ርእሰ-ዓንቀጽ፡ ሰዲህኤ

እቲ ነዊሕ ተጓዒዙ ቀዳማይ ዕማሙ ነጻነት ዘረጋገጸን ጌና ሕጂ እውን ቀጻሊ ዕማሙ ንምርግጋጽ ኣብ ጉዕዞ ዘሎ ብረታዊ ቃልሲ ህዝቢ ካብ ዝጅመር እነሆ መበል 56 ዓመት ኣብ ምዝካር በጺሕና። ቃልስና ክጅምር እንከሎ ዝነበሮ ዕማምን ክሳብ ሕጂ ዘሎ ኩነታትን ስለ ዘየሳኒ’ኳ ቅር ዘብል እንተኾነ፡ እቲ ኣመዝጊብናዮ ዘለና ነጻነት፡ ቀጻሊ ዓወት ንምምዝጋብ መሰረት ስለ ዝኾነ፡ ኣብዚ ታሪኻዊ ኣጋጣሚ ኮይንካ እንኳዕ ኣብጸሓኩም ኣብጸሓና ምብህሃል ዘምሕረልና እምበር ዘኽፈኣልና ኣይኮነን። ስለዚ እንኳዕ ናብ መበል 56 ዓመት ዝኽሪ ባሕቲ መስከረም ባሕቲ ቃልሲ ኣብጸሓኩም ንብል።

እዚ ብባሕቲ መስከረም 1961 ብመሪሕነት ጅግና ሓምድ እድሪስ ዓዋተ ዝተጀመረ ብረታዊ ቃልስና ነዊሕ ተጓዒዙ፡ ብዙሕ ማሕለኻታት ሰጊሩን ክቡር ዋጋ ከፊሉን ኣብ ነጽነት ዝበጸሐ ስለ ዝኾነ፡ ብብዙሕ መሰጥቲ ሓረጋት ዝነኣድ እዩ እሞ “ዝከኣል ዘይመስል ዝነበረ ኣኽኢሉ፡ ንብዙሓት ምእንቲ ነጻነትን መሰልን ዝቃለሱ ወገናት ሓድሽ ምዕራፍ ዝኸፈተ ተመኩሮ ነይሩን እዩን” እንተበልናዮ ተዘይንኢስዎ ኣይዓብዮን እዩ። ነቲ ቃልሲ ዘይከኣል ዘምስሎ ዝነበረ ናይ ሓይሊ ዓይነትን ዓቐንን ዘይምምጥጣን ጥራይ ዘይኮነ፡ እንተላይ ኣብ ቅድሚ ሕብረተሰብ ዓለም ዝነበሮ ተፈልጥነትን ተቐባልነትን ድሩት እዩ ነይሩ። እንተኾነ እቲ ንቕሎ ቅኑዕን ፍትሓውን ስለ ዝነበረ፡ ከምቲ “በትሪ ሓቅስ ትቐጥን እምበር ኣይትስበርን” ዝበሃል፡ ኩሉቲ ኣብ ሰውራ ኤርትራ ዝነበረ ሕጽረታት ብኤርትራዊ ኒሕን ጽንዓትን ተመክቱ ብዓወት ከኣ ተደምዲሙ።

እዚ ቅድሚ 56 ዓመታት ዝጀመረ ገድሊ፡ ኣብቲ ናይ መወዳእታ ሸቶኡ ንምብጻሕ ዝቕጽል ዘሎ ዘይዛረየ ናይ ቃልሲ ዋሕዚ፡ ኣብ ኤርትራ ነጻነት ጥራይ ኣይኮነን ኣውሒሱ። ምትራር ኤርትራዊ ሃገርንትን ሓድነትን ከምኡ እውን ህዝባዊ ሓድነትን ምክብባርን ውጽኢት ናይ ክሳብ ሕጂ ቃልሲ እዮም። ስለዚ ናይ ክሳብ ሕጂ ውጽኢት ናይቲ ባሕቲ መስከረም ዝጀመረ ቃልሲ “ናጽነት እዩ” ኢልካዮ ዝሕለፍ ጥራይ ዘይኮነ ነዊሕ ግዜ ወሲዱ፡ መስዋእቲ ኣእላፍ ኤርትራውያን ዝተኸፍለሉ ኩለ መዳያዊ ዓሚቝን ረቂቕን ትርጉም ዘለዎ መስተንክር ቅያ እዩ። እቲ ጉዕዙ ብግዳማውን ውሽጣውን ቅልውላዋትን ነውጽታትን ክሓልፍ ዝጸንሐ መረርቲ ምዕራፍት ዝነበርዎ ምዃኑ ምስትብሃል ናይ ግድን እዩ። ስለምንታይ ናይቲ ምረት ሃፈጽታ ሕጂ’ውን መሊኡ ዘይሓወየ በሰላ ስለ ዝኾነ።

“ነጻነት ኤርትራ መንዩ ኣምጺእዎ?” ዝብል ሕቶ መልሱ “መላእ ህዝቢኤርትራ’ዩ” ዝብል ክነሱ፡ ነቲ ዝተኸፍለ ዋጋ እንተኽኢሎም ናቶም ጥራይ ክገብርዎ፡ እንተዘየለ ከኣ ኣብቲ መስርሕ ሰብ ፍሉይ እጃም ምንባርም ንምርኣይ ዝደናደኑ ወገናት ብዙሓት እዮም። እዚ ጥራይ ኣይኮነን፡ ንቕድሚት ምምዕዳው ስኢኖም፡ የማነጸጋም ቀልባዕባዕ ዝብሉን ንጉዕዞ ቃልሲ ነጻነትን ተዋሳእቱን ከራኽሱ ውጥም ቅልቅል ዝብሉን ወገናት’ውን ንዕዘብ ኣለና። ኣብዚ ታሪኽ ጠምዚዝካ ናይ ምዕማጽ ተግባር ጉጅለ ህግደፍ ቅድሚት ከም ዝስራዕ ህልዊ ኩነታት ሃገርናን ህዝባን ከይሓተትካዮ ባዕሉ ዝምልስ እዩ። ኣብዚ ታሪኻዊ ኣጋጣሚ ዝያዳ ንምብርሁ ህዝቢ ኤርትራ ፍረ’ቲ ዝኸፈሎ ክቡር ዋጋ ብህግደፍ ተጠሊሙ እዩ። እንተኾነ ህዝቢ ኤርትራ ከምቲ ቅድም ምስ ተጠለመ፡ ኣብ ባሕቲ መስከረም ብዝወለዖ ባሕቲ ቃልሲ ዝተዓወተ፡ ሎሚ እውን ኩሉ ዝተገፈ መሰላቱ ንምምላስ ነቲ ኣንጻር ህግደፍ ዘካይዶ ዘሎ ቃልሲ ካብ ምቕጻል ካልእ መተካእታ የብሉን። ከምኡ ከኣ ይገብር ኣሎ። እዚ ታሪኻዊ ኣጋጣሚ ባሕቲ መስከረም ዝጀምርናዮ ቃልሲ ምእንቲ ሓርነትን ኩሉ መሰላትን ከነሕይል ቃል ንኣትወሉ ክኸውን ይግበኦ። ኣብዚ ነቲ “ከይረገምካዮ ዝተረግመ” ጉጅለ ህግደፍ መመሊስካ ምርጋም ጥራይ ዘይኮነ፡ ኩልና ኣብቲ ንብህጎ ለውጢ ረብሓ ዘለና ናይ ለውጢ ሓይልታት ነነብስና መርሚርና ንቕድሚት እንዳማዕደና ንቃልሲ ቃል ንኣትወሉ እምበር፡ ንድሕሪት እንዳተመለስና፡ ብዝሓለፈ ነስተንትነሉን ንካሰሰሉን ክኸውን ኣይግበኦን።

ዓመት፡ መጸት ባሕቲ መስከረም፡ ባሕቲ ቃልሲ ክንዝክር እንከለና ኣብ ክሊ በብዓይነቶም ምዕብልናታት ኮይና ኢና። ኣብዚ እዋንዚ ብመሰረቱ ኣብ ደንበ ህግደፍ ኮነ ኣብ ደንበ ናይ ለውጢ ሓይልታት ምስ ናይ ዓሚ ክወዳደር እንከሎ መሰረታዊ ለውጢ የብሉን። ህግደፍ ኣብ ልዕሊ ህዝብና ዝፍጽሞ ጭቆና ኣብ ቦታኡ ኣሎ። ንሕና ደለይቲ ለውጢ እውን ዝሓዝናዮ ዕማምን ኣቕጣጫን ህዝባዊ፡ ወድዓውን ርትዓውን ክነሱ፡ ብሰንኪ ጉዳይና ብግቡእ ከነመሓደርን ፋሕ ዝበለ ዓቕምና ክንእክብን ዘይምብቃዕና ብመንጽር ትጽቢትና ንቕድሚት ክንስጉም ኣብ ዘይክኣልናሉ ህሞት ኢና ዘለና። ነዚ  ንዝክሮ ዘለና ኣጋጣሚ ከኣ ካብ ደውታ ንምውጻእ ከም መንጠሪ ክንጥቀመሉ ይግበኣና። ሰልፊ ዲሞክራሲ ህዝቢ ኤርትራ (ሰዲህኤ) ቅድሚ ሒደት ኣዋርሕ ሓቢርካ ንምስራሕ መዋጸኦ ይኸውን ዝበሎ፡ ዝሓለፈ ተመኩሮና ኣብዚ መዳይዚ ኣብ ግምት ዘእተወ እማመ ንሓባራዊ ዕዮ ፖለቲካዊ ውድባት ኤርትራ ኣውጺኡ ኣሎ። ናይ ክሳብ ሕጂ ነቲ እማመ ዝትዋህበ ግብረመልሲ ዘተባብዕ ኮይኑ፡ ኣብ ውጽኢት ንክበጽሕ ብሓድሽ ኣተሓሳስባ ሓቢርካ ስራሕ ከም ዘድልዮ ዘመልክት እዩ። በዚ ኣጋጣሚ ከኣ ሰዲህኤ ምስ ኩሎም ኣሓት ውድባት ኮይኑ ኣብ ውጽኢት ክሳብ ዝበጽሕ እጃሙ ከበርክት ምዃኑ በዚ ታሪኻዊ ኣጋጣሚ ቃል ይኣቱ።

ክብሪ ንባሕቲ መስከረምን ሰማእታት ኤርትራን

1 መስከረም 2017

ባሕቲ መስከረም ብኩሎም ብግእዝ ዝቘጽሩ ኣህዛብ፡ ሓደ ዓመት ወዲእና ናብ ሓድሽ ዓመት ንሰጋገረላ መጀመርያ መዓልቲ ስለ ዝዀነት፡ ንመዋእል  ዓመት መጸ ብኽብሪ እትጽንበል ዕለት‘ያ። ንኤርትራውያን ግን፡ ነቲ ብዓመጽቲ ዝተወስደ ናጽነትናን ዝተገፈ መሰልናን ካብ ኢድ ባዕዳውያን  መንዚዕና ንምምላስ ሓቦን ሃገራዊ ኒሕን ኣስኒቓ ንወፍሪ ዕጥቃዊ ቃልሲ ዘበገሰት ስለ ዝዀነት፡ ድርብ  ትርጉም ዘለዋ  ብዓቢ ክብርን ድምቀትን እነብዕላ ዕለት እያ።

እታ ብሓደ መስከረም 61 ዝተወልዐት ጀማሪት ቊልዒ፡ ድሌቱን ባህጉን ንምርግጋጽ ዝዓለመት ምዃና ዝኣመነ ህዝቢ ኤርትራ፡ ብዘደንቕ ቅልጣፈ  ኣብ ሰውርኡ ስለ ዝዓሰለ፡ ነታ ቍልዒ ናብ ዘቃጽል ባርዕ ሓዊ ኣሰጋጊሩ ክቡር ዋጋ እናኸፈለ፡ ንኩሉ ጊንጢ መሰናኽላትን ተጻብኦታትን በዲሁ ሓይሊ ምኩሓት ጸራሪጉ ብርሃን ናጽነት ብምርግጋጽ‘ዩ ብዓወት ተመጒሱ።

እንተዀነ ከም‘ቲ ዘራጊት ማይ ዘላተን ኣሓስ ጽሩይ ማይ ነይሰትያ ዝብልዎ ምስላ፡ ፍረ ስዉኣትና ዝዀነት ናጽነት ብውሑዳት ሕቡእ ኣጀንዳ ዝነበሮምን ዘለዎምን  ስሱዓት ጉጅለ ህ.ግ.ደ.ፍ ተጨውያ፡ መኣዝና ስሒታ ብምህውታት ኣብ ክንዲ ንልምዓት ዕቤትን፡ ንዕንወትን ብርሰትን ተፈሪዳ፡ ሃገር ኣብ መዋጽኦ ዘይብሉ ሓደጋ፡ ህዝቢ ከኣ ኣብ ኣዝዩ ዘሕዝን ጉዕዞ ምብትታን ወዲቑ ኣብ ምሉእ ዕድሜኡ ርእይዎን ሰሚዕዎን ዘይፈልጥ ሕሱም ናብራ የሕልፍ ኣሎ። ተመክሮ ዕጥቃዊ ቃልስና ከም ዘነጽሮ ግን  ዓመጽትን ግፍዐኛታትን ዝሃለወ  ሓይሊ ወይ ዓቕሚ ይሃልዎም  ብዘየገድስ፡ ብደለይቲ ፍትሒ ካብ ዝልዓል  ቃልሲ ንክስዓሩ ከድሕኖም ከም ዘይክእል እዩ።

እዚ መምህርን ዋናን ናይ‘ዚ ተመክሮ‘ዚ ዝዀነ ጅግና ህዝቢ ኤርትራ ግን፡ ኣብዚ ሎሚ ዘለዎ ክትነብሮ ዘይኮነስ ኣብ ክትሰምዖ ዘሕዝን ኩነታት ተሸሚሙ እናሃለወ ፡ፍትሒ ንምምጻእ ኣብ ዝዓለመ ኣድማዒ ተቓውሞ፡ ብሓባርን ብጥዑይ መንፈስን ክለዓል ዘይምኽኣሉ፡ ንዓናስ ይትረፍ ንተዓብትና‘ውን ዘገረመ‘ዩ፡ እንተ ተባህለ ምግናን ኣይኰነን። እዚ ዘይኢዱ ዝተፈድዬ ጅግናን ፍትሓውን ህዝቢ ኤርትራ፡ ካብዛ ሕጂ ዘለዋ ህይወት ንምውጻእ ናይ ካልኦት ሞራላዊ ሓገዝ ኣየድልዮን‘ኳ እንተዘይተባህለ ነዚ ጋኒን ስርዓት ህ ግ ድ ፍ ናይ ምልጋስ ግን ሓፍነቱ ምዃኑ ንምርድኡ ብዘየጸግም ግሉጽ መንገዲ ጥፍኣት ይጉዓዝ ምህላዉ ኣሚኑ ንለውጢ ክዕጠቕ  ይግባእ።

ሎሚ ሃገር ኣብ ክትድሕነሉ ዘጸግም ገምገም ጸድፊ እናሃለወት ኣብ ማይ ቀጠነኒ ዝዓይነቱ ደቂቕን ድሕሪ ድሕነት ሃገር ክዝረበሉ ዝግባእ ጉዳያትን እናልዓልካ፡  ነንሕድሕድካ ኣብ ምውንጃል ጊዜኻ ምብኻን፡ ንመስርሕ ፍትሓዊ ለውጢ ዘደናጒን ዘይሓላፍነታውን፡ ኣብ ርእሲ ምዃኑ ንበሃልቱ‘ውን ኣብ ትዕዝብቲ ዘእቱ ግጉይ ኣስራርሓ እዩ።  

እዚ ን26 ዓመታት ኣብ እንግድዓና ተጻዒኑ ዘሳቕየና ዘሎ ገበነኛ ስርዓት ካብቶም ብሓባራዊ ቅልጽምና ዝተሳዕሩ ባዕዳውያን ዝሓየለ ወይ ብምሕደራ ስለ ዝሓሸ ዘይኰነስ  ድኹም ኣሰራርሓ ደምበ ተቃውሞ ዝመጽወተሉ ወርቃዊ ዕድል ስለ ዝረኸበ እዩ።

ካብዚ ሓቅታት‘ዚ ተብጊስካ ክርኤ ከሎ አምበኣር፡ ስርዓት ህ.ግ.ደ.ፍ ብሕሉፍ ጭካኔኡን ግዕዘይ ምሕደርኡን ኣብ ልዕሊ ህዝብና ብዝፈጸሞ ገበንን ሃገራዊ ብርሰትን ብሓላፍነት ክሕተት ከሎ፡ እቶም ናይ ተቓውሞ ካባ ለቢስና ንለውጢ አንዝምር ግን ከኣ፡ ካብ ወጋኢት ላም ዘይነድሕን ደምበ ተቓውሞ፡ ካብ‘ቲ ስርዓት  እንፍለየሉ መንገዲ እንተልዩ፡ ተመክሮና ብግቡእ ገምጊምና ሕዱር ሕማማትና ፈዊስና፡ ኣብ ዓወት ዝወስድ መደብ ዕዮ ቀሪጽና ብሓባር ሰሪሕና ሃገር ንምድሓን ዘሎና ዕድል፡ ብዘይ ወዓል ሕደር ክንጥቀመሉ ምስ እንኽእል ጥራሕ‘ምበር፡ ካብ ተሓታትነት ነጻ ዝገብረና ሕጋዊ መሕብኢ ከም ዘየልቦ ክንፈልጥ ግድን‘ዩ።

እዛ ሎሚ እንጽብላ መበል 56 ዓመት ሓደ መስከረም እምበኣር፡ ነቲ ኣብ እዋን ዕጥቃዊ ቃልስና ዝተፈጸመ ጅግንነት ዳግማይ ብምሕዳስ፡ እወ ሕጅውን ይከኣል‘ዩ ኢልና ሃገርና ካብ ውድቀት ህዝብና ድማ ካብ ክፉእ ናብራ ባርነት ንምድሓንን ሕድሪ ስዉኣትና ከነኽብር ቃልና እንሐድሰላ ዕለት ክትከውን ይግባእ።

ዓወት ንፍትሓዊ ቃልስና

ልዑል ክብርን ዝኽርን ንሰማእታትና

ስዕረትን ዕንወትን ንስርዓታት ጭቆና።

ህዝቢ ኤርትራ፡ ቃልሲ ምእንቲ ሃገራዊ ናጽነት ዝጀመረሉ መበል 56 ዓመትን ብዓል ዒድ ኣልኣድሓን ዘኽብረሉ ዘሎ ግዜ ስለዝዀነ፤ ሰልፊ ዲሞክራሲ ህዝቢ ኤርትራ (ሰዲህኤ)፡ ብኣጋጣሚ ናይ’ዚ ኣብ ሓደ ዕለት ዝኸበር ዘሎ ድርብ ጽንብል፡ንመላእ ህዝቢ ኤርትራ፡  እንቋዕ ሓጎሰና ዝብል ናይ ዮሃና መልእኽቱ ከመሓላልፍ ይፈቱ።

ሰልፊ ዲሞክራሲ ህዝቢ ኤርትራ፡ ንመላእ ኣስላም ዓለም ብሓፈሻ፡ ንኣስላም ኤርትራ ድማ ብፍላይ፡ርሑስ ዒድ ኣልኣድሓ ክገብረሎም እናተመነየ፤ ንህዝቢ ኤርትራ ድማ፡ ኣብ 30 ዓመታት ዘካየዶ ዘይሕለል ብረታዊ ቃልሲ ዘርኣዮ ጽንዓትን ሓድነትን ሕላገት መንነቱ ስለዝዀነ፡ ሎሚ እውን ብጽንዓትን ብሓድነትን ንምልኪ ኣፍሪሱ ግዝኣተ ሕግን ዲሞክራስን ከንግስ ጻውዒቱ የቕርብ።

መንግስተኣብ ኣስመሮም

ኣቦ መንበር ሰዲህኤ

ቅሉዕ መልእኽቲ ንኹሎም ኣባላት ሰዲህኤ ብዝብል ኣርእስቲ ብስም ኣባላት ሰዲህኤ ኣብ ዞባ ኣውሮጳ ዝተደርሰ ጽሑፍ ብ23 ነሓሰ 2017 ኣብ መስከረም.ነት ኣንቢብና።

እቲ ሓተታ ንሰልፍን ኣከያይዳኡን ሓቂ ብዘይኮነ መንገዲ ዝገልጽ ምዃኑ ኣንበበቲ ድሮ ተገንዚቦሞ ይዀኑ ዝብል ዕግብት  ኣለና። እቲ ሕጂ መብርሂ ክንህበሉ ዝደለና  ጉዳይ ግን፡ ነቲ ቀንጠ መንጢ ትሕዝቶኡ ዘይኮነስ፡ብዛዕባ መንነት ናይ ደረስቱ እዩ።

ቅድሚ ዝኣገረ፡ ሽማግለ ዞባ ኤውሮጳ  ሰዲህኤ፡  ብቅዋም ሰልፍን በቲ ኣብ ጉባኤ ዝተመርጸ መሪሕነት ዘውጽኦ ፖሊሲታትን መምርሕታትን ተማእዚዙ ዝቃለስ ጨናፍርን ኣባላትን ከም ዘለዎ ንኩሎም ኣንበብቲ ከነብርህ ንደሊ።  ዝዀነ ፍሉይ ርእይቶ ዘለዎ ኣባል ሰዲህኤ ድማ፡ ርእይቶኡ ብናጻ ብዘይ ዝዀነ ይኹን ስግኣት ክገልጽ መሰሉ ሕልው ኢዩ።

ስለ’ዚ፡ ቅሬታ ዘለዎ ኣባል ሰልፊ፡ ንቕሬታኡ ዝገልጸሉ ሕግን ኣገባብን ስለዘለዎ ብሕጓ ዝኣትወሉ ምኽንያት የብሉን።  ኣብ ሰዲህኤ፡ ዝኾነ ቅሬታ ወይ ርእይቶ ዘለዎ ኣባል ወይ ብቓሉ ወይ ስሙን ክታሙን ኣንቢሩ ብጽሑፍ ብስርዒታዊ መስኖታት ኣቢሉ ናብ ዝምልከቶ ኣካል ከመሓላልፍ ዝኽልክሎ ስለዘይብሉ፡ ኣብ መስከረም.ነት ከይዱ ዘእውየሉ ምኽንያት የብሉን። ንኣባላት ሰልፊ ብኣካል ኣብ ፈስቲቫል፡ ሰሚናር፡ ኣብ ጨንፈሩ ክረኽበሉ ዘኽእል ዕድላት ከለዎ፡ ብመስከረም.ነት ኣቢሉ ጻውዒትን ጥርዓንን ከቕርብ ዝፍትን እንተደኣኮይኑ፡ ኣብ’ቲ ሰልፊ ሰማዕን ሰዓብን ዝሰኣነ ጥራሕ ኢዩ ክኸውን ዝኽእል።

ብሓፈሻኡ ብስም “ኣባላት ሰልፊ ኣብ ዞባ ኣውሮጳ” ዝወጽእ ጽሑፍ፡ ዋና ይኹን ጣቋ የብሉን። ሰብ ክርድኦን ክቕበሎን እንተደኣ ኮይኑ ድማ፡  ስም ናይ ጽሓፍቱ ይጠቐስ፡ ወይ ድማ ተወዲብና ኢና በሃላይ እንተኾይኑ ብስም ሓደ ትካል፡ ማለት ብስም ሽማግለ ጨንፈር ወይ ሽማግለ ዞባ ….ወዘተ ዝብል መለለይ ሕላገት ገይሩ ይውጻእ እሞ ንህዝቢ ኣኼባ ጸዊዑ ይላለ።

ኣባላት ዞባ ኣውሮጳ ሰዲህኤ፡ ቅድም ክብሉ ወከልቶም ብምልኣኽ ኣብ ዝተኻፈልዎ ስፊሕ ዋዕላ ፍራንክፈርት፡ ድሒሩ ድማ፡ ኣብ ፈስቲቫል 2017 ኣብ ዝተኻየደ ናይ ኣባላት ሰልፊ ሰሚናር፡ ብዘየማትእ ኣገባብ ኣብ ጐድኒ ሕጋዊ መሪሕነቶም ደው ኢሎም ምህላዎም ከነረጋግጸልኩም ንፈቱ።

ስለ’ዚ፡ እዚ ብስም “ኣባላት ሰልፊ ዞባ ኣውሮጳ” ወጺኡ ዘሎ ጽሑፍ ንሰዲህኤን ዞባ ኣውሮጳን ዝምልከት ኣይኮነን። ብኸም’ዚ ኣነዋሪ ኣገባብ ዝደናገር ኣባል ይኹን ህዝቢ ድማ የብልናን። ካብ ጸላም ተኸዲኖም ፖለቲካ ዝሰርሑ፡ ናብ ብርሃን ወጺኦም ዕላማታቶም፡ ኣስማቶምን መንነቶምን ገሊጾም ፖለቲካ ክሰርሑ እንተዝፍትኑ ምሓሾም።

ኣባላት ሰዲህኤ ዞባ ኤውሮጳ  ታሪኽ ዝምስክሮ ጽንዓት ወኒኖም ንልዑላውነት ሕግን ንግዝኣት ዲሞክራስን ከስፍኑ  ዝቃለሱ ዘለዉ ፈተውቲ ህዝቦምን ሃገሮምን እዮም።

ክንዲ/ ዞባዊ  ሽማግለ ሰዲህኤ ዞባ ኣውሮጳ

ኢሳቕ ወልደማርያም

ኣቦ መንበር ዞባዊ ሽማግለ ዞባ ኤውሮጳ

This email address is being protected from spambots. You need JavaScript enabled to view it.