ብ26 ሰነ 2015 ኣብ ከተማ ጅነቭ፡ ስዊዘርላንድ፡ ብደለይቲ ፍትሒ ንኽካየድ ተመዲቡ ዘሎ ብኮሚሽን ምጽራይ ሕቡራት ሃገራት ዝቐረበ ንግህሰታት ሰብኣዊ መሰላት ኣብ ኤርትራ ዝምልከት ጸብጻብ ዝድግፍ ሰላማዊ ሰልፊ ንምዕዋት ሰልፊ ዲሞክራሲ ህዝቢ ኤርትራ (ሰዲህኤ) 1000 ዩሮ ንኣዳለውቲ ሰላማዊ ሰልፊ ኣበርኪቱ ኣሎ። እዚ፡ ኣብ ርእስ'ቲ ኣባላት ሰዲህኤ ኣብ ዝተፈላለዩ ሃገራት ብውልቂ ዘበርክትዎ ዘለዉ ወፈያታት ኢዩ።

ብኻልእ ሸነኽ ከኣ፡ ሓው መንግስተኣብ ኣስመሮም፡ ኣቦ መንበር ሰዲህኤ ዝመርሖ፣ ሓው ወልደሱስ ዓማር፡ ሓላፊ ቤት ጽሕፈት ኣህጕራዊ ዝምድናታት፣ ሓው ተስፋይ ወልደሚካኤል (ደጊጋ)፡ ሓላፊ ቤት ጽሕፈት ገንዘባዊ ጕዳያትን ሓው ንጉሰ ጸጋይ፡ ኣባል ማእከላይ ባይቶን ምኽትል ሓላፊ ቤት ጽሕፈት ገንዘባዊ ጕዳያትን ዝርከብዎ ልኡኽ ኣብ'ቲ ሰላማዊ ሰልፊ ክካፈል ምዃኑ ተፈሊጡ ኣሎ።