http://ascenteq.com/project/epdp

እቲ ነዚ ዝምልከት ዜና ብመጀመርያ ብ2 ለካቲት 2016 ብመርበብ ሓበሬታ ኣዱሊስ እዩ ተዘርጊሑ። ድሕሪ እዚ እቲ ኩነታት ከም ዝተፈጸመ ሰደህኤ ካብ ኣቶ ሓሰን ኣሰድ ምክትል ኣቦመንበር ተሓኤ መረጋገጺ ረኺቡ። ኣብዚ እዋንዚ መንግስቲ ሱዳን ናይቲ ኣብ ኤርትራ ዘሎ ዲክታቶርያዊ ስርዓት ናይ ቀረባ ዓርኪ እዩ። በዚ መሰረት እዚ ዲክታቶርያዊ ስርዓት ኣስመራ ኣብዚ ናይ ነጻነት ተቓለስቲ ማእሰርቲ ኢድ ከይህልዎ ስግኣት ኣሎ።

           መሓመድ ዓሊ ኢብራሂም            ወልደማርያም ባህልቢ                    ተክለብርሃን ተ/ጻድቕ

ምስዚ ብዝተተሓኣዘ ክዝከር ዘለዎ፡ ቅድሚ ኣርባዕተ ዓመታት ኣብዛ ወርሒ እዚኣ፡ ዝያዳ ንምንጻር ብ14 ለካቲት 2012 ኣቶ መሓመድ ዓሊ ኢብራሂም ኣባል መሪሕነት ሰልፊ ደሞክራሲ ህዝቢ ኤርትራ ኣብ ሱዳን ከሰላ ሃለዋቱ ጠፊኡ እዩ። ደሓር ግና ኣብ ሓንቲ ካብተን ኣብ ኤርትራ ዘለዋ 360 ኣብያተ-ማእሰርቲ ናይቲ ዲክታቶርያዊ ስርዓት ከም ዝተራእየ ዘመልክት ሓበሬታ ተረኺቡ እዩ። ኣብ ምስዋሩ ሓይልታት ሱዳን ምስ ልኡኻት ዲክታቶሪያዊ ስርዓት ኤርትራ ተሓባቢሮም ዝብል ክሲ ብሰፊሑ ክቀርብ ጸኒሑ እዩ።

ብተመሳሳሊ ኩነታት ቅድሚ 24 ዓመታት፡ ጸጥታ ሱዳን ኣብቲ ናይ 22 ማዝያ 1992 ጭውያ ኣባላት ፈጻሚት ኮሚተ ሰውራዊ ባይቶ ዝነበሩ ኣቶ ወልደማርያም ባህልብን ኣቶ ተክለብርሃን ገ/ጻድቕን ኣብ ከሰላ ኢድ ነይርዎም እዩ። እዞም ዝተጨውዩ ኣብ ተስዓታት’ኳ ኣብ ቤት ማእሰርቲ ኤርትራ ተራእዮም እንተነበሩ፡ ድሕሪኡ ግና ኣብ ኢድ ሓለፍቲ ኤርትራ፡ ኣበይ ከም ዘለዉን እንታይ ከም ዘጋጠሞምን ዝፍለጥ የለን።

ብዙሓት ነቲ ስርዓት ዝተቓወሙ ኤርትራውያን በቲ ኣብ ኣስመራ ዘሎ ዲክታቶርያዊ ጉጅለ ካብ ሱዳን ክጭወዩን ኣብ ኣብያተ ቤት ማእሰርቲ ኤርትራ ክሓቁ ከም ዝጸንሑን ዝዝከር እዩ።