ህግደፍ ሎሚ’ውን እቶት ሓረስቶት ክግብት’ዩ

ስርዓት ህግደፍ ኣብ ነፍሲ ወከፍ ዓዲ ናይ ሎሚ ዘበን እቶት ሓረስቶት ዝግምግማ ብእሙናቱ ዝቖማ ሽማግለታት የቕውም ከም ዘሎ ምንጭታት ሰልፊ ዲሞክራሲ ህዝቢ ኤርትራ ካብ ኤርትራ ሓቢሮም። በቲ ጨቋኒ ስርዓት ኣውጺእዎ ዘሎ ዓመጸኛ ሕጊ መሰረት፡ህዝቢ እዘን ሽማግለታት እዚኣተን ከይገምገማሉ ምህርቱ ክሓፍስን፡ክሸይጥን ክልውጥን ኣይክእልን እዩ።

ኣብቲ መምርሒ ቀንዲ ቆላሕታ ተዋሂብዎ ዘሎ ሕጊ፡ ሓደ ሓረስታይ ካብ እቶቱ ንዓኡ ዝጥቀመሉ 10 ኩንታል ጥራይ ኣትሪፉ፡ ነቲ ዝተረፈ መንግስቲ ብዘውጸኦ ናይ ዋጋ ተመን 600 ናቕፋ ንኹንታል ናብ መንግስቲ ጥራይ ክሸይጥ ዘገድድ እዩ።

መንግስቲ ህግደፍ ከምዚ ዓይነት ዓመጽ ዘካይድ ዘሎ ሎሚ ጥራይ ዘይኮነ ቅድሚ ሕጂ እውን “ጥሙር ሕርሻ” ብዝብል መምርሒ ለቖታኡ ሒዙ ፈቐዶ ዓውዲ ይጉለት ከም ዝነበረ ዝዝከር እዩ።