣብ ወጻኢ ዝረኸብካዮ ብዝምድናዊ ኣረዳደኣ ዝሓሽ ናጽነትን ነገራዊ ዋንነትን ተጠቒምካ ንራህዋኦም ምጽዓት እምበር፡ ንወጽዓኦም እናዘከርካ እህህህህ ምባልን ውሱን ነገራውን ገንዘባውን ደገፍ ምግባርን መሰረታዊ ፍታሕ ከም ዘይከውን ፍሉጥ እዩ። ምኽንያቱ ኣብ ኤርትራ በኺሩ ዘሎ ብናይ ለውጢ ቃልሲ ዝረጋገጽ እምበር ብገንዘብ ዝግዛእ ስለ ዘይኮነ። ሕሉፍ ሓሊፉ ንጉጅለ ህግደፍ “ፎእ ውርቅኻ ፎእ ጨርቅኻ” ኢልካ ራሕሪሕካዮ ወጺእካ ከተብቅዕ፡ ተመሊስካ ኣብ ከባቢኻ ናብ ዘለዉ ናይ ጭቆና ትካላቱ ውጥም ቅልቅል ምባል ግና፡ ኣብ ልዕሊ እቶም ኣብ ዓዲ ዝገደፍካዮም ተጸበይቲ ራህዋ ወገናት ምፍራድ እዩ።

ከምቲ ወለድና “ዓድኻ ዓዲ እንጀራኻ እዩ” ዝብልዎ ምስቲ ዘለኻዮ ከባብን ስርዓቱን ምልላይን ምስናይን ኣድላይ እዩ። እዚ ማለት ግና ኤርትራውነትካ ሓጢጥካ ትገድፎ ማለት ኣይኮነን። እንተዝፍተን’ውን ኣይከኣልን። ንኤርትራ ክትዝክራ እንከለኻ ግና ነቲ ኣብ ዓዲ ኣብ ማዕበል ወጽዓ ዝጣራዕ ዘሎ ህዝቢ መመሊሱ ዘጥሕል ዘይኮነስ፡ ናይ ራህዋ ባና ዝጋልህ ክኸውን ይግበኦ። ሎሚ ኣብ ቅድሚ እቲ ካብ ኤርትራ ወጻኢ ዘሎ ኤርትራዊ ናይ ማይን ሓውን ምርጫን ኣሎ። በቲ ሓደ ወገን ካብ ራህዋን ናጽነትን ህዝቢ ቀጻልነት ጭቆና ህግደፍ መሪጽካ ናይ ጣዕሳ መንገዲ ምሓዝ። እዚ እቲ ሓዊ እዩ። በቲ ካልእ ወገን ዕድመ ህግደፍ ኣሕጺርካ ራህዋ ንምንጋስ ኣብ መስርዕ ቃልሲ ንለውጢ እጃምካ ንምብርካት ኣብ ቃል ኪዳንካ ምጽናዕ። እዚ ከኣ እቲ ማይ እዩ። ኮታ ኤርትራን ውጹዕ ህዝባን በቲ ሓደ ወገን፡ ህግደፍን ናይ ወጽዓ ትካላቱን ከኣ በቲ ካልእ ወገን ተፋጢጦም ኣለዉ። ኣብዚ “ነየናይ ትመርጽ?” እዩ እቲ ፈታኒ ሕቶ። ንኩነታት ሃገርና ብሓላፍነታዊ ሕልና ናይ ዘንበበ ወገን ምርጫ ኤርትራን ህዝባን ከም ዝኸውን ርዱእ’ዩ። እዚ ክበሃል እንከሎ ግና ምስ ህግደፍ ዝዓብድ ተዓሚቱ “ሃገርን ህዝብን ጽቡቕ ኣለዉ” እናበለ ዝዝምር ኤርትራ ምስኡ ከምዘላ ዝዘንግዐ ኤርትራዊ የለን ማለት ኣይኮነን። ነዚ ግጉይን ንሃላዋታ ዘይምጥንን ምርጫ ዝተዓዘበት ኤርትራና፡ ኣፍ ኣውጺኣ ናይ ምዝራብ ዕድል እንተ እትረክብ፡ እንታይ መበለት ከኣ ኩልና እንርደኦ እዩ።

ኤርትራዊ ጋዜጠኛን ተማራማርን ኣቶ ሃብቶም ዮውሃንስ ብ21 ሚያዝያ 2018 ቤት ጽሕፈት ጉዳይ መንእሰያት ሰዲህኤ ኣብ ዝወደቦ ኣብ Eritrean EPDP Youth Discussion Corner Room ናይ ኣስተምህሮ መድረኽ ፓልቶክ ”ኣብ ሃገርና ስለምንታይ ግዝኣተ ሕግን ደሞክራስን ደንጒዩ? ንኽቀላጠፍከ እንታይ ክግበር ኣለዎ?” ኣብ ትሕቲ ዝብል ሓሳብ ንተሳተፍቲ ሰፊሕን መሳጥን ኣስተምህሮ ሂቡ።

ኣቶ ሃብቶም የውሃንስ ኣብ መእተዊ ኣስተምህሮኡ፣ ካብ ግዝኣተ ሕጊ ወጺኡ ብጸቢብ ድሌቱን ብባህጉን ዝመሪሕ ውልቀ ሰብ ኮነ ሰልፊ ልክዕ ከም ልጓም ዘይብሉ ፈረስን መልሐቕ ዘይብላ መርከብን እዩ፣ ምኽንያቱ ንባህጊ ናይቲ ይመርሖ ኣለኹ ዝብሎ ህዝቢ ዘይኮነስ ንባህግታቱን ንውልቃውን ጉጅላውን ረብሓታቱን ስለ ዝመርሕን ዝገዝእን ኢሉ። ንኣገዳስነት ኣምራት ደሞክራስን ግዝኣተሕግን ኣመልኪቱ ኣብ ዝጠቐሶ ከኣ፣ ክልተ ካብ ሕድሕድ ክነጻጸሉ ዘይክእሉን፣ ሓደ ብዘይ’ቲ ካልእ ክህሉ ዘይክእሉን ባህርያውያን ጸጋታት ከም ዝኾኑ ኣብሪሁ።

ተመራማርን ጋዜጠኛን ሃብቶም ብመሰረት መጽናዕቱ፡ ምልኪ፡ ውልቀሰባዊ ምልኪ፣ ውልቀ ሰልፋዊ ምልኪ፣ ወተሃደራዊ ምልኪ ተባሂሉ ኣብ ሰለስተ ዓይነት ከም ዝኽፈል ድሕሪ ምብራህ፣ ኣብ ሃገርና ዘሎ ምልኪ ካብዚ ሰለስቲኡ እቲ ውልቀሰባዊ ምልኪ ከምዝኾነ ኣስሚርሉ። እዚ ውልቀሰባዊ ምልኪ እቲ ዝበኣሰ ምልኪ ምዃኑ ከኣ ገሊጹ። ምኽንያቱ ውልቀሰባዊ ምልኪ ዝበኣሰ ዝኾነሉ፡ ዝኾነ ትካላዊ ኣሰራርሕ ዘየፍቅድን ዘዕኑን ናይ ጭቆናን ወጽዓን ኣገባብ ስለ ዝኾነ።

ኣብ ሃገርና ኣብ ዝለዓለ ጥርዙ በጺሑ ዘሎ ምልኪ፡ ሃንደስቱን ዘወርቱን ውልቀመላኺ ፕረሲደንቲ ኢሰይያስ ኣፈወርቅን ናይ ጭቆና መሓውራቱን እዮም ምስ በለ፡ ኣቶ ሃብቶም እቲ ደላይ ለውጥን፣ ንምቅልጣፍ እቲ ለውጢ ዝነጥፉ ኣካላትን እውን ዘርእይዎ ድኽመት ዕድመ ምልኪ ንክናዋሕ ዘለዎ ኣሉታዊ ግደ ጠቒሱ። ናይቲ ደላይ ለውጢ ሓቀኛ ድሌትን ትሕዝቶን ዘይምግንዛብ፣ ባህርን፣ ዓቕምን፣ ናይቲ ዝቃውምዎ ዘለዉ ምልክን መላኽን ዘይምርዳእ፣ ድሕሪዚ ነቲ መድረኽ ዝዳረግ ቃልሲ ከተካይድ ዘይምብቃዕ፣ መተካእታ ክትከውን ዘይምኽኣል ዝብሉ ከም ኣብነት ድኽመት ናይ ለውጢ ሓይልታት ዘርዚሩ። ኣብ ገለገለ እዋናት ኣብ ዘይመሰረታውን ዘይእዋናውን ጉዳያት ዝያዳ ኣድሂብካ ግዜ ብምጥፋእ ወርቃዊ ዕድላት ምሕላፍን ነቲ ቃልሲ ተኪኡ ከቐጽሎ ዝኽእል ሓይሊ ክትፈጥር ዘይምብቃዕን እውን ከም ኣካል ናይቲ ብናይ ለውጢ ሓይልታት ዝረአ ድኽመት ጠቒስዎ።

ኣብቲ ኣብ ሃገርና ለውጢ ንኽቀላጠፍከ እንታይ ክግበር ኣለዎ? ዝብል ኣተኲሩ ከኣ ጋዜጠኛ ሃብቶም፣ ካብ ጥቕመይ ጥቅምኻ፣ ረብሓይ ረብሓኻ ዝብል ጸቢብ ናይ ምትህልላኽ ባህርያት ናጻ ዝኾነን ዝተወሃሃደን ቃልሲ ምክያድን፣ ናብ ሃገርን ህዝባን ዘቀደመን፣ ካብ ናይ ብሔረይ ብሐርካ፣ ሃይማኖተይ ሃይማኖትካ፣ ዝብሉ ጸበብቲ ምጉጅጃላት ወጺእና ብሓባር ኣብ ኤርትራዊ ሃገራዊ ጽላል ክነጽልል፣ ኣድላይ ምዃኑ ኣዕዚዙ ገሊጹ። ካብዚ ሓሊፉ ናይ ግዳም ሓይሊ ኣብ ጉዳይና ዝተሓጋገዘ እምበር ንጉዳይና ከም ድላዩ ዘይዝውረሉ ኣገባብ ክንክተል ኣድላይ ምዃኑ ኣስፊሩ። ኣብ ርእሲዚ ገለጻኡ ተሳተፍቲ ኣብ ዙርያ እቲ ዘቕረቦ ኣስተምህሮ ንዘቕረብዎ ሕቶታት ግቡእ መልሲ ሂቡ።