http://ascenteq.com/project/epdp

ማሕበራዊ ዲሞክራስያዊ ሰልፊ ጀርመን ኣብ ናይ 154 ዓመት ታሪኹ ንመጀመርያ ግዜ ብ22 ማዝያ 2018 ኣብ ዘካየዶ ፍሉይ ጉባኤ ወይዘሮ ኣንድርያ ናለስ ናይ መጀመርያ ጓለንስተይቲ ኣደ መንበር መሪጽወን።

ኣቦ መንበር ሰልፊ ዲሞክራሲ ህዝቢ ኤርትራ (ሰዲህኤ) ኣቶ መንግስተኣብ ኣስመሮም ነዚ ታሪኻዊ ፍጻመ ኣብ ግምት ብምእታው ናብተን ኣደ መንበርን መሪሕነት እቲ ሰልፍን ናይ እንኳዕ ኣሕጐሰኩም መልእኽቲ ልኢኹ። ኣብቲ መልእኽቱ ሰልፎም ኣብ ጀርመንን ዓለምን ምስቲ ኣብዚ እዋንዚ ዝረአ ዘሎ ተደራራቢ ብደሆታት ታሪኻዊ ግደኡ ንክጻውት፡ ክሕደስ ዳግማይ ክሰምርን ክሕብርን ዘለዎ ሰናይ ትምኒት ገሊጹ።

እዚ ብ23 ማዝያ 2018 ናብ ማሕበራዊ ዲሞክራስያዊ ሰልፊ ጀርመን ዝተላእከ መልእኽቲ ምሕዝነትን ሰናይ ትምኒትን ኣቦ መንበር ሰዲህኤ፡ እቶም ኣንጻር ኣብ ኤርትራ ዘሎ ዲክታቶርያዊ ምምሕዳር ዝቃለሱ ዘለዉ ኤርትራውያን ተቓወምቲ ነቲ ኣብ ኤውሮጳን ካልእ ከባብታትን ብዲሞክራስያዊ ሓይልታት ዘጋጥም ዘሎ ቅልውላው ብግቡእ ከም ዝርድእዎ ገሊጹ።

ምስዚ ኩሉ ሰዲህኤን ካለኦት ደለይቲ ፍትሒ ኤርትራውያን ሓይልታትን ማሕበራዊ ዲሞክራስያዊ ሰልፊ ጀርመን ኣብ ኤውሮጳን ንኤርትራ ወሲኽካ ኣብ ካልእ ከባብታትን ነቲ ንዝሓለፈ ዝያዳ ዕስራ ዓመታት ሕማቕ ፖለቲካዊ መርእያ ኣፍሪቃ ኮይኑ ዝጸነሐ ኩነታት ንምቕያር ንከኽእል ዲሞክራስያዊ ሓይልታት ንምሕያል ማእከላይ ግደ ንክጻውት እምነት ከም ዘለዎም ጠቒሱ።

ጉዕዞ ኤርትራን ህዝባን ካብ ነዊሕ ግዜ ጀሚሩ ብዙሕ ሓጐጽጐጽን ውረድ ደይብን ዘይተፈልዮ ምዃኑ ንኹልና ንጹር እዩ ዝብል እምነት ኣለኒ። እቲ ነዚ ዘይርጉእ ማዕበል ናይ ምህዳእ ቃልሲ ከኣ ኩሉ ዋጋ እንዳተኸፈሎ ማዕሪኡ ቀጻሊ ጸኒሑን ኣሎን። እቲ ዘይርጉእነት ከከም ናይቶም ነቲ ዘይርጉእነት ዝፈጥርዎ ኣካላት ባህርን ናይቲ ዝዋስእሉ ግዜ ምዕባለን ዝተፈላለዩ ጠባያት ዝጸንሕዎን ዘለዉዎን እዩ። መድረኻት ናይ ርሑቕ ገዛእቲ፡ ዝተፈላለዩ ስርዓታት ኢትዮጵያን ሕጂ ኣብ መስርሕ ዘሎ ስርዓት ህግደፍን በብመልክዑ ምረት ወጽዓ ኣብ ልዕሊ ህዝቢ ኤርትራ ዝግለጸሎም እዮም።

ብዙሕ ንድሕሪት ከይተመለስና፡ ኣብዚ እዋንዚ ኣብ ሃገርና ዘሎ ምረት ወጽዓ ኣዝዩ ዓሚቝን ብዙሕ መልከዓት ዝሓዘን እዩ። ፖለቲካዊ ናጽነት የለን ቁጠባዊ ሓርነት’ውን ከምኡ። ኩሉ መሰላት ዕጹው እዩ፡ ፍትሒ’ውን ካብኡ ኣይፍለን። ህዝባዊ ተሳትፎን ትካላዊ ኣሰራርሓን የለን፡ ብኣንጻሩ ናይ ሓደ ኣልማማ ዝድህኽ ፍሉይ ጉጅለ ትምክሕትን ጸቢብነትን ሰማይ ዝዓረገ እዩ። ፍርሒ፡ ስግኣትን ዘይምትእምማንን ሳዕሪሮም ኣለዉ። ደረት ዘየብሉ ግዱድ ውትህድርናን ክሳብ ብደረጃ ቤተሰብ ናብ ታሕቲ ወሪድካ ዘሎ ጸቢብ ምቁጽጻርን እንተውሲኽካሉ ከኣ እቲ ጉዳይ መመሊሱ’ዩ ዝመርር። እቲ ኣዝዩ ኣተሓሳሳቢ ጉዳይ ከኣ ናይቲ ነዚ ኩሉ ሕማቕ ምስሊ ዓጺፉ ምእንቲ ራህዋ ዝቃለስ ዘሎ ኣካል ድሌትን ሓይልን ኣተሃላልዋ ትሕቲ ትጽቢት ምዃኑ እዩ።

ኣብ ከምዚ ኩነታት ካብቲ ብዙሕ ምርጫታት ናይቲ ነዚ ኣቐዲምና ዝጠቐስናዮ ሕማቕ ኤርትራዊ ምስሊ ቀይሩ ናብ ሓድሽን ዝሓሸን ምዕራፍ ናይ ምስግጋር ትውልዳዊ ሓላፍነት ዘለዎ መንእሰይ ስደት ምዃኑ እዩ። ዋሕዚ ኤርትራዊ መንእሰይ ናብቲ ግዝያዊ መዕገሲ’በር መሰረታዊ ፍታሕ ዘይኮነ ስደት ኣብ ቀጻልነት ኤርትራ ከም ሃገርን ህዝብን ሳዕቤኑ ዘሰንብድን ዘስግእን ምዃኑ ሎሚ ኣይኮነንዶ ንኤርትራዊ ንሕብረተሰብ ዓለም እውን ዘየደቅስ ኣጀንዳ ኮይኑ ዘሎ እዩ። ምስዚ ኩሉ ግና ዋላ’ኳ ግዝያዊ መስተርሆ ንምርካብ ካብ ኤርትራ እንተወጻእና ኤርትራ ግና ወርትግ ካባና ከምዘይትወጽእ ዕለታዊ ህይወት ነፍሲ ወከፍና ዝምስክሮ እዩ። ክንሓዝን ክንሕጐስ፡ ክንጥዒ ክንሓምም፡ ክንጠሚ ክንጸግብ፡ ከምኡ እውን ክንውለድን ክንመውትን እንከለና፡ ኤርትራ ምሳና ኣላ። ስለዚ ብዛዕባ እዛ ንሕና’ኳ ካብኣ እንተወጻእና ንሳ ግና ካባና ዘይትወጽእ ኤርትራና ብጽሞና ክንሓስብ ትውልዳዊ ግደታና እዩ። እቲ ንሳ ካባና ስለ ዘይትወጽእ ብዛዕባኣ ምሕሳብና ቅኑዕን ናይ ግድንን እዩ። እቲ ንሓስቦ ብዛዕባ ብኸመይ ይርህዋን ትቐስንን ዘይኮነ፡ ብዛዕባ ብኸመይ እቲ ተጻዒንዋ ዘሎ ኣርዑት ሓጺን ይተርር ክኸውን እንከሎ ግና፡ ኣዝዩ ዘሕዝን እዩ። ዘሕዝን ጥራይ ዘይኮነ ንደለይቲ ለውጥን ራህዋ ከቢድ ሓላፍነት ዘሰክም እዩ።

እቲ ኣብ ልዕሌና ክፍጸም ዘይንደልዮ ሕማቕ፡ ኣብ ልዕሊ ካለኦት ክፍጸም ክንፈቅድ ከምዘይብልና ርዱእ እዩ። እቶም ካብ ኤርትራ ወጺእና ግዝያዊ ትንፋስ ረኺብና ዘለና፡ ኣብቲ ንሕና ዝጸናሕናዮ ጭንቂ ዝገደፍናዮም፡ ወለዲ፡ ኣሕዋትን ቤተሰብን ብዓብዩ ከኣ መላእ ህዝቢ ኤርትራ ኣለዉና። ንሳቶም’ውን ከማና ራህዋ ከም ዝጽበዩ ካባና ንላዕሊ ዝርደኣሎም የለን። በቲ ኣብ ወጻኢ ዝረኸብካዮ ብዝምድናዊ ኣረዳደኣ ዝሓሽ ናጽነትን ነገራዊ ዋንነትን ተጠቒምካ ንራህዋኦም ምጽዓት እምበር፡ ንወጽዓኦም እናዘከርካ እህህህህ ምባልን ውሱን ነገራውን ገንዘባውን ደገፍ ምግባርን መሰረታዊ ፍታሕ ከም ዘይከውን ፍሉጥ እዩ። ምኽንያቱ ኣብ ኤርትራ በኺሩ ዘሎ ብናይ ለውጢ ቃልሲ ዝረጋገጽ እምበር ብገንዘብ ዝግዛእ ስለ ዘይኮነ። ሕሉፍ ሓሊፉ ንጉጅለ ህግደፍ “ፎእ ውርቅኻ ፎእ ጨርቅኻ” ኢልካ ራሕሪሕካዮ ወጺእካ ከተብቅዕ፡ ተመሊስካ ኣብ ከባቢኻ ናብ ዘለዉ ናይ ጭቆና ትካላቱ ውጥም ቅልቅል ምባል ግና፡ ኣብ ልዕሊ እቶም ኣብ ዓዲ ዝገደፍካዮም ተጸበይቲ ራህዋ ወገናት ምፍራድ እዩ።

ከምቲ ወለድና “ዓድኻ ዓዲ እንጀራኻ እዩ” ዝብልዎ ምስቲ ዘለኻዮ ከባብን ስርዓቱን ምልላይን ምስናይን ኣድላይ እዩ። እዚ ማለት ግና ኤርትራውነትካ ሓጢጥካ ትገድፎ ማለት ኣይኮነን። እንተዝፍተን’ውን ኣይከኣልን። ንኤርትራ ክትዝክራ እንከለኻ ግና ነቲ ኣብ ዓዲ ኣብ ማዕበል ወጽዓ ዝጣራዕ ዘሎ ህዝቢ መመሊሱ ዘጥሕል ዘይኮነስ፡ ናይ ራህዋ ባና ዝጋልህ ክኸውን ይግበኦ። ሎሚ ኣብ ቅድሚ እቲ ካብ ኤርትራ ወጻኢ ዘሎ ኤርትራዊ ናይ ማይን ሓውን ምርጫን ኣሎ። በቲ ሓደ ወገን ካብ ራህዋን ናጽነትን ህዝቢ ቀጻልነት ጭቆና ህግደፍ መሪጽካ ናይ ጣዕሳ መንገዲ ምሓዝ። እዚ እቲ ሓዊ እዩ። በቲ ካልእ ወገን ዕድመ ህግደፍ ኣሕጺርካ ራህዋ ንምንጋስ ኣብ መስርዕ ቃልሲ ንለውጢ እጃምካ ንምብርካት ኣብ ቃል ኪዳንካ ምጽናዕ። እዚ ከኣ እቲ ማይ እዩ። ኮታ ኤርትራን ውጹዕ ህዝባን በቲ ሓደ ወገን፡ ህግደፍን ናይ ወጽዓ ትካላቱን ከኣ በቲ ካልእ ወገን ተፋጢጦም ኣለዉ። ኣብዚ “ነየናይ ትመርጽ?” እዩ እቲ ፈታኒ ሕቶ። ንኩነታት ሃገርና ብሓላፍነታዊ ሕልና ናይ ዘንበበ ወገን ምርጫ ኤርትራን ህዝባን ከም ዝኸውን ርዱእ’ዩ። እዚ ክበሃል እንከሎ ግና ምስ ህግደፍ ዝዓብድ ተዓሚቱ “ሃገርን ህዝብን ጽቡቕ ኣለዉ” እናበለ ዝዝምር ኤርትራ ምስኡ ከምዘላ ዝዘንግዐ ኤርትራዊ የለን ማለት ኣይኮነን። ነዚ ግጉይን ንሃላዋታ ዘይምጥንን ምርጫ ዝተዓዘበት ኤርትራና፡ ኣፍ ኣውጺኣ ናይ ምዝራብ ዕድል እንተ እትረክብ፡ እንታይ መበለት ከኣ ኩልና እንርደኦ እዩ።

For the first time in its 154-year history, the German Social Democratic Party/SPD, has a woman, Ms Andrea Nahles, to head the party at its special congress held on 22 APRIL 2018.

Reacting to this historic event, EPDP Chairman Menghesteab Asmerom, send a congratulatory message to the new SPD Chairwoman and the party leadership wishing them all the success "to reform, re-unite and strengthen" the party to play its historic in Germany and the rest of the world which is "currently facing multiple challenges".

Addressed to the SPD on 23 April, the EPDP Chairman's message of solidarity and good wishes also noted that Eritreans opposed to the dictatorship in their country are "fully aware of the political crises faced by democratic forces in Europe and beyond it."

However, EPDP and the rest of Eritrean justice seekers are also confident that SPD can  play a central role in "empowering progressive forces in Europe and the rest of the world" including Eritrea, "which has been for over two decades the worst example in the already bad African political condition and human rights abuses".

ኤርትራዊ ጋዜጠኛን ተማራማርን ኣቶ ሃብቶም ዮውሃንስ ብ21 ሚያዝያ 2018 ቤት ጽሕፈት ጉዳይ መንእሰያት ሰዲህኤ ኣብ ዝወደቦ ኣብ Eritrean EPDP Youth Discussion Corner Room ናይ ኣስተምህሮ መድረኽ ፓልቶክ ”ኣብ ሃገርና ስለምንታይ ግዝኣተ ሕግን ደሞክራስን ደንጒዩ? ንኽቀላጠፍከ እንታይ ክግበር ኣለዎ?” ኣብ ትሕቲ ዝብል ሓሳብ ንተሳተፍቲ ሰፊሕን መሳጥን ኣስተምህሮ ሂቡ።

ኣቶ ሃብቶም የውሃንስ ኣብ መእተዊ ኣስተምህሮኡ፣ ካብ ግዝኣተ ሕጊ ወጺኡ ብጸቢብ ድሌቱን ብባህጉን ዝመሪሕ ውልቀ ሰብ ኮነ ሰልፊ ልክዕ ከም ልጓም ዘይብሉ ፈረስን መልሐቕ ዘይብላ መርከብን እዩ፣ ምኽንያቱ ንባህጊ ናይቲ ይመርሖ ኣለኹ ዝብሎ ህዝቢ ዘይኮነስ ንባህግታቱን ንውልቃውን ጉጅላውን ረብሓታቱን ስለ ዝመርሕን ዝገዝእን ኢሉ። ንኣገዳስነት ኣምራት ደሞክራስን ግዝኣተሕግን ኣመልኪቱ ኣብ ዝጠቐሶ ከኣ፣ ክልተ ካብ ሕድሕድ ክነጻጸሉ ዘይክእሉን፣ ሓደ ብዘይ’ቲ ካልእ ክህሉ ዘይክእሉን ባህርያውያን ጸጋታት ከም ዝኾኑ ኣብሪሁ።

ተመራማርን ጋዜጠኛን ሃብቶም ብመሰረት መጽናዕቱ፡ ምልኪ፡ ውልቀሰባዊ ምልኪ፣ ውልቀ ሰልፋዊ ምልኪ፣ ወተሃደራዊ ምልኪ ተባሂሉ ኣብ ሰለስተ ዓይነት ከም ዝኽፈል ድሕሪ ምብራህ፣ ኣብ ሃገርና ዘሎ ምልኪ ካብዚ ሰለስቲኡ እቲ ውልቀሰባዊ ምልኪ ከምዝኾነ ኣስሚርሉ። እዚ ውልቀሰባዊ ምልኪ እቲ ዝበኣሰ ምልኪ ምዃኑ ከኣ ገሊጹ። ምኽንያቱ ውልቀሰባዊ ምልኪ ዝበኣሰ ዝኾነሉ፡ ዝኾነ ትካላዊ ኣሰራርሕ ዘየፍቅድን ዘዕኑን ናይ ጭቆናን ወጽዓን ኣገባብ ስለ ዝኾነ።

ኣብ ሃገርና ኣብ ዝለዓለ ጥርዙ በጺሑ ዘሎ ምልኪ፡ ሃንደስቱን ዘወርቱን ውልቀመላኺ ፕረሲደንቲ ኢሰይያስ ኣፈወርቅን ናይ ጭቆና መሓውራቱን እዮም ምስ በለ፡ ኣቶ ሃብቶም እቲ ደላይ ለውጥን፣ ንምቅልጣፍ እቲ ለውጢ ዝነጥፉ ኣካላትን እውን ዘርእይዎ ድኽመት ዕድመ ምልኪ ንክናዋሕ ዘለዎ ኣሉታዊ ግደ ጠቒሱ። ናይቲ ደላይ ለውጢ ሓቀኛ ድሌትን ትሕዝቶን ዘይምግንዛብ፣ ባህርን፣ ዓቕምን፣ ናይቲ ዝቃውምዎ ዘለዉ ምልክን መላኽን ዘይምርዳእ፣ ድሕሪዚ ነቲ መድረኽ ዝዳረግ ቃልሲ ከተካይድ ዘይምብቃዕ፣ መተካእታ ክትከውን ዘይምኽኣል ዝብሉ ከም ኣብነት ድኽመት ናይ ለውጢ ሓይልታት ዘርዚሩ። ኣብ ገለገለ እዋናት ኣብ ዘይመሰረታውን ዘይእዋናውን ጉዳያት ዝያዳ ኣድሂብካ ግዜ ብምጥፋእ ወርቃዊ ዕድላት ምሕላፍን ነቲ ቃልሲ ተኪኡ ከቐጽሎ ዝኽእል ሓይሊ ክትፈጥር ዘይምብቃዕን እውን ከም ኣካል ናይቲ ብናይ ለውጢ ሓይልታት ዝረአ ድኽመት ጠቒስዎ።

ኣብቲ ኣብ ሃገርና ለውጢ ንኽቀላጠፍከ እንታይ ክግበር ኣለዎ? ዝብል ኣተኲሩ ከኣ ጋዜጠኛ ሃብቶም፣ ካብ ጥቕመይ ጥቅምኻ፣ ረብሓይ ረብሓኻ ዝብል ጸቢብ ናይ ምትህልላኽ ባህርያት ናጻ ዝኾነን ዝተወሃሃደን ቃልሲ ምክያድን፣ ናብ ሃገርን ህዝባን ዘቀደመን፣ ካብ ናይ ብሔረይ ብሐርካ፣ ሃይማኖተይ ሃይማኖትካ፣ ዝብሉ ጸበብቲ ምጉጅጃላት ወጺእና ብሓባር ኣብ ኤርትራዊ ሃገራዊ ጽላል ክነጽልል፣ ኣድላይ ምዃኑ ኣዕዚዙ ገሊጹ። ካብዚ ሓሊፉ ናይ ግዳም ሓይሊ ኣብ ጉዳይና ዝተሓጋገዘ እምበር ንጉዳይና ከም ድላዩ ዘይዝውረሉ ኣገባብ ክንክተል ኣድላይ ምዃኑ ኣስፊሩ። ኣብ ርእሲዚ ገለጻኡ ተሳተፍቲ ኣብ ዙርያ እቲ ዘቕረቦ ኣስተምህሮ ንዘቕረብዎ ሕቶታት ግቡእ መልሲ ሂቡ።